人口

人口（粵拼：jan4 hau2）一般來講係特定一國或一笪地方嘅人數。呢個定義，亦可引伸到生物學上，即係一笪地方，某種生物有幾多。人口嘅多少由好多因素決定，比如死亡率、出生率、婚姻率、離婚率，就連宗族對生育嘅干涉都會影響人口。研究人口嘅有社會學、經濟學、地理學，研究嘅內容好多，比如話人口流動嘅成因。

人口研究上係比較依靠概率，即係話人口研究資料係要取大樣本，然後先至能夠搵出個中嘅大勢。所以有時人口嘅研究成果唔多合個人層面上嘅具體情況。就攞人口流動講，影響人口流動嘅因素係好多樣嘅，對流動嘅呢班人中嘅是但一個來講，佢之所以流動嘅原因可能係獨一無二嘅，當各種因素集合、將呢班人作爲群體研究時，人口流動嘅成因就會變得好模糊。雖然係噉，人口學嘅研究重係要嘅，比如人口流動對市場營銷就好緊要，尤其啲街舖、商場呢類要靠人流搵食嘅行檔，研究分析下人口流動，有利於佢確保到啲潛在顧客。

統計來講，有時唔係用地方來計，而係用某啲共同特徵來計數。統計幾多人嘅調查，叫人口調查、人口統計或者人口普查，對一國嚟講，人口普查往往幾年一次，以固定期限方便研究數據。隨咗點人數之外，亦統計埋人唔同狀況，好似收入、住屋、年紀、屋企等等。人口調查好緊要，佢直接同政策相關，等政府得出數字同趨勢，方便施政規劃。商業機構亦可以從中準備部署。