公地悲劇
公地悲劇（粵拼：gung1 dei6 bei1 kek6；英文：Tragedy of the commons），或者叫公用品悲劇，係一種社會現象：家吓想像一個由多個人共同使用嘅天然資源，例如係石油或者森林呀噉，如果佢哋個個都有節制噉用個資源嘅話，個資源可以好襟用，但現實往往係每個人都係自身利益行先，個個爭住開採資源，最後搞到資源耗盡，大家齊齊冇得用，呢種噉嘅現象就係所謂嘅公地悲劇。
基本定義
編輯| 「 | 」 |
公地悲劇喺經濟學等領域上係一個相當受關注嘅議題，有唔少専家都嘗試用種嘅理論嚟分析呢個現象同埋研究點樣解決呢個問題。
博弈分析
編輯| B 君揀合作 | B 君揀背叛 | |
|---|---|---|
| A 君揀合作 | 3, 3 | 0, 5 |
| A 君揀背叛 | 5, 0 | 1, 1 |
| B 君揀合作 | B 君揀背叛 | |
|---|---|---|
| A 君揀合作 | 5, 5 | 0, 3 |
| A 君揀背叛 | 3, 0 | 0, 0 |
有經濟學家就試過噉做：佢哋用一個簡單嘅對稱博弈模型嚟模擬個世界，假想喺使用資源嗰陣，一個博弈者有
- 合作（cooperate；乖乖地跟規矩噉用個資源）同
- 背叛（defect；過度開採）
呢兩個選擇，如果雙方都揀合作，報償會係（3, 3），而如果一方揀合作另一方揀背叛，合作方嘅報償係 0 而背叛方嘅報償係 5，而如果大家一齊揀背叛，報償會係（1, 1）；喺呢個情況下，長遠嚟講，雙方都有誘因趁對手揀合作嗰陣揀背叛嚟到令自己利益最大化（而且喺呢個情況下，大家齊齊揀背叛係場博弈嘅唯一拿殊均衡點）；佢哋做電腦模型，模擬一個有兩種博弈者－合作者同背叛者－嘅世界，顧名思義，合作者傾向合作，而背叛者傾向背叛；佢哋嘅模擬發現，喺呢個情況下，隨住時間過去，合作者嘅所得會明顯少過背叛者嘅，於是合作者就會慢慢消失－一係變成背叛者，一係因為所得太少而被淘汰－形成一個以背叛者為主嘅世界，大家齊齊過度開採資源，造成公地悲劇；跟住落嚟，班科學家唔假想人類會唔自私，而係郁手改變場博弈嘅報償規則，令到雙方合作嘅報償變成（5, 5），一齊背叛嘅報償變成（0, 0），而如果一方合作另一方背叛，合作方報償係 0 而背叛方報償係得 3 咁多（留意拿殊均衡點變成大家一齊揀合作）；佢哋跟住再進行模擬，發現喺呢個情況下，就算一開始場博弈當中多數博弈者都係背叛者，合作者會慢慢因為佢哋嘅報償高而變成主流類型－背叛者所得唔夠，焗住一係改變策略、一係被淘汰[3]。
基於呢個研究，一班美國佐治亞州嘅科學家向當地政府提議咗一啲系統嚟令到佐治亞州嘅水資源使用生態變成唔會造成公地悲劇嘅樣，例如係運用一個信譽系統嚟獎勵合作者（用政府干預令揀合作嘅報償上升）同懲罰背叛者（用政府干預令揀背叛嘅報償下降），令到啲人有誘因合作，最後仲成功噉解決佐治亞州水資源嘅公地悲劇問題[4]。
睇埋
編輯引咗
編輯- ↑ Hardin, G. (1968). The tragedy of the commons. Science, 162(3859), 1243-1248.
- ↑ Milinski, M., Semmann, D., & Krambeck, H. J. (2002). Reputation helps solve the 'tragedy of the commons'. Nature, 415(6870), 424.
- ↑ Weitz, J. S., Eksin, C., Paarporn, K., Brown, S. P., & Ratcliff, W. C. (2016). An oscillating tragedy of the commons in replicator dynamics with game-environment feedback. Proceedings of the National Academy of Sciences, 113(47), E7518-E7525.
- ↑ Game theory shows how tragedies of the commons might be averted.
拎
編輯- （英文） The Digital Library of the Commons
- （英文） The Myth of the Tragedy of the Commons by Ian Angus