假借

  提示：呢篇文講嘅唔係借詞。

假借係六書其中一種構成（或者使用）漢字嘅方法，即係將本來有音無字嘅字，借個同音字去用。《說文解字》係噉講嘅：「假借者，本無其字，依聲託事，令長是也。」

古時，漢字本身數目有限，新概念入嚟嘅時候，又或者有啲新嘅嘢想講嘅時候，將新嘅意思畀咗之前嘅個音相同嘅字。久而久之，借過嚟嘅意思就成為個字嘅意思。

概論

睇埋：六書

講假借，即係用同音字代替，本來冇字寫嘅意思係指口語中有啲字詞本身係冇漢字可以寫。

是但搵一種漢語，口語都會有啲詞語係冇相應漢字嘅。冇字寫嘅原因有好多：可能係因為嗰種漢語入面有啲口語詞語唔係源自漢語，例如粵語入面就有好多字詞係來自古百越語，另外中古漢語都有因為佛教傳入而從梵文度借詞嘅詞語，好似婆羅門同南無噉。除此之外，有啲口語字詞可能本來係有字可以寫，但係寫法已經失傳。無論係咩原因，用漢字嘅人見到有啲口語詞冇字可以寫，就會攞一個同音或者近音、但意思無關嘅漢字嚟用。

有學者話，虛詞同代詞等表達抽象概念嘅字詞，成日都會用假借字寫。呢啲概念太過抽象，好難用象形、會意或者形聲等方法嚟造字，所以古人通常都係搵啲啱啱同音嘅漢字嚟寫，好似文言文經常見到嘅虛詞焉或者代詞其，就畀人認為係呢種情況嘅例子。現代粵文都有類似嘅情況，例如佢哋、我哋裏面嗰個哋，同表示土地嗰個地發音一樣，有時粵語使用者寫粵文嘅時候會寫做佢地、我地咁，但係土地同表示複數嘅哋喺意思上其實冇咩關係。

古語使用

• 今
• 長
• 莫 - 本意為「挨晚」，借來表示唔係、唔好嘅意思，例如「莫失莫忘」
• 四 - 本意為「口、鼻呼出之氣」， 借來表示個「亖」字（三之後嘅數字）
• 萬 - 本意為「蠍子」，借來表示個「十個千」

粵語使用

粵語之中，有音，不過，個漢字唔知點寫，一係個字從冇存在過，一係冇人記得（失傳）。所以借個同音字去用寫出嚟。例如借用「而家」、「依家」、「宜加」去講 ji4 gaa1 嘅音，嚟表示「現今」、「呢一刻」、「呢一陣」嘅意思。

寫粵文冇正式嘅官方機構去規範邊個字點寫。假借嘅用字版本可以好多，亦冇話邊個啱，明就算。

香港人喺英治時期嗰陣就由英文借咗好多字詞入粵語。由英文借詞有個問題：如果粵語要由例如日本話嗰度借詞，好多時用粵音嚟讀啲日文漢字就得—

• 日本話口語字詞 ninki 簡單講係指受歡迎程度嘅意思；
• 呢隻口語字詞用漢字寫，通常會寫做人気；
• 用粵語讀人氣呢兩隻漢字— jan4 hei3

但係，英文傳統上唔會攞漢字寫，「讀佢哋嘅漢字嘅粵音」呢種做法行唔通；於是香港人就大舉用假借，口語上借咗隻字詞過嚟，再搵啱音（或者大致上啱音）嘅漢字寫佢出嚟，例子：

Bus → 粵語語音 baa1 si2 → 假借漢字巴士

Hello → 粵語語音 haa1 lou2 → 假借漢字哈佬

Brother → 粵語語音 baa1 daa2 → 假借漢字巴打

Follow → 科勞

Number one → 冧巴溫

論盡

那西

等等。

粵語同其他漢語（譬如係普通話）嘅發音差異頗大，所以假借用字亦都會同其他漢語有分別。假想有某串漢字，佢用粵語發音讀聽落似某隻英文字詞，但同一串漢字如果用普通話（或者客家話、上海話...）讀，出嚟個音通常就唔會再似嗰隻英文字詞。好似係冧巴噉，呢串漢字用普通話讀會係 lín bā，冇咁似英文字 number 一詞。

簡體造字

廿世紀中中國制定簡化漢字嗰陣，亦都有一定程度噉採用假借做法，用筆劃少嘅漢字取替同音而筆劃多嘅漢字，例如指麵粉同相關意思嘅麵、麪等漢字，就簡化成面一字——就係因為面一字讀音同麵、麪相同。

睇埋

• 轉注
• 粵字
• 音譯
• 萬葉假名
• 訓讀：某程度上係假借嘅相反—假借係淨係攞隻漢字嘅讀音而忽略原先意思（取音不取意），訓讀就淨係攞隻漢字嘅意思而忽略原先讀音（取意不取音）。