再見媽咪

再見媽咪（英文：Goodbye Mammie）係1986年上映嘅港產片，由林德祿執導，洪金寶監製，葉德嫻、任達華、黃宇文、樊少皇、洪天祥、張堅庭等主演。

劇情簡介編輯

單身媽媽Lisa（葉德嫻飾）係時裝公司嘅首席設計師，同10歲嘅仔安仔（黃宇文飾）相依為命。不幸嘅係，Lisa患咗血癌，只得返六個月命。

安仔自細依賴媽媽，性格柔弱，Lisa擔心自己死咗之後安仔唔能夠獨立生活。一次，服裝公司到兒童院請班孤兒協助拍攝兒童服裝造型相，Lisa決定將安仔送入兒童院住三個禮拜，希望安仔能夠學識自己照顧自己，同時亦想利用呢段時間安心養病。

安仔到咗兒童院之後，由最初俾人蝦，到逐漸融入一齊，好快就適應兒童院嘅生活，但係安仔經常都好掛住媽媽。Lisa亦十分都掛住個仔，佢透過兒童院嘅張哥哥，了解安仔嘅情況，同時決定畀安仔繼續留喺兒童院，希望喺自己臨死之前，能夠見到安仔獨立、堅強噉生活。

張哥哥呃安仔話，媽媽因為飛機失事死咗，安仔非常難過，班院友都一齊安慰佢，結果勾起咗大家對媽媽嘅懷念，大家都喊埋一份。

Lisa嘅同事Tom到兒童院教班細路學影相，其實係Lisa係想佢影啲安仔嘅相畀佢睇。見到安仔嘅相，Lisa非常興奮。

暑假完咗，班細路開始新嘅學期。喺返學途中，班細路幫安仔偷走出去服裝公司，搵Tom叔叔攞返大家嘅相。安仔到咗服裝公司，從佢哋同事嘅口中知道，原來佢媽媽重未死。Lisa匿埋，唔想見到安仔，安仔就由公司一直搵到屋企，Lisa控制唔到自己嘅情緒，終於同安仔見面。

安仔知道咗媽媽唔想見佢嘅原因，用自己勇敢嘅一面鼓勵媽媽。第二日，安仔返到兒童院，開始新嘅生活。

Lisa終於身體轉差就快死，安仔知道之後趕去醫院見媽媽嘅最後一面。安仔向媽媽講佢喺兒童院裏面發生嘅故事，Lisa安詳噉走咗。Lisa雖然未能夠見到安仔長大成人嘅嗰一日，但佢嘅苦心並冇白費，因為安仔已經能夠獨立、堅強噉生活。