加拿大旗

加拿大旗，又叫楓葉旗，係代表加拿大嘅旗。旗長闊比例1:2，左右紅色，中間白色底，一塊紅色楓葉居中。楓葉象徵加拿大。1965年開始用。

加拿大旗

喺加拿大嘅法語區，加拿大旗又叫做 unifolié（單葉旗）。

設計

國旗嘅設計，作為一個紋章，理論上係紅地，中間加白色（銀色）正方形，再加紅色楓葉。

至於點樣用四色同專色印，聯邦政府有內部指引，但係正式標準其實係淨係用 CIE 嘅 xyY 同 L*a*b* 色系表示（三份標準之中，有一份寫咗唔同嘅色）。

加拿大旗畫法同用色

設計圖	用色
	用途	色系	白	紅
	正式標準	CIE xyY	x=0.328 y=0.344 Y=78.0	x=0.576 y=0.315 Y=9.5
		CIE L*a*b*	L*=90.78 a*=0.50 b*=7.97	L*=36.93 a*=55.61 b*=28.98
	正式標準（單日活動）	CIE xyY	x=0.312 y=0.320 Y=88.9	x=0.535 y=0.312 Y=14.6
	四色印刷	CMYK	0C 0M 0Y 0K	0C 100M 100Y 0K
	專色印刷	彩通	Process white	Red 032
	螢幕顯示	RGB	255, 255, 255	235, 45, 55
			#ffffff	#eb2d37

史

楓葉作為加拿大身份嘅象徵，早喺19世紀已經逐漸開始，呢個地位更加喺20世紀初確立咗，但係嗰陣加拿大嘅國旗係米字旗；政府建築物就掛右面有加拿大盾徽嘅加拿大紅船旗（Canadian Red Ensign），紅船旗喺立國之後冇幾耐亦都開始當加拿大旗咁用，但係紅船旗其實係英國商船用嘅一種旗。

1921年，因為加拿大喺一戰有功，英國國王佐治五世頒咗個國徽畀加拿大，於是紅船旗上面嗰個加拿大盾徽就換咗做個新國徽。

1925年，時任總理 Mackenzie King 喺國會成立專案小組嘗試整新國旗，但係個小組從來冇完成份報告。

1946年，Mackenzie King 再次嘗試成立專案小組整新國旗；講英文嘅國會議員要新旗有米字旗喺入面，但係魁省嘅議員就反對新國旗有米字旗或者任何其他 ｢外國嘅象徴｣（symbole étranger）。Mackenzie King 驚新旗會引起政治動盪，計劃不了了之。

1963年，皮爾遜競選加拿大總理嘅時候提出加拿大要有自己嘅國旗，而且旗上面要有楓葉，當選嘅話兩年內完成。1964年6月15號佢提出國旗法案，佢嘅設計左右藍色，中間有一枝有三塊葉嘅楓樹枝，但係佢嘅設計唔受歡迎，被人笑佢係 ｢皮爾遜嗰支旗仔｣（Pearson’s Pennant），於是佢就搵自由黨國員議員 John Matheson 做阿頭，整咗個跨黨派專案小組，要佢哋六個星期之內畀個新設計出來。

John Matheson 其實有個私人軍師，皇家軍校文學院院長 George Stanley。佢除咗畫咗而今嘅國旗嘅第一張草圖之外，仲用咗四版紙做需求分析同埋提出咗初步嘅設計方案，包括點解國旗應該簡單、冇米字旗，紅白、單塊楓葉等等，另外其中一項設就係新旗唔應該貎似其他國嘅國旗，但係諷刺就嘅係佢嗰張草圖其實有啲似秘魯國旗，於是 John Matheson 根據英國紋章院嘅案例，自行將白色部份由三分一擴大到二分一，同劃大咗塊葉。

伊利沙伯二世女王簽嗰封宣佈新國旗嘅詔書；詔書嘅字其實係書法家 Yvonne Diceman 嘅筆跡，佢嘅簽名喺右下角唔顯眼嘅地方同簽得好細

即係其實 John Matheson 一早已經有心水設計，但係專案小組仍然要睇過幾千個設計；1964年10月22號，專案小組投票，14 比 0，全票通過揀基於 George Stanley 設計嘅左右紅色，中間只有一塊楓葉嘅設計。

之後仍然有反對聲音，但係1964年12月15號，國會被逼投票，163 個自由黨議員贊成，73 個保守黨議員反對，反對失敗。

皮爾遜之後搵 Patrick Reid 叫佢執靚個設計，同佢一齊做嘅仲有專案小組嘅 John Matheson 同魁省嘅平面設計師 Jacques St. Cyr，Patrick Reid 同 Jacques St. Cyr 傾過之後決定只需要小執，執完之後就畫設計圖。

1964年12月24號伊利沙伯二世女王批准執靚咗嘅新設計，1965年1月28號宣佈佢係加拿大嘅國旗，2月15號生效；於是喺2月15號新國旗就第一次喺國會升起。

2005年3月15號，國旗喺加拿大紋章院正式註冊。

看圖識史

• 
  加拿大本來用英國國旗
• 
  未有正式國徽之前，政府建築物掛右便有加拿大盾徽嘅紅船旗
• 
  1921年新國徽取代紅船旗上便嘅盾徽，仍然唔係國旗
• 
  1946年國會專案小組提議用金色楓葉嘅紅船旗做國旗，魁省反對，計劃不了了之
• 
  1957年楓葉由綠色改紅色，仍然唔係國旗
• 
  1964年皮爾遜提出國旗法案，但係佢個設計唔受歡迎，於是成立跨黨派專案小組收拾殘局
• 
  睇咗幾千個設計之後，個專案小組揀咗單獨楓葉嘅設計，原圖係咁樣
• 
  原圖被平面設計師執靚之後，1965年成為國旗