維基百科

倫敦窩打老火車站

倫敦窩打老火車站（英文：London Waterloo station），又叫做、窩打老國家鐵路站（Waterloo National Rail station）窩打老（英文：Waterloo，/ˌwɔːtərˈluː/）[1][2]、窩打老站（英文：Waterloo station）、倫敦窩打老（英文：London Waterloo）站，係英國國家鐵路網絡嘅一個主要火車總站，亦都係英國最大嘅火車站[3]。

倫敦窩打老火車站

窩打老站喺泰晤士河的南岸嘅琳寶區（London Borough of Lambeth）嘅窩打老地區。窩打老站係西南鐵路（South Western Railway）嘅火車總站，西南鐵路嘅火車包括：西南主線，經修咸頓（Southampton）去多實郡（Dorset）嘅威茅斯（Weymouth）；西部主線經梳士巴利（Salisbury）去雅息特（Exeter）；樸茨茅夫快線（Portsmouth Direct line）去樸茨茅夫港（Portsmouth Harbour），呢條線連接去威特島（英文：Isle of Wight）嘅渡輪服務，同埋倫敦周圍西部同西南部嘅通勤服務，包括舒梨郡（Surrey）、咸普郡（Hampshire）、柏莎郡（Berkshire）。

窩打老站連接住同佢同名嘅窩打老地鐵站（Waterloo tube station），火車站嘅東面係另一個叫「窩打老東站」嘅火車站；東站係東南鐵路（Southeastern）嘅主線火車站，東南鐵路嘅火車主要係由倫敦去東南部城市，例如杜佛（Dover）、根德郡嘅三文治（Sandwich, Kent）鎮，同埋對面河嘅查令十字站（Charing Cross railway station）。

窩打老站嘅南面係必嘉老綫（Bakerloo line）嘅琳寶北站（Lambeth North）。

呢個車站喺1848年由倫敦暨西南鐵路（London and South Western Railway）公司開通，由於佢較近城西（West End），所以取代咗早期嘅九榆樹火車站（Nine Elms Railway Station）。 不過，喺開始嘅時候，從來都無諗過將呢個站設計成總站，因為原本嘅設計方案係想條火車線會向北繼續去倫敦市（City of London），所以呢個車站好長時間都係以見步行步嘅方式發展[4]，又因為個車站好大，令到啲乘客有時好難搵到正確嘅月台上車。

為咗解決問題，窩打老站喺20世紀初重建，喺1922年重新開始運作，重建時仲喺正門上面整咗個勝利拱門（Victory Arch）嚟紀念第一次世界大戰。窩打老站嘅蒸汽火車服務喺1967年結束，係倫敦最後一個停止蒸汽火車服務嘅總站。（註：喺2020年，定期蒸汽火車重新喺倫敦窩打老站提供服務[5]）。 喺1994年開始，直至2007年，窩打老站係歐洲之星（Eurostar）國際列車嘅倫敦總站，喺2007年，歐洲之星嘅倫敦總站轉咗去國王十字站隔離嘅 St. Pancras 火車站。

倫敦窩打老站以前係英國最繁忙嘅火車站，依家係英國第三繁忙，喺2023年3月截止嘅12個月入面，佢處理咗5,780萬人次嘅乘客[6] 。以地面面積計，佢係英國最大嘅火車站，同埋有最多嘅月台嘅火車站。

位置

編輯

呢個車站正式嘅名係 London Waterloo（倫敦窩打老），喺所有官方文件上面都係咁叫。佢有個車站代碼 WAT[7]，佢喺泰晤士河南岸嘅倫敦琳寶區，靠近窩打老橋（Waterloo Bridge）同西敏橋（Westminster Bridge）嘅東北。正門喺窩打老道同約克道交界嘅南面[8]。 佢以同名嘅橋命名，而呢座橋本身就係以窩打老戰役命名，呢場戰役發生喺條橋開幕之前嘅兩年[9][10]。

歷史

編輯

背景

編輯
 
1848年，最早期嘅窩打老站
 
1862年窩打老站嘅平面圖

窩打老站係由倫敦暨西南鐵路（London and South Western Railway，L&SWR）起嘅。佢原本唔係設計成一個總站，而係一個向城市方向延伸嘅火車站。佢取代咗早期嘅九榆樹站，九榆樹站係喺1838年5月21號開幕，從1840年5月11號起就連接咗倫敦同修咸頓[11]。到咗1840年代中期，去灣斯禾夫（Wandsworth）、溫布頓（Wimbledon）、京士頓（Kingston upon Thames）、刁頓濕地（Ditton Marsh）同埋威橋（Weybridge）嘅通勤服務已經成為咗 L&SWR 嘅重要嘅部分，所以公司搵咗距離倫敦中心同埋城西更近嘅火車站嚟做總站。議會嘅一項法案，即係1845年嘅倫敦暨西南鐵路大都會擴建法案 (8 & 9 Vict. c. clxv)，喺1845年獲得批准，將呢條線延伸到約克道嗰邊，靠近窩打老橋。

從九榆樹延伸窩打老，涉及清拆700間屋，而為咗最大程度咁減少干擾，清拆出嚟嘅大部分建築廢料都係用磚造嘅天橋嚟運走。最長嘅橋係經過西敏橋道（Westminster Bridge Road），佢長90呎（27米）[12]。

新車站嘅設計係有四條路軌，希望其他火車公司都會用佢[13]。呢個車站由 William Tite 設計，喺1848年7月11號啟用，因為喺「窩打老橋」附近，所以個火車站就叫做「窩打老橋站」[14]。九榆樹同時因為定期保養而關閉，但係維多利亞女王好鍾意舊車站嘅私隱度高，所以九榆樹站就為佢保持開放，而一個替代嘅私人車站就喺1854年喺灣斯禾夫道（Wandsworth Road）起咗。 窩打老橋站原本嘅設計係一個中途站（through station），因為預咗啲火車會繼續向倫敦市（City of London）嘅方向行，總站會係喺泰晤士河嘅北面嘅倫敦市中心。喺1847年嘅金融恐慌（Panic of 1847）之後，喺個計劃取消之前[14]， L & SWR 喺沿線買咗幾個物業。喺1882年10月，窩打老橋站（Waterloo Bridge station）正式改名做窩打老（Waterloo），反映咗長久以嚟當地人嘅通常叫法，甚至係喺某啲 L&SWR 嘅時間表入面都已經叫個站做窩打老[14]。

擴建

編輯
 
1888年窩打老站嘅平面圖

喺成個19世紀， L&SWR 嘅目標係將佢嘅主線向東延伸到倫敦市（City of London），而且唔願意喺窩打老起一個專用嘅大型總站[14]。 結果，呢個車站一直都無總站應該有嘅一般設施，直至1853年，喺車站先至嘅最東面起咗個細嘅建築物。喺1854年，倫敦墓地同國家陵墓公司（London Necropolis & National Mausoleum Company）喺窩打老站入面起咗一個私人車站，為Brookwood 公墓提供服務[15]。呢個車站喺1902年拆咗重建，起成一座專用嘅火車站建築物，係20世紀初窩打老重建嘅一部分[16]。

窩打老嘅交通量同乘客量喺之前嘅成個世紀都不斷增加，而窩打老亦都以特殊嘅方式延伸同埋擴建，以適應呢種需求增加嘅情況。 1860年，車站嘅西北面增設咗新月台；呢啲新月台因為佢嘅目的地而俾人叫做溫莎站（Windsor Station）。 主車站嘅額外停車側邊短路軌（dock siding ）喺1869年3月17號啟用[17]。 由倫敦橋去查令十字嘅東南鐵路（ South Eastern Railway，SER ）線嘅 5-chain（330呎；100米；註：chain 係英國嘅長度單位，一個 chain 係 66 英尺）連接線喺1865年7月開通咗。佢喺1867年2月1號，由倫敦橋轉移咗去炮台街（Cannon Street），之後喺第二年撤回[17]。東南鐵路喺1869年1月1號開設窩打老交匯站（Waterloo Junction station，即係依家嘅窩打老東站）做替代站，令到 L＆SWR 嘅乘客可以轉車去炮台街站。為咗提供更多嘅服務，喺窩打老站嘅東南邊嘅另一個延伸部分喺1878年12月16號開始啟用；另一個延伸到北面嘅溫莎站以外嘅地方喺1885年11月亦都開始啟用[17]。

對於每次延伸擴建，長遠嚟講呢啲延伸擴建都係「暫時性」嘅，直至擴建嘅路線延伸過咗窩打老，而呢啲增建係喺已經有嘅結構旁邊同周圍起嘅，而唔係整體嘅建築計劃，呢個做法令到個車站睇落越嚟越殘破，對乘客嚟講亦都越來越唔方便。月台嘅編號以一種特殊嘅方式增長，令到由1848年開始，一號月台就變咗喺「車站群」嘅中間，呢個情況令人覺得好混亂[17]。 加咗其他月台之後，原本嘅車站就俾人叫做「中央車站」。呢啲新嘅月台組係用綽號（nicknames）嚟稱呼嘅 —— 喺1878年為郊區服務而加入嘅兩個月台俾人叫做「塞浦路斯站」（Cyprus Station），而喺1885年為溫莎線火車使用嘅六個月台就變成「喀土穆」（Khartoum）[17]。呢啲站內站每個都有自己嘅預約辦事處、的士站同埋入口，而且入到車站入面嘅其他部分，啲指示牌通常都係做得唔好，唔清唔楚同埋令人困惑[17]。

到咗1899年，窩打老已經有16個月台，不過呢啲月台只係用10個號碼嚟識別，即係話有啲數字係重複，同一個號碼會分配俾車站嘅唔同部分或者唔同月台層[18]，呢種複雜同混亂喺19世紀後期成為咗好多年嚟作家同埋幽默家講嘅笑話，包括 Jerome K. Jerome 嘅《三人同船》（Three Men in a Boat）[17]。 呢個喺英國幽默諷刺周刊笨拙雜誌（Punch）嘅卡通漫畫入面[19]。

重建

編輯
 
車站正門嘅「勝利拱門」（Victory Arch）係由占士 · 羅伯 · 史葛（James Robb Scott）建造，用嚟紀念英國參與第一次世界大戰。

喺1880至1890年代，L&SWR 試圖確定計劃，將呢條線從窩打老延長到倫敦市。 分別喺1882年同埋1891年，曾經有提議想起架空路線，但係兩次都因為成本問題而無實行到。1893年，一項起地下鐵（tube railway）嘅法案通過咗，喺1898年8月8號，公司開通咗窩打老及城市綫（Waterloo & City line），呢條深層地下鐵（deep-level tube）路線直接連接窩打老同埋銀行及紀念碑站，咁樣令到公司可以得到佢好耐以嚟好想要嘅直接通勤服務（雖然需要喺窩打老由地面線轉為地底線）[17]。

由於窩打老喺當時注定咗會繼續係一個火車總站，而個車站已經符合唔到公眾嘅期望，所以 L&SWR 決定將車站全面重建，而重建項目就叫做「大轉型」（Great Transformation）[17][19]。

L&SWR 喺1899年同1900年獲得咗進行呢項工程嘅法律權力。L&SWR 總共買咗大約6.5英畝（2.6公頃）嘅土地，用嚟擴建火車站，當中包括六條街道（同埋另外兩條街嘅一部分），同埋諸聖教堂（All Saints' Church）。

L&SWR 起咗六座新屋，用嚟安置受影響嘅大約1,750人，作為對佢哋無屋住嘅賠償。喺總站開始起之前，已經進行咗廣泛嘅基礎工程同貧民窟清理，包括幾座曾經廣泛用嚟做妓寨嘅破舊建築物[17]。到1903年，啲土地已經清理好晒，可以開始起新火車站[19]。

 
廿世紀初嘅窩打老重建包括一道彩色玻璃窗，上面有倫敦同西南鐵路嘅徽章。

新車站分階段開放。部分喺1909年已經準備好，主訂票廳喺1911年6月11號開放[17]，去車站嘅行車路亦都喺1911年12月18號開放俾公眾使用。 同窩打老交匯站嘅連接喺同年嘅3月被拆除，但係仍然保留咗一條側軌，條側軌去到1925年5月3號先至拆咗。條行人天橋仍然保持喺原位，用嚟做兩個車站之間嘅行人通道[17]。喺第一次世界大戰期間，主站嘅建設零星持續，新站終於喺1922年正式開幕，有21個月台同一個700呎（210米）長嘅大堂[17]。 屋頂同月台最初係由 J. W. Jacomb-Hood 設計，佢去咗美國睇車站設計嚟搵靈感[19]。 1914年 Jacomb-Hood 過咗身之後，佢嘅工作由阿弗斯林伯（Alfred Weeks Szlumper）接手[17]。 窩打老站係用砵蘭石（英文：Portland stone；係一種英國波特蘭島出產嘅石灰石）以帝國巴洛克（Imperial Baroque）風格建造嘅[19]。 占士 · 羅伯 · 史葛（James Robb Scott）設計咗辦公室部分。新車站有一幅大型嘅彩色玻璃窗，喺主要道路入口上面，畫咗 L&SWR 嘅公司徽章，周圍有一幅壁畫，列出鐵路所服務嘅縣市（幅壁畫到今日都仲喺度）。 雖然喺車站開通嗰陣，鐵路法案1921（Railways Act 1921）已經通過咗，L&SWR 已經唔存在，不過呢啲有 L&SWR 特色嘅設計仍然保留咗[20]。 呢個法案將 L&SWR 同另外兩間比較細嘅南方公司（即係 LBSCR 同埋 SECR）合併成為南方鐵路（Southern Railway）。LBSCR 全名係「倫敦、白禮頓同南海岸鐵路」（London, Brighton and South Coast Railway）；SECR 全名係「東南同漆咸鐵路管理委員會」（South Eastern & Chatham Railways），佢係東南鐵路，同埋倫敦、漆咸同多佛鐵路（London, Chatham and Dover Railway）合併成嘅管理委員會（Managing Committee）[21]。

 
勝利拱門上面嘅「1914」女戰神貝羅納

窩打老係第一次世界大戰時期士兵嘅主要總站，亦都係英國遠征軍（British Expeditionary Force）水手去修咸頓港嘅主要總站。 窩打老站亦都處理過嚟自海外救護火車同海外郵件。喺1915年12月到1920年4月期間，車站有免費嘅自助餐。除咗1917年9月29號其中一條線發生爆炸之外，車站本身無乜意外發生過[17]。

 
勝利拱門上面嘅「1918」和平女神帕斯

重建嘅車站喺1922年3月21號由瑪麗女王正式啟用[17]。主要嘅行人入口，勝利拱門（又名5號出口），係由史葛設計，係紀念第一次世界大戰期間被殺嘅公司員工。 開幕嗰陣，佢標記咗585個喺戰爭被殺嘅員工。佢兩邊側翼有兩座羅馬女神雕塑；寫住「1914」嘅係貝羅納（Bellona）着住盔甲，手持劍同火炬，而寫住「1918」嘅就係和平女神帕斯（Pax, the goddess of Peace）坐喺地球上[17]。

南方鐵路

編輯

L＆SWR 喺1910年代開始研究郊區服務嘅電氣化，用600伏直流嘅第三條路軌嘅方法。 第一條經東匹尼（East Putney）去溫布頓（Wimbledon）嘅路線喺1915年10月25號開始提供服務，之後喺1916年1月30號開始去錫柏頓（Shepperton）嘅路線，3月12號咸斯洛環線（Hounslow Loop Line）開始提供服務，6月18號開始去漢普頓宮（Hampton Court）嘅路線[17]。 窩打老站嘅擁有權經歷咗一連串嘅轉換，呢個係好多英國火車站嘅典型特徵。喺1923年嘅重組之下，佢轉咗去南方鐵路，南方鐵路繼續咗第三次由窩打老開始嘅鐵路電氣化，包括喺1925年7月12號去僑福（Guildford ）嘅全線服務，同埋喺1930年7月6號去溫莎嘅全線服[17]務。

喺1932年3月9號，窩打老站安裝咗嘅公共廣播系統開始運作，之後嘅十年，窩打老站用呢個系統嚟播放音樂同埋乘客廣播[17]。 喺1934年，南方鐵路計劃投資50萬英鎊（而2024年嘅價錢計，大約係4300萬英鎊）去改善信號同路軌布局，令到個火車站嘅所有月台都可以更好咁用到[17]。 1937年7月4 號開通咗一條經禾京（Woking）、僑福（Guildford）去樸茨茅夫港（Portsmouth Harbour）嘅全電氣化嘅火車服務，方便去威特島（Isle of Wight），同埋連接去柯德朔（Aldershot）同阿頓（Alton）嘅服務。喺1939年1月1號，窩打老同雷丁之間開通咗一條電氣化嘅火車服務，仲有一條分支去金巴利（Camberley）同埋柯德朔（Aldershot），呢啲服務都係為咗預期呢區嘅軍事同通勤交通會增加。[17]

窩打老喺二戰期間俾人炸過幾次。喺1940年9月7號，車站外面嘅約翰街高架橋俾炸彈摧毀咗，令到個車站停運作咗12日。然後服務慢慢回復，正常服務要到10月1號先至完全恢復，特別受影響嘅係郵政交通，車站月台上有超過5,000個未分類嘅郵袋堆咗喺度，等緊處理。窩打老喺1940年12月29號受到轟炸之後再次停運。窩打老喺1941年1月5號重新開放，即係喺約克道嘅車站辦公室被炸毀嘅同一日。喺1941年5月10號到11號嘅一次夜間突襲之後，呢個車站再次受到嚴重損害，火災持續咗四日[17]。喺1959年，做緊約克道沿線嘅建築工程嘅時候，發現咗一個2,000磅（910公斤）嘅炸彈[17]。

鐵路私有化

編輯

喺1948年國有化之後，呢個車站嘅所有權轉移咗俾英國鐵路（British Railways，BR ），成為南部地區嘅一部分。 喺BR嘅管理之下，越嚟越多嘅服務電氣化咗，另外因為航空服務嘅改善同埋成本效益，令到船車（boat train；船車係一種客運列車服務，架火車去到碼頭嘅時候會上鐵路渡輪，然後喺到達對岸嘅時候，繼續去目的地。）服務嘅交通需求下跌咗。

窩打老係倫敦最後一個用蒸汽火車頭嘅總站。最後一次蒸汽火車旅程係喺1967年7月9號，當時有一大班火車愛好者拎住相機同錄影設備，試圖去影最後一班蒸汽服務去般尼茅夫（Bournemouth）嘅情況。電動火車服務喺第二日開始[17]。

窩打老係由東南網絡（Network SouthEast）管理，東南網絡係BR屬下嘅機構。英國鐵路私有化之後，所有權同管理權喺1994年4月轉移俾鐵路軌道（Railtrack）公司，最後喺2002年轉移俾網絡鐵路（Network Rail）[22][23]。

歐洲之星

編輯
 
2007年12月，歐洲之星向前國際總站發出嘅告別訊息（喺主大堂嘅西側睇到）
 
歐洲之星火車喺窩打老國際總站嘅月台

歐洲之星火車喺窩打老國際火車站嘅月台 雖然通過英倫海峽嘅英法海底隧道（Channel Tunnel）連接歐洲嘅國際鐵路嘅倫敦總站一早已經計劃咗喺倫敦北部，但係到咗1994年英法海底隧道完工嘅時候，倫敦北部車站計畫嘅主要建築工程仲未開始[24]。 相反，窩打老車站嘅西面起咗5個新月台，取代咗20號同 21號月台。 新嘅窩打老國際火車站係歐洲之星國際列車去巴黎北站（Gare du Nord）同埋布魯塞爾南站（Brussels-South）嘅第一個倫敦總站。 首航儀式喺5月6號離開窩打老，英女王伊利沙伯二世（Queen Elizabeth II ）同埋法國總統密特朗（François Mitterrand）聯合主持咗開幕儀式。常規服務喺11月14號開始[25][26]。 改裝成為國際總站嘅施工需要拆咗車站一個裝飾拱門，上面有個「南方鐵路」嘅牌扁。 呢個牌扁重新豎立喺 William McAlpine 爵士嘅私人福利山博物館（Fawley Hill Museum），窩打老國際火車站係佢嘅公司整嘅[27]。

同時，喺英國鐵路私有化嗰陣創立嘅倫敦暨大陸鐵路（London and Continental Railways，LCR），喺1996年佢哋俾政府選中重建聖潘克斯火車站（St Pancras railway station），同埋海峽隧道鐵路連接線（Channel Tunnel Rail Link，CTRL）呢條新嘅火車路線，將聖潘克斯連接到英法海底隧道[28]。

CTRL，即係高速一號嘅第二階段，喺2007年完工，窩打老國際喺2007年11月13號關閉，當時歐洲之星服務轉移到新嘅聖潘克斯國際火車站。前窩打老國際總站嘅所有權之後轉移俾英國鐵路局（殘餘）有限公司，英文名係 BRB (Residuary) Limited[26][29]。

希斯路機場線

編輯

有提議將窩打老站做希斯路機場鐵路服務嘅倫敦市中心總站。嗰個叫 Airtrack 嘅項目由英國機場管理局 (British Airport Authority，BAA) 推動，喺窩打老到雷丁線（Waterloo–Reading line）嘅中途站史丁斯（Staines）起一條支線去希斯路機場（Heathrow Airport），條支線亦都連接希斯路機場、禾京（Woking）同埋僑福（Guildford）。

Airtrack 原計劃係喺2015年開始營運，但係喺2011年，計劃俾BAA放棄咗[30]。同年10月，灣斯禾夫（Wandsworth）議會提出咗一項叫做 Airtrack-Lite 嘅修訂計劃，個計劃將提供從窩打老到希斯路嘅火車服務，途經從史丁斯到希斯路嘅同一支線，但係，通過轉移或分拆已經有嘅服務，火車班次會超過已經有嘅水平，轉車嘅次數唔會增加。BAA嘅早期計劃曾提出喺平交道（level crossings）增設更多火車班次嘅提議好有爭議性，因為咁做會令到啲人擔心平交道封路嘅次數太多，對揸車嘅人同埋行人造成不便。

前國際月台

編輯
 
翻新咗嘅倫敦窩打老嘅前國際總站月台（20至24號），2023年8月影嘅
 
喺呢張喺2012年影嘅相入面，可以見到當時已經唔再用嘅 Grimshaw 設計嘅前窩打老國際火車站嘅火車棚，距離鏡頭更近，後面就係舊嘅火車棚。前景左面係蜆殼中心（Shell Centre），右面係倫敦郡政廳（County Hall）

將歐洲之星服務轉移咗之後，窩打老國際總站嘅前歐洲之星20至24號月台一直丟空咗，直至2018年12月部分重新開放之後，喺2019年5月全面重新投入服務。窩打老一直都面對重大嘅容量問題，直至前國際車站重新開放俾國內線用[31]。 喺2008年12月進行咗準備工作，令到20號月台可以俾西南火車（South West Trains, SWT）用嚟提供倫敦嘅近郊服務。 但係，由於需要改變車站外嘅路軌布局，所以剩低嘅月台嘅改建被迫延遲[32]。 20-22號月台喺2018年底重新開放俾國內線用。最後嘅23-24號亦都喺2019年5月開放。20-24號月台嘅翻新同重新開放令窩打老嘅容量增加咗30% 。不過國際月台嘅設計只係可以應付每小時6班火車，遠低過1到19號月台嘅通勤服務容量。

呢個項目因為完工日期延誤而受到批評；喺2009年，運輸署證實網絡鐵路（Network Rail）因為要為車站開發高級輸出規格（High Level Output Specification，一個5年嘅控制計劃）選項，令到個月台嘅預計重新開放日期推遲到2014年，即係喺佢哋閂咗門嘅七年之後[33]。 透過公開資訊自由嘅要求，發現到2010年底，維護唔再用嘅月台嘅成本係410萬英鎊[34]。 西南火車之後確認咗20號月台將會喺2014年重新投入使用，提供去雷丁、溫莎、史丁斯（Staines）同咸斯洛（Hounslow）嘅服務。呢啲服務會係由翻新過嘅西南火車（SWT）同前格域機場快線（Gatwick Express）嘅車卡所組成嘅10卡列車。 20號月台喺喺2014年5月重新開放[35]，可以透過19號月台入去，而喺前歐洲之星入口上面起咗樓梯之後，21同22號月台亦都喺10月重新開放[36][37][38]。

加長月台（1–4）

編輯

喺2016年5月，宣布1至4號月台會加長，等佢可以行新嘅十卡707級列車。工程喺2017年8月5號開始，喺8月28號完成[39]。

意外同重要事件

編輯

同其他嘅倫敦總站比較，窩打老嘅意外相對少。 喺1896年8月21號，一架離開鐵路車廠嘅火車頭，超過咗安全距離點（clearance point），同一架離開緊嘅客運火車相撞，造成五個乘客受傷[17]。 喺1904年5月5號，有個鐵路線維修人員（linesman）唔小心踩到一條訊號線，造成個信號系統俾咗個錯誤嘅開車訊號俾架貨運火車，令到佢同一架客運火車相撞，造成一個人死亡[17]。 喺1913年10月25號，窩打老嘅波口位（Junction ），兩架客運火車相撞，造成三人死亡[40]。

喺1948年4月13號，當一架 M7 級蒸汽火車頭正喺度推緊裝咗煤嘅車卡，一部窩打老暨城市線（Waterloo and City line）嘅貨物升降機（goods hoist，「開士機」）開始出現沉降。 架火車頭跌咗落部升降機嗰度，最終成架反轉咗，啲蒸氣噴到周圍都係。 個司機同司爐員（fireman）成功逃離，架拯救出嚟嘅火車頭散晒，之後只係用嚟做備用零件[17]。喺1960年6月3號，一架由兩架4COR多單元電動車組成嘅空載貨車衝紅燈，同一架開去多實郡嘅威茅斯（Weymouth）嘅蒸汽客車側向相撞（sidelong collision）。 有幾個人受咗輕傷[41]。 第二年嘅4月11號，一架多單元電動車衝紅燈，同一架蒸汽火車頭正面相撞，意外造成一死十五傷[42]。

喺2000年3月10號，一架客運火車喺5號月台同一架空載嘅貨車因為司機失誤而相撞，造成三十五人受傷[43]。

2017年8月15號，一架 456 級多單位電動車喺車站同一架工程車相撞。客車出咗軌，造成當日交通中斷。三個人受咗傷，但係唔需要入院[44]。 原因有兩個，互鎖系統嘅改變，呢種改變喺測試嘅時候無考慮到，同埋用嚟測試嘅臨時連線無拎走（可能係為咗克服互鎖改變嘅問題而加上去嘅 —— 不過呢啲完全無文件記錄同埋未經批准嘅咁樣用）意思係有啲地方無正確咁設定好，而黎啲錯誤又無被偵測到。咁樣做，令到信號系統喺應該發出停車訊號嘅時候，錯誤咁發出一個開車訊號[45]。 鐵路意外調查科（Rail Accident Investigation Branch，RAIB）對呢次意外嘅調查得出結論，錯誤係同1988年嘉立咸交匯站（Clapham Junction）撞車嘅錯誤相似。 RAIB 表示擔心隨住時間嘅推移，從嗰次意外當中學到嘅教訓會俾人忘記咗[46]。

車站設施

編輯
 
窩打老火車站嘅鐘

窩打老區內嘅主要交通交匯處包括倫敦窩打老（窩打老火車站）、窩打老東站、窩打老地鐵站同埋幾個巴士站。窩打老車站大堂有超過130部自動售票閘機，同埋下面地鐵站有另外27部[47]。

窩打老嘅主大堂中間掛住一個四面鐘，個鐘嘅每個面板嘅直徑係5呎6吋（1.68米）。 佢係20世紀初重建嘅一部分，由「李斯特嘅紳士」（Gents' of Leicester，2005年俾 Honeywell 收購咗）設計。喺2010年，嗰個鐘裝咗啲新技術，令佢可以自動切換英國嘅夏令時間[48]。 「喺窩打老嘅時鐘下」見面係一個傳統嘅約會地點 [49][50]。

 
窩打老車站嘅鐘、大堂同零售露台，2012年影

月台

編輯

窩打老站共有24個月台，由東南至西北分別為1-24號（從客運入口由左向右）：

  • 1-6月台：一般係西南主線嘅近郊服務用，去溫布頓、僑福同埋禾京。
  • 7-16月台：一般係西南主線用，去卑誠史篤（Basingstoke）、樸茨茅夫（Portsmouth）、威茅斯（Weymouth）和雅息特（Exeter）方向嘅長途服務。
  • 17-24號月台：一般係用喺窩打老-雷丁線嘅服務。

相反，倫敦窩打老東站（London Waterloo East）嘅月台係用字母嚟指示，以免同窩打老站嘅編號月台混淆。

零售露台

編輯

網絡鐵路喺一樓嘅幾乎沿住大堂嘅全闊度起咗個陽台。呢個項目嘅目標係提供18個新嘅零售空間同埋一間香檳酒吧，減少大堂嘅擠塞，同埋提供額外嘅扶手電梯去窩打老東站，改善窩打老站同埋窩打老東站嘅通道，呢條扶手梯通去連接窩打老同窩打老東嘅行人天橋。 大堂嘅零售同餐飲店都已經搬走咗，以增加更多嘅乘客流通空間。一樓嘅辦公室已經改建成替代同額外嘅零售同餐飲空間。工程喺2012年7月完成，耗資2500萬英鎊。

警署

編輯

英國運輸警察喺窩打老嘅勝利拱門附近有間警署，警署裡面有三個拘留套房（custody suite）。雖然地方比較狹窄，但係直至1990年代後期，警署有超過40個警員提供服務[51]。隨住窩打老嘅歐洲之星總站關閉，警署亦都喺2009年2月關閉咗[52]。依家火車站嘅警務服務係由離車站東面幾碼距離嘅福爾摩斯台（Holmes Terrace）嘅一個新警署提供[53]。 直到2010年7月，窩打老嘅鄰里警務隊由一名督察、一名警長、兩名警員、特種警員同埋13個警察社區支援警員（police community support officers）組成[54]。

巴士站

編輯

窩打老站有大量嘅巴士路線，日夜提供服務[55][56]。 喺 BFI IMAX 對面嘅窩打老道巴士站喺2004年夏天開幕。[57][58]

火車服務

編輯

 

西南鐵路

編輯

火車站群嘅主要部分叫做「窩打老主站」（Waterloo Main）或者簡稱窩打老（Waterloo）。呢個係去英格蘭南海岸（south coast）同埋西南部（south-west）嘅火車服務嘅倫敦總站。所有常規列車都係由西南鐵路（South Western Railway，SWR）營運。窩打老主線車站係全國十九個由網絡鐵路（Network Rail）管理嘅車站之一，而車站群係喺倫敦票價區1（London fare zone 1）[59]。

東南火車

編輯

喺主站隔離嘅係窩打老東（Waterloo East）站，係東南主線（South Eastern Main Line）向倫敦方向喺查令十字總站之前嘅最後一個站。窩打老東有四個月台，佢哋係用A至D，呢四個字母而唔係用數字嚟識別唔同嘅月台，咁做係為咗避免同窩打老主站嘅數字識別月台混淆[17]。窩打老東係同主站分開管理同埋定位成唔同嘅品牌。火車去到倫敦東南部、根德郡（Kent）同埋東修適士（East Sussex）嘅部分地區。所有定期服務都係由東南火車公司（SE Trains Limited 或者 Southeastern）營運[60]。

喺2017年8月期間，當工程係喺 Hither Green 同倫敦查令十字站（Charing Cross）、炮台街站（Cannon Street）、黑衣修士站（Blackfriars）、倫敦橋（London Bridge）一帶進行嘅時候，部分東南火車經由獲素（Vauxhall）同埋嘉立咸高街（Clapham High Street）之間嘅前歐洲之星連接線轉到窩打老。

其他乘客服務

編輯

地下鐵

編輯
 
窩打老火車站主大堂嘅地鐵站入口（2024年7月影）

喺窩打老火車站下面，就係窩打老地鐵站（Waterloo tube station）。截至2022年，佢係倫敦地鐵第二繁忙嘅車站，有6872萬用戶。佢有四條路線服務：必嘉老綫（Bakerloo line）、銀禧綫（Jubilee line；又叫做租庇利綫）、北綫（Northern line）同埋窩打老暨城市綫（Waterloo & City Line）。

河船

編輯

倫敦河服務公司（London River Services）由附近嘅倫敦眼碼頭（London Eye Pier；又叫做窩打老千禧碼頭，Waterloo Millennium Pier）同節日碼頭（Festival Pier）營運船隻服務，呢啲船可以去倫敦市區嘅其他地方同埋格林威治[61]。碼頭亦都提供企業同遊船河嘅休閒服務[62]。

參考

編輯
  1. ↑ "Definition of 'Waterloo'". www.collinsdictionary.com. 喺29 May 2020搵到.
  2. ↑ "Definition of Waterloo noun from the Oxford Advanced Learner's Dictionary". www.oxfordlearnersdictionaries.com. 喺29 May 2020搵到.
  3. ↑ "London Waterloo - Facilities, Shops and Parking Information". www.networkrail.co.uk. 喺2024-08-27搵到.
  4. ↑ "The history of London Waterloo station". Network Rail (英國英文). 喺2024-08-28搵到.
  5. ↑ "Royal Windsor Steam Express (London Waterloo - Windsor & Eton Riverside)". RailAdvent (英國英文). 喺2024-08-27搵到.
  6. ↑ "Estimates of station usage". Office of Rail and Road Data Portal. 原先內容歸檔喺Feb 2, 2024.
  7. ↑ "Station facilities for London Waterloo". National Rail Enquiries. 原先內容歸檔喺12 June 2013. 喺29 May 2013搵到.
  8. ↑ "Waterloo Station". Google Maps. 喺30 July 2017搵到.
  9. ↑ "Mayor of London: Waterloo Opportunity Area Planning Framework" (PDF). 26 October 2007. 原著 (PDF)喺27 January 2012歸檔. 喺9 November 2010搵到. Named after the Battle of Waterloo...
  10. ↑ "The Opening of Waterloo Bridge". 喺9 November 2010搵到. "The first Waterloo Bridge, designed by John Rennie, was opened by the Prince Regent amid much pageantry on 18 June 1817, the second anniversary of the battle it commemorated.")
  11. ↑ Jackson 1984, p. 211.
  12. ↑ Jackson 1984, p. 213.
  13. ↑ Jackson 1984, p. 214.
  14. ↑ 14.0 14.1 14.2 14.3 Jackson 1984, p. 215.
  15. ↑ Jackson 1984, p. 216.
  16. ↑ Jackson 1984, p. 224.
  17. ↑ 17.00 17.01 17.02 17.03 17.04 17.05 17.06 17.07 17.08 17.09 17.10 17.11 17.12 17.13 17.14 17.15 17.16 17.17 17.18 17.19 17.20 17.21 17.22 17.23 17.24 17.25 17.26 17.27 17.28 Jackson 1984.
  18. ↑ Biddle 1973.
  19. ↑ 19.0 19.1 19.2 19.3 19.4 Christopher 2015.
  20. ↑ Marsden 1981.
  21. ↑ "Short History of SECR". www.southeasternandchathamrailway.org.uk. 喺2024-08-28搵到.
  22. ↑ Gourvish & Anson 2004.
  23. ↑ "UK's Network Rail looks to offload big city stations to cut debt". Financial Times. 11 March 2016. 原先內容歸檔喺18 September 2017. 喺1 August 2017搵到.
  24. ↑ "From concept to reality". Modern Railways. London: Ian Allan. November 2007. p. 51.
  25. ↑ Christopher (Historic Railway Stations) 2015.
  26. ↑ 26.0 26.1 "Looking at the Eurostar service from Waterloo : 1994 – 2007". The Guardian. 13 November 2007. 原先內容歸檔喺31 July 2017. 喺31 July 2017搵到.
  27. ↑ "Waterloo Station". Ipswich Lettering. 原先內容歸檔喺31 July 2017. 喺31 July 2017搵到.
  28. ↑ "About London & Continental Railways (High Speed 1)". 原著喺13 December 2007歸檔.
  29. ↑ "Public Bodies (Abolition of BRB (Residuary) Limited) Order 2013". Hansard Online. 10 July 2013. 原先內容歸檔喺30 July 2017. 喺11 July 2017搵到.
  30. ↑ "Heathrow Airtrack". BAA. 原著喺6 January 2010歸檔. 喺6 January 2010搵到.
  31. ↑ "London Waterloo's one-time Eurostar platforms to be returned to use". The Guardian. 23 March 2016. 原先內容歸檔喺25 August 2017. 喺24 August 2017搵到.
  32. ↑ Harris, Tom (7 July 2008). "Waterloo Station". 原先內容歸檔喺25 August 2017. 喺24 August 2017搵到.
  33. ↑ Waugh, Paul (10 September 2009). "Delayed: platforms for Waterloo commuters will not arrive until 2014". London Evening Standard. 原著喺17 September 2009歸檔. 喺10 September 2009搵到.
  34. ↑ "10-car SWT hangs in balance". Modern Railways. London. December 2010. p. 52.
  35. ↑ "First significant step in re-opening Waterloo International". South West Trains. 原著喺2 April 2014歸檔.
  36. ↑ "Waterloo Platforms 21 & 22". Southern Electric Group. 原著喺17 April 2015歸檔. 喺1 January 2015搵到.
  37. ↑ "Revealed: the derelict Waterloo platforms which are set to reopen after an £800m revamp". London Evening Standard. 27 July 2016. 原先內容歸檔喺2 August 2017. 喺30 July 2017搵到.
  38. ↑ "Waterloo station to re-open Eurostar platforms after 10-year gap". London Evening Standard. 1 August 2017. 原先內容歸檔喺6 August 2017. 喺18 September 2017搵到.
  39. ↑ "Anger over Waterloo station reopening delays 'mess'". BBC News. 29 August 2017. 原先內容歸檔喺29 August 2017. 喺29 August 2017搵到.
  40. ↑ Kidner, R. W. (1977) [1963]. The South Eastern and Chatham Railway. Tarrant Hinton: The Oakwood Press. p. 19.
  41. ↑ Moody, G. T. (1979) [1957]. Southern Electric 1909–1979 (第Fifth版). Shepperton: Ian Allan Ltd. p. 147. ISBN 0-7110-0924-4.
  42. ↑ Earnshaw, Alan (1991). Trains in Trouble: Vol. 7. Penryn: Atlantic Books. p. 40. ISBN 0-906899-50-8.
  43. ↑ "Report 02/2017 Collision at Plymouth station 3 April 2016" (PDF). Rail Accidents Investigation Branch. para 110. 喺13 February 2016搵到.
  44. ↑ "Train derails outside London Waterloo station". BBC News. 15 August 2017. 原先內容歸檔喺15 August 2017. 喺15 August 2017搵到.
  45. ↑ "Collision near London Waterloo station, 15 August 2017" (PDF). Rail Accident Investigation Branch. 喺20 December 2017搵到.
  46. ↑ "Collision at London Waterloo, 15 August 2017" (PDF). Rail Accident investigation Branch. 19 November 2018. 喺20 November 2018搵到.
  47. ↑ "Waterloo Station ATG Installation". BPR Architects. 原著喺29 September 2013歸檔. over 130 automated ticket gates on the concourse and an additional 27 in the subway below
  48. ↑ "7 things you might not have done at Waterloo Station". Londonist. 7 November 2016. 喺8 May 2019搵到.
  49. ↑ Le Vay & Le Vay 2014.
  50. ↑ "The People's War". BBC. 原先內容歸檔喺7 March 2012. 喺3 May 2010搵到.
  51. ↑ Jones & Newburn 1998.
  52. ↑ Forest 1998.
  53. ↑ "London". British Transport Police. 原先內容歸檔喺29 August 2017. 喺28 August 2017搵到.
  54. ↑ "Waterloo Neighbourhood Policing Team". British Transport Police. 原著喺19 June 2009歸檔.
  55. ↑ "Buses from Waterloo" (PDF). TfL. 31 July 2023. 原著 (PDF)喺2023年9月10號歸檔. 喺31 July 2023搵到.
  56. ↑ "Night buses from Waterloo" (PDF). TfL. 29 April 2023. 原著 (PDF)喺2023年6月5號歸檔. 喺5 May 2023搵到.
  57. ↑ "Leaflet; Waterloo bus interchange, issued by Street Management, (August 2003)". London Transport Museum (英文). 喺24 September 2023搵到.
  58. ↑ "Transport for London Board Meeting – Open session to be held on Wednesday 18 May 2005" (PDF). Transport for London. 18 May 2005. 喺24 September 2023搵到. Construction of the Waterloo Bus Interchange was completed during the summer of 2004
  59. ↑ "Standard Tube Map" (PDF). Transport for London. 原先內容歸檔 (PDF)喺3 January 2016. 喺1 August 2017搵到.
  60. ↑ "London Waterloo East". Southeastern. 原先內容歸檔喺31 July 2017. 喺31 July 2017搵到.
  61. ↑ "London River services" (PDF). Transport for London. 原先內容歸檔 (PDF)喺21 June 2017. 喺2 August 2017搵到.
  62. ↑ "Waterloo Millennium Pier – London Thames". Capital Pleasure Boats. 原先內容歸檔喺2 August 2017. 喺2 August 2017搵到.

文獻

編輯
由「https://zh-yue.wikipedia.org/w/index.php?title=倫敦窩打老火車站&oldid=2196680」收