克洛柯塔

克洛柯塔（Crocotta，又叫Leucrocotta、Korokottai）係希臘、羅馬嘅傳說生物。佢哋係一種棲息喺埃塞俄比亞嘅野獸。

克洛柯塔，出自Bestiary of Anne Walshe

描述

根據老普林尼喺《博物志》嘅記載，克洛柯塔係最快嘅野獸。體形同隻野驢差唔多大，有雄鹿嘅大脾、獅子嘅頸、尾同埋胸，仲有獾嘅頭部。克洛柯塔嘅嘴角喺擘大嗰陣會裂開到耳仔後面，而且佢哋排牙由一嗰彎曲嘅骨頭取代咗。老林普尼仲提到克洛柯塔係由鬣狗同埃塞俄比亞嘅獅子乸生嘅雜交種。

克洛柯塔最大嘅特徵就係佢哋好似鸚鵡咁識模仿人類講嘢同埋牛嘅叫聲。佢哋匿埋喺灌木叢入面，偷聽樵夫講嘢。之後就會模仿樵夫嘅朋友嗌佢哋個名，同佢哋講嘢。吸引到樵夫過嚟之就喺草叢度撲出嚟捕獵佢哋。

西元九世紀嘅君士坦丁堡普世牧首佛提烏一世（Photios I）亦有提過克洛柯塔。佢描述呢種動物好似獅子噉兇猛，馬噉快，同牛一樣噉強壯。而且任何金屬武器都傷唔到佢哋。 羅馬嘅歷史學家卡西烏斯·狄奧（Cassius Dio）仲喺佢嘅著作《羅馬史》第5卷嘅第77章、145行提過，塞維魯王朝嘅塞提米烏斯·塞維魯斯當政時期曾經由印度進貢入羅馬。狄奧話克洛柯塔嘅毛色好似獅子同老虎溝埋一齊，仲生得有啲似狗同埋狐狸。

現實來源

克洛柯塔其實就係斑鬣狗，因為班鬣狗嘅叫聲好似人嘅笑聲，所以俾人誤解佢哋扮人類講嘢。鬣狗（hyena）喺古代有可能其實喺專指條紋鬣狗，克洛柯塔先係班鬣狗。事實上，班鬣狗嘅學名（Crocuta crocuta）亦都可能係嚟自克洛柯塔。

參考

• https://www.gutenberg.org/files/10890/10890-h/10890-h.htm

• https://abookofcreatures.com/2021/02/22/corocotta/