《公開試當真》（英文：Once Upon a Time in HKDSE）係2024年香港一套紀錄片，屬YouTube頻道試當真第一套擺上大銀幕嘅電影，由許賢、滕毅康、林溢欣主演，梁奕豪執導。紀錄片用報考2023年香港中學文憑考試做題材。
《公開試當真》其中一位主角滕毅康，自2024年5月嘅優先場開始一路缺席宣傳活動同首映禮，到7月4號電影正式上畫嗰陣，許賢首度解釋，話滕毅康「有啲私人嘅issue要處理咗先」，但未有進一步解釋。8月19號，傳媒報道滕毅康喺觀塘裁判法院承認一項盜竊罪，被判罰款3千蚊港紙。試當真被質疑為免影響票房而刻意隱瞞主角惹咗官非。
