冰室
冰室，廣州話用以稱呼冷飲舖頭。係南粵一種主要售賣冷飲、雪糕及沙冰等凍嘢飲嘅食肆，喺省城起源發跡。傳到去香港後，受英式下午茶文化影響，加上啲客仔都係勞碌工友，就演變出賣熱飲同三文治、多士呢一類小食，出現埋奶茶同菠蘿油。
各地情況
編輯廣州
編輯廣州冰室係隨著西餐業發展而起，初頭係餐室附設嘅，因廣州氣候炎熱，多人飲水，後尾有咗獨立經營冰室嘅點檔出現。1934年據計市內共有21間冰室，到二戰後廣州冰室達到80間打上。舊日秋冬淡季陣，冰室都會兼營他業，如皇上皇冰室賣臘味，長江、喜臨門冰室就轉賣北方包點，其他仲有轉賣小食糯米飯、狗肉等[1]。
廣州舊底號稱有四大冰室，包括順記冰室、美利權冰室、陽光冰室、皇上皇冰室（重有的彩冰室同埋向群冰室[2]）。到今時今日，剩低順記冰室重係獨立經營（美利權冰室畀咗北京路嘅太平館西餐廳來做）[3]。陽光冰室喺1962年後開始兼營開煲狗肉，未結業前屢獲佳績，別具特色[4]。
1980年以後，食品製造業新型嘅大量冷凍食品，湧入廣州冷飲市場，衝擊冰室經營，冰室陸續轉做其他食品，到1990年大部分冰室轉為賣糖水、牛奶、椰汁、蜂蜜、龜苓膏等甜品，或賣糕餅、煎餃、明火例湯、臘味糯米飯、速食飯盒、原盅燉品、雞蛋豬腳薑、小點、麵包、皮蛋瘦肉粥、蘿蔔糕、牛腩粉，到夏天少數會賣返埋雪糕、凍飲。
香港
編輯香港嘅冰室喺1950年代開始興起，舊時都有好多冰室，但隨住1970到80年代賣埋粉麵飯嘅茶餐廳興起，冰室已經慢慢式微，正宗嘅得返三十幾間左右。另外自2010年代中後期開始，香港有唔少新開嘅食肆打住「冰室」個名去經營，但實質上都係兼賣粉麵飯嘅茶餐廳，譬如華星冰室、龍門冰室呢啲連鎖食肆。
睇埋
編輯參考
編輯- ↑ 廣州市志·商業卷·飲食志
- ↑ 飲啖茶食個包 (2016-07-28)。〈再說吃冰：廣州四大冰室的傳奇〉。
- ↑ 〈冰室，老廣的夏日印記〉。廣州青年報。2016-05-26。
- ↑ 〈陽光冰室傳奇之狗肉名家〉。廣州老字型大小傳奇。原著喺2018年12月10號歸檔。