八九民運

八九民主運動又叫做八九民運、八九學運、八九學潮，中國官方稱之為動亂、反革命暴亂、風波，係場中華人民共和國民間運動，為爭取民主，因爲喺1989年發生，所以叫八九民運。

喺人民英雄紀念碑前行過嘅示威者

呢場運動由悼念前中共中央總書記胡耀邦引發，最後中國共產黨派中國人民解放軍去天安門廣場，開實彈屠殺清場而結束，是為六四事件。此後政府大大收緊言論自由，不停追捕異見人士，唔少人逃亡海外。呢次運動，無論對中國國內定係中國同世界嘅關係，乃至成個世界政治發展，都影響深遠。

呢次運動起因，一來國民不滿政治腐敗，二來受當時蘇聯同東歐轉趨民主自由而起。

經過

胡耀邦病死

4月17號，大學生齊集喺天安門廣場，人越來越多。嗰日晏晝，中國政法大學法律系學生約莫五百人，組成第一支遊行隊伍，喺人民大會堂東門舉行悼念活動，啲公安驅散唔到羣眾，嗰晚，廣場上有成千人，除咗政法大學學生之外，重有其他高等學校嘅學生，同埋普通市民增援。第二日凌晨，有學生約莫三千人，由北京大學去天安門，沿途經過清華大學有成千個學生加入。清晨，幾百個學生喺人民大會堂前靜坐，要求全國人大常委接見，同埋向常委提交請願信，提出咗七點要求：

一，重新評價胡耀邦同志嘅是非功過，肯定佢嘅民主、自由、寬鬆、和諧觀點；

二，徹底否定清除精神污染同埋反對資產階級自由化，對蒙受不白之冤嘅知識分子平反；

三，國家領導人同埋家屬年薪，以及一切形式的收入向人民公開，反對貪官污吏；

四，畀民間辦報，解除報禁，實行言論自由；

五，增加教育經費，提高知識分子待遇；

六，取消北京市政府制定嘅關於遊行示威「十條」規定；

七，要求政府領導人就政府失誤向全國人民作出公開檢討，並通過民主形式對部份領導實行改選。

人民日報四二六社論

《人民日報》喺1989年4月26號，發表咗有名嘅《必須旗幟鮮明地反對動亂》，呢篇文章喺4月25號響北京電視台新聞報導入面讀出來，稱為四二六社論。

戈爾巴喬夫訪華

喺5月15號，當時蘇聯共產黨中央委員會總書記戈爾巴喬夫訪問北京。5月17號，戈爾巴喬夫仲回應當時北京局勢話，「哩個唔係危機，而係認真嘅轉折點。」認為社會主義國家改革嘅進程有時係好痛苦嘅。

北京百萬人大遊行

隨住越來越多嘅絕食學生暈倒，社會上各階層嘅群眾對於政府嘅不滿愈發激烈。5月16號至5月19號，北京市數百萬人走上街頭參與示威，其中包括官方傳播機構、國家科研單位同國家中央機關人員。北京市多間醫院嘅醫生同護士身著白衫參與遊行並救助絕食學生，眾多工人搭住重型汽車甚至挖掘機前往長安街遊行，多個民主黨派嘅黨員亦上街，而中央電視台嘅職員就拉起要求時任廣播電視部長辭職嘅橫額遊街。

天安門廣場

廣場隔離嘅中國國家博物館工作人員喺天棚旗杆升起帶有象徵意義嘅V字型手勢旗，表達支持呢場運動。

趙紫陽揸大聲公

時任中共總書記趙紫陽叫班學生返屋企，叫佢哋應該健康咁生存落去，但佢哋唔肯走，坐晒喺度。今次亦都係趙紫陽最後一次公開露面。

戒嚴令

總書記趙紫陽叫唔走班學生，所以輪到總理李鵬講話。李鵬話今次係對國家對人民反革命事件，重有外面幕後黑手支持，決定戒嚴，叫所有人即刻返屋企，留嚮街外面嘅，唔保證人身安全。

六四事件

内文：六四事件

中國大陸各地嘅情況

當時嘅學生運動起源於北京，通過新聞媒體嘅傳播，隨後迅速發展到中國各地。喺中國各地都有學生同其他行業嘅人民上街遊行示威，支持喺北京嘅學生。因為中共中央無一致嘅睇法，各地方政府同單位喺當時對民運嘅態度都唔同。有縱容，有支持，有保持沉默。喺其他各地嘅學生運動，隨著六四事件嘅發生，而自行結束。無發生多少流血事件。

當時嘅中國大陸新聞媒體都得到咗一次少有嘅開放同自由，佢哋嘅報道非常熱烈。好多報紙雜誌對於學生運動嘅報道都係非常積極，支持佢哋嘅運動。好多新聞媒體嘅工作人員甚至加入咗遊行隊伍。但係後來隨著事件嘅惡化，新聞媒體嘅報道從支持，逐漸轉向同中國共產黨嘅口徑一致。還有一啲報紙因為言論太過激烈，而被關閉。

上海

上海嘅《世界經濟導報》創辦人同主編係70幾歲嘅欽本立。呢份報紙倡導民主思想。胡耀邦死後嘅第四日（4月19號），《導報》嘅一班編輯舉辦咗一個研討會。欽本立認為研討會內容應該帶有實質性嘅嘢而唔係一般既哀悼之詞。呢下得到與會者認同。會上戴晴講到中國共產黨七十年來嘅歷史同幾位總書記嘅命運。佢講到黨嘅總書記都冇好下場，因為都係「非程序權力更迭」。

4月20號，上海市委宣傳部得知，《世界經濟導報》將開闢專欄悼念胡耀邦。宣傳部長陳至立隨即上報市委書記江澤民。由於內容敏感，曾慶紅同欽本立討論第439期《導報》問題時，要欽本立刪節五百字，主要係嚴家祺、戴晴等人嘅發言。當江澤民同汪道涵硬壓軟勸要欽本立同意刪節時，卻發現十幾萬份報紙都已印好咗，兼且四百份已批發畀個體報攤。此外，重有相同數量報紙直接送咗去北京，最後至追回兩萬份，但已經造成影響。4月26號《人民日報》發表社論《必須旗幟鮮明地反對動亂》後，江澤民召開嘅市委書記緊急會議。同日喺有一萬四千名黨員參加嘅大型集會上江澤民宣佈停止欽本立嘅領導職務，重決定整頓《導報》。4月27號，江澤民派劉吉、陳至立負責既「上海市委整頓領導小組」進駐《導報》。撤除具有獨立意識嘅欽本立《世界經濟導報》總編職務嘅活動。

上海亦有好多學生參加罷課。

南京

南京好多高校學生都到南京市中心鼓樓廣場，新街口廣場進行遊行。喺鼓樓廣場嘅旗桿上，掛上咗一面白旗，上書一個祭。南京師範大學附屬中學嘅校長喺六月二號，於全校大會上發表咗畀北京嘅公開信，支持學生嘅民主運動。該校學生都有去鼓樓廣場參加咗遊行。同時，有啲高校嘅學生為咗讓工人加入罷工，有段時間會到主要交通接口阻攔交通。喺呢段時間，由於學生運動，南京嘅公共汽車服務不得不中斷。對南京市民交通帶來不便。

廣州

五月四號下晝，中山大學學子計劃嘅學潮開始，使廣州幾乎所有高校學生都行動，十幾萬人上街遊行、集會、靜坐、絕食、退黨、退團。夜晚七點半，以中山大學、華南理工大學、暨南大學、華南師範大學為主嘅人群向市中心遊行，遊行人數達5000人，演講、呼口號、向政府提交請願書。到5號半夜2點幾因落大雨，遊行示威結束，公安調動廿幾架巴士送學生返學校。而廣東省各大小城市都有唔同規模嘅學運同民運。學運後廣東省主要黨政領導人被「明升暗降」或「因工作需要」被調職，葉選平被調任虛職嘅全國政協副主席。

其他地區

香港

香港有好多市民走上街頭，部份人進行遊行。並且喺維多利亞公園舉行咗燭光晚會。當時嘅香港總督都支持民運。1989年5月27號，香港歌星、電視同電影界嘅明星喺跑馬地召開咗聲援學生嘅《民主歌聲獻中華》集會，有30萬人參加。鄧麗君演唱咗我的家在山的那一邊，侯德健 龍的傳人 張明敏 我的中國心。

喺中央軍事委員會召集軍隊武力鎮壓學生嘅消息傳出之後，大量市民湧往當時位於跑馬地嘅新華社香港分社，要求會見當時嘅社長許家屯，而新華社香港分社就設立咗靈堂悼念於武力鎮壓中死咗嘅學生。

六月五號清晨，中銀集團所屬嘅十三間分行門口排起咗長龍，發生咗中銀集團成立以來最大嘅一次客戶擠提，當天提出款項五十億港元，創歷史最高紀錄。呢次擠提令中銀集團元氣大傷，而呢次擠提亦係自1965年廣東信託銀行倒閉及恆生銀行擠提事件之後最嚴重嘅擠提事件。

澳門

六月五號，喺中國銀行澳門分行同佢屬下嘅十六間支行門口，一早就排起長龍，發生咗自1950年成立以來第一次客戶擠提現象，當日提出款項3.3億港元。

臺灣

台灣嘅人民都有遊行，支持大陸學生。喺六四前夕，台灣歌星因此創作咗一首歌 歷史的傷口。台灣政府作為支援大陸民主運動嘅特別措施，公佈咗四項措施，其中有：向放棄中國大陸護照嘅外地嘅中國大陸留學生同學者發放中華民國護照；向呢啲留學生同學者提供學費同生活補助。

睇埋

• 對六四屠殺嘅否認同讚賞

拎

• 六四檔案