六安
想搵第二個意思嘅話，請睇六安 (搞清楚)。31°44′43.7″N 116°30′16.9″E / 31.745472°N 116.504694°E
| 六安 | |
|---|---|
| 六安市 | |
| 花名：皖西 | |
.png) 六安位置圖 | |
| 國 |  中華人民共和國 |
| 省 | 安徽 |
| 地級政區 | 地級市 |
| 轄下一級政區 | 2區、5縣 |
| 轄下二級政區 | 156個鄉鎮、8條街道[1] |
| 設市年 | 1978年 |
| 市長 | 畢小彬 |
| 市委書記 | 孫雲飛 |
| 政府駐地 | 金安區 |
| 總面積 | 17976[1] km² |
| 城市化率(2012) | 38.9[2]% |
| 人口 | |
| 總人口(2012) | 561.5萬[2] |
| 戶籍人口(2012) | 710.3萬[2] |
| 人口密度 | 309.4人/km² |
| 民族 | 漢族 |
| 官方語言 | 普通話 |
| 本地語言 | 江淮官話、中原官話 |
| 註 | 人口密度據中文版 |
| 經濟 | |
| GDP(2012) | 918.2億人民幣[2] |
| 人均GDP | 16248元人民幣[2] |
| 時間 | |
| 時區 | 中國時區（UTC+8） |
| 識別信息 | |
| 電話區號 | +86 (0)564 |
| 郵政編碼 | 237000 |
| 車牌 | 皖N |
| 政區代碼 | 341500 |
| 網站： 六安市府 | |
六安（粵拼：luk6 on1；普通話拼音：Lù'ān）喺安徽西部，家下係中華人民共和國嘅一個地級市，叫
地理同歷史
編輯方位
編輯呢個地方喺西部、大別山北麓，俗稱「皖西」[1]。東面係合肥，東北面係淮南，北面係阜陽，南面係安慶，西面分別有湖北嘅黃岡同埋河南嘅信陽。
地名
編輯「六」字喺現代統一嘅普通話標準音係liù，不過喺當地（淮語）同淮語地區入邊，「六」字嘅地名都係讀lù，所以六安嘅外文拼法唔係「Liu'an」，而係「Lu'an」，類似嘅例子重有南京嘅六合，係同喺粵語度嘅六/陸同音嘅情況一樣。「六」字屬入聲字，作爲係明清官話標準音嘅老派南京話，讀法就係跟著「陸」lu5。
不過《現代漢語詞典》第六版就將liù確立成「六」嘅唯一讀法，[3] 同當地習慣唔一致[4]，2006年安徽省人民政府係批准過保留當地嘅讀法。而中華人民共和國民政部出版嘅《中華人民共和國行政區划簡冊》就採用咗lù嘅讀音。中國中央電視台同其他廣播電視台播音喺依家係都要跟著《現代漢語詞典》去讀，而安徽廣播電視台、六安廣播電視台嘅播音仲保持著當地講法[5][6]。
史同淵源
編輯喺古時，六安係姓皋陶部族聚居同活動嘅地方[7]，到咗西周，當地係形成咗英、六、蓼、群舒諸方國。入春秋後，據《春秋·文公五年》載喺公元前622年俾楚國楚穆王滅咗。而《左傳》有補充話，噉係因為六國背叛楚國而親近東夷嘅結果。同一年楚穆王仲吞併咗蓼國（依家位置河南固始縣）。魯國大夫臧文仲喺兩國俾吞併後，有感慨過皋陶同庭堅（高陽氏嘅後代，八愷之一）後裔嘅消亡[8]。到咗漢武帝時再喺當地設立返六安嘅建制，就咁繼承咗六國嘅原名同音韻嘅歷史[9]。
「六安」嘅誕生
編輯項羽喺公元前206年封咗六地人英（黥）布做九江王，設都喺六（依家六安市北嘅西古城）。到漢高祖三年（公元前204年）英布叛楚投漢。西漢嘅時候搞郡國制，呢一帶分拆成衡山國同淮南國，而淮南國就仲係喺六度設都。漢武帝元狩二年（公元前121年），淮南王安、衡山王賜起事失敗後自盡，同年武帝奪取咗衡山國入邊嘅六縣、安風、安丰等縣首字，別衡山國做六安國，兼有「六地平安，永不反叛」嘅意思，就開始有咗六安呢個名[10]。
地區中心嘅變化
編輯城池
編輯古六國嘅城址，喺依家嘅城東鄉三女墩，距縣城9公里，舊志係記名作「東都城」。漢淮南王英布嘅故六城，就喺依家嘅城北鄉城北村，距縣城6公里，舊志係記名作「白沙城」，現代叫法係「西古城」。漢六安國六縣嘅城址，就喺依家嘅縣城以西9公里嘅裴家灘，舊志係記名作「西古城」。到咗盛唐縣定治嘅騶虞城，就喺依家嘅六安城西門外一帶，舊志係記名作「郭外古城」，呢個古城（牆身）後邊俾大水浸到爛咗，到咗明洪武年間，重新改造過後再加返啲磚，到正德年間經咗整建，延續咗一個較完整嘅六安城格局[11]。
管治機構
編輯喺辛亥革命開始有咗六安軍政分府，喺民國2年（1913）到民國16年（1927）北洋政府時設立咗六安縣公署，跟著一路到民國37年（1948）國民政府時都係六安縣政府管治，到中共解放軍接管後就設置咗縣同市兩級嘅民主政府[11]。
經濟嘅發展
編輯地區嘅商業活動
編輯喺公元前241年，喺六安嘅壽春經已係繁華嘅大邑。到咗隋開皇元年（581年），金寨開順都係成為咗商業大鎮。喺宋嘉祐六年（1061年），壽州場、霍山場、開順場統計嘅年購茶量佔據咗宋十三個茶場銷茶量嘅21.8%。到清代後期喺正陽關係商賈雲集，就光緒年間統計有一百五十多個較大嘅商號，仲開始出現瑞東公司、中南煙草公司等外資、合資商行。時正陽關日均有30多條船隻泊港，有咗「皖北秦淮」嘅名號。而六安縣入邊嘅蘇家埠、毛坦廠，金寨縣流波，霍邱縣河口、葉集，舒城縣桃溪、梅河，壽縣迎河、隱賢，霍山縣諸佛庵、漫水河等集鎮，都係成為咗農市交易嘅集散中心[10]。
喺清末時，當地嘅商業係由外來嘅商幫主導，當中係以票號、錢莊有最強嘅資本力量，跟著就係綢布、茶葉。各商幫喺六安城關同蘇家埠仲設有自己嘅會館，方便各自嘅活動。而當地嘅商人就淨係有做糧行、麻行同竹、木行等中間行業，仲會做唔少啲細生意，好似係鞋錐、絨花、腰帶、紗網、發簪、頭油、刷之類。喺清光緒二十一年（公元1895年）西洋貨開始進入六安當地，最早入市嘅有「洋布」（即市布），跟著係「洋油」（火水）、「洋煙」（卷煙）、「洋皂」（番梘）、「洋火」（火柴），統稱「五洋」。民國元年（公元1912年）火水開始喺六安發售，時一桶（28市斤）賣價係1個1（銀元），英商亞細亞、美商美孚兩家公司都有喺六安城關開舖。卷煙係遲一兩年跟著打入六安嘅市場。
民國27年（1938年），因為中日戰爭嘅關係，六安城關度建起咗消費合作社同企業公司。呢陣時界首、合肥、舒城同河南等地商人湧入咗六安，將由淪陷區同戰區買入嘅食鹽、藥品、布匹等物資，車到去六安散貨。到民國36年（1947年），當地嘅商人都開始做「五洋」生意，仲有咗當地人做雜貨、百貨、綢布、藥品、文具、首飾生意，仲有埋人開酒樓、茶館等。到1949年2月中共政府統計嘅時候，當地係有商戶七千幾，做商業嘅就有八千幾人。
喺1956年中共政府對私營工商業開搞社會主義改造，當地嘅私營商業全部俾納入咗改造範圍，直至1965年當地統計數字係有三成倒嘅小商販接受咗登記管理，仲有4.27％嘅商戶係放棄咗生意去返耕田。喺1957年到1959年啲私人商戶係繼續減少，經歷多輪運動嘅打擊，去到1977年當地在冊登記係剩低商販兩百多啲。到1978年中共十一屆三中全會後，跟著中央政策嘅轉變當地嘅商業重新恢復同發展起身，到1986年尾在冊嘅商販係過萬。
舊遺跡
編輯由於當地對歷史文化嘅保護不足，有唔少珍貴嘅遺跡受到破壞，依家嘅六安市區入邊就有魁星閣、六安大戲院等建築經已經清拆咗，大減當地嘅歷史底蘊。另外被譽為「六安古八景」之一嘅龍穴山，由於進駐咗石料廠搞採石，搞到剩低咗半座龍穴山，係好難再修復返原貌[12]。
皋陶墓
編輯被孔子讚譽係上古四聖之一嘅皋陶，墓地據《史記·集解》記載：裴駰按《皇覽》曰「皋陶冢在廬江六縣」。清乾隆《六安州志·古跡》記載：「州東十五里。六故楚地，楚人稱『公琴』」。水經注就寫咗話：「公猶君也，琴猶陵也」。到明崇禎八年，州守何鳴鳳開始豎立返個碑。據近現代嘅發掘，個墓葬依家喺中心城東7.5公里、六安至合肥公路北側15米處，而喺東北35米處係皋陶祠舊址。墓前有清同治年（1869年）安徽布政使吳坤修手書嘅「古皋陶墓」碑刻，主體係圓形土冢，墓頂上有個黃連木，形同華蓋。喺1981年當局評定墓葬係六安縣重點文物保護單位，同年仲被上海辭書出版社收入咗《中國名勝大辭典》[10]。
六安城嘅城址經歷咗頻繁嘅變遷，屋宇樓閣毀建交替，建構咗紛繁復雜嘅城坊格局，俗稱就係「九拐十八巷」。其中嘅九拐係：等駕拐、魚市拐、茶葉拐、倉房拐、書院拐、潘家拐、上拐頭、田家拐、大井拐。按照古樓大街彎彎曲曲、寬寬窄窄嘅路線，依次經過咗設有官家倉儲嘅倉房拐，專賣茶葉嘅茶葉拐，買賣魚穫嘅魚市拐，跨過黃大街喺老城南門入城口嘅草市街口，就到咗乾隆皇帝當年落江南時、啲文武大員等候接駕嘅等駕拐，坊間又叫做迎駕拐。順著「九拐」行基本上就可以行勻成個六安老城。
所謂十八巷，係為咗對應拐數九嘅一個虛數，實際計返就遠唔止十八巷：頭道巷、二道巷、三道巷、書版巷、塘子巷、扎筆巷、和平巷、棚場巷、龍須巷、觀音寺巷、關帝廟巷、萬壽寺巷、城隍廟巷、九拐巷、牛角巷、翠花巷、鹽店巷、霍老婆巷。
呢啲街巷由老城嘅北端開始，沿古樓大街向南伸展，似點點珠玉咁，散落古城嘅大街小巷入邊，穿針引線連點成片。隨著現代城區嘅清拆同改造，九拐十八巷嘅格局消失咁，有啲地頭就變成咗半邊拐，有啲巷都係剩低咗半邊。
節慶紅白事嘅「十大海」宴席
編輯婚喪嫁娶同壽誕節日、人情往來嘅設宴，最丰盛嘅宴席係叫「十大海」。跟著仲有分「雞頭」、「粉絲」同「海參」幾種，係以第一碗上嘅餸名而定。最上等嘅係「八碗八碟兩道點」，菜餸係話要捧盤一碗一碗咁端過去，而且頭几碗餸嘅次序唔變得，尤其係第三碗，一定要上圓子（？）。一般喜宴嘅標准係十碗茶。喪宴就係「八大海」，同喜宴比係少咗圓子同蝦米湯兩碗，廚房整嘅時候仲唔放得豉油等紅色嘅佐料，要將肉都燒成白色以示哀悼。
嘆茶
編輯當地城鎮嘅人舊時有品茶嘅習慣，晨早會係寧願唔飽肚都要飲茶，就會清早就上茶館，嘆茶吹水殺時間。當地人係將呢樣習慣同晚黑沖涼相比，有「早上皮包水（嘆茶），晚上水包皮（沖涼）」嘅講法。1949年之前縣城集鎮入邊就係有好多嘅茶館，大家都習慣喺度交友會客、傾計做生意；啲老人趁完墟，都中意去茶館度唞下。舊底當地啲茶館仲可分成三等，第一等係餐館兼茶館，如四海升平樓等，除供應一般蒸炸糕點，仲有當地嘅燙面、油酥等高級茶點，多係達官顯貴入去；第二等係有字號嘅茶館，各有自己特色嘅蒸炸點心，如興武園出名係開花獅子頭，得月樓同悅來園就係出名雞絲包，齊云樓出名就係燙面餃子，第一泉同朝陽亭出名燒賣，多係中層市民同商人幫襯；最尾嘅就係冇字號嘅茶館同茶棚，得蒸或炸嘅點心，嘆茶唔使荷包出好多，係受平民大眾歡迎。1950年代後，茶館逐漸絕跡，不過一般酒店、浴池仲有茶水供應。
攷
編輯- ↑ 1.0 1.1 1.2 〈走進六安：概述篇〉。原著喺2015年4月27號歸檔。喺2014年5月31號搵到。
- ↑ 2.0 2.1 2.2 2.3 2.4 〈六安市2012年國民經濟和社會發展統計公報〉。原著喺2016年4月12號歸檔。喺2014年5月31號搵到。
- ↑ 〈"六安"地名的讀音〉。《中國社會語言學研究所》。2017-03-08。原先內容歸檔喺2020-02-19。喺2017-03-08搵到。
- ↑ 〈詞典取消六安"lu"讀法改讀"liu" 網友抗議〉。《新安晚報》。2013-08-26。原先內容歸檔喺2020-12-02。喺2013-08-26搵到。
- ↑ 〈"六安"讀音再起爭議，安徽媒體發聲："六"在這里應讀lù〉。《澎湃新聞》。2021-05-18。喺2021-05-18搵到。
- ↑ 〈關於六安市的地名拼音，民政部區划地名司給出了權威說法〉。《澎湃新聞》。2021-05-20。喺2021-05-20搵到。
- ↑ 《史記·索隱》載：「六安國六安，咎後偃姓所封國」
- ↑ 楊伯峻：《春秋左傳注·文公五年》，中華書局1990年5月第2版，第539頁。
- ↑ “六安”到底怎么读，本来不该有争议 互聯網檔案館嘅歸檔，歸檔日期2021年5月21號，. 吴睿鸫（公务员） 2021-05-21 新京报
- ↑ 10.0 10.1 10.2 六安地区志 1996年 中共六安地委、六安行政公署、《六安地区志》编委会
- ↑ 11.0 11.1 11.2 11.3 六安县志 1992 中共六安县委、六安县人民政府、六安县志编纂委员会
- ↑ 罗俊荣委员代表民革六安市委的发言：关于加快发展城区及近郊历史文化旅游的建议 2020-05-28 中国人民政治协商会议安徽省六安市委员会
- ↑ 六安人不得不知的“秘密”！那些老六安人的记忆你知道几个？ 互聯網檔案館嘅歸檔，歸檔日期2021年5月24號，. 2020-08-30 裕见皋城 網易