前進黨

前進黨係以色列一個中間派政黨，2005年11月由阿里爾沙龍創立，係2006年到2009年期間以色列嘅執政黨。

前進黨

歷史

出身以色列右翼政黨利庫德嘅沙龍，喺2001年做咗總理之後，開始對約旦河西岸同加沙行溫和政策，但係佢嘅政策喺黨入面引起好大爭議，沙龍有感自己喺黨入面嘅位置已經唔多穩陣，於是佢喺2005年宣佈退出利庫德，成立前進黨，兼且解散議會，舉行大選。

好景不常，沙龍喺2006年1月因為中風而昏迷，耶路撒冷前市長奧默特接手前進黨嘅運作，最後前進黨贏咗29席，成為第一大黨。

2009年，奧默特宣佈唔再連任，前進黨選出利夫尼做代表，最後前進黨攞到28席，仍然係議會嘅單一最大黨，不過當時嘅總統佩雷斯將組閣權交畀第二大黨利庫德，前進黨亦唔肯同利庫德合組政府，結果前進黨下野。

2012年，前進黨出現派系分裂，當時嘅黨嘅領袖利夫尼喺黨主席選舉輸咗畀對手莫法斯，利夫尼同佢嘅擁躉退出咗前進黨，成立運動黨。喺2013年大選，前進黨得票大跌，結果得返2席，低空掠過選舉門檻（2％）。

2015年選舉前，前進黨試過同錫安主義聯盟傾過合組名單嘅事，但後嚟傾唔埋欄，莫法斯亦都退出政壇。跟著前進黨短暫交畀哈森打理，但係哈森冇幾耐就退黨，加入咗庫拉努。

最後前進黨喺2015年收檔。