加拿大

加拿大
旗	徽
	格言：A mari usque ad mare （拉丁文）; 「從大海到大海」
	國歌：O Canada （英文）; Ô Canada （法文）; 《噢，加拿大！》
屬地（實轄）
	幅員國土：9,984,670平方公里（世界第2名） ; 水域：8.92% ;
首都	渥太華
最大城市	多倫多
至長河	麥敬時河
至大湖	大熊湖
海岸線長	202,080
時區	UTC-8至UTC-3:30; 夏令時：UTC-7至UTC-2:30
國民
人數	人數：35,151,728人（2016年人口普查）（世界第38名） ; 人口密度：3.92/km2（世界第228名） ;
民族	多民族
政制
政制	君主立憲制、議會民主制
	主要領袖國家元首（君主）：查理斯三世; 政府代表（總督）：Mary May Simon; 政府首腦（聯邦總理大臣）：朱斯坦·杜呂多;
經濟
	HDI 0.922（2018年）;
中央銀行	加拿大中央銀行
貨幣	加元（CAD）
資訊
國家象徵	- 國樹：楓樹; 國花：楓葉; 國獸：美洲河狸、加拿大馬; 國家航空公司：加拿大航空;
國家代碼	CAN
國際域名縮寫	CA
國際電話區號	+1

60°13′21″N 112°7′22″W / 60.22250°N 112.12278°W / 60.22250; -112.12278

加拿大（粵拼：gaa1 naa4 daai6；英文、法文：Canada，英文發音：[ˈkænədə] (幫手·個快勞)；法式法文發音：[kanada]；魁北克法文發音：[kanadɔ] (幫手·個快勞)^[1]），簡稱加國，俗稱楓葉國，係世界上國土第二大國，佔咗北美洲北部嘅大部分，南部同西北部同美國接壤，海域東去到大西洋西部，西去到太平洋東部，北去到北冰洋。每年7月1號係加拿大國慶。

原住民已經響加拿大住咗成萬年。喺15世紀尾，英國同法國開始喺度擴張殖民地。後尾喺1763年，法國打輸咗七年戰爭，就割讓咗差唔多成個新法蘭西出來。喺1867年，加拿大成為英國喺北美洲嘅屬地之一，叫做加拿大聯邦。之後，啲加拿大人發覺唔可以再俾英國㩒住^{[未記出處或冇根據]}，於是乎喺1982年簽咗份1982年加拿大法案，同英國分離咗，但係名義上都係英聯邦嘅。

聯邦係由加拿大十個省同埋三個地區組成嘅。加拿大行雙文制度同埋係一個多元文化主義嘅國家，官方語言係英文同法文。喺一個咁先進嘅工業化國家，加拿大保持住多元化嘅經濟，喺好大程度上依賴豐富嘅自然資源。加拿大同美國喺貿易上已經有咗好長同深遠嘅關係。

加拿大喺1867年立國，首都係渥太華。不過，而家人口最多，經濟及文化來講最重要嘅城市係多倫多。其他較大嘅都市，包括滿地可、溫哥華以及卡加利。

喺二十世紀有好多世界各國嘅人移民到加拿大，中國人都唔例外。而家加拿大華僑嘅人口已經超過一百萬人，大部份集中喺好似多倫多同埋溫哥華噉嘅大城市。當中粵語係加拿大嘅第三大語種，排喺英文、法文之後。

國家名嘅根源

加拿大「Canada」來自聖羅倫斯河嘅伊洛魁話，解做「村」。1535年，魁北克市區民用咗呢個字來形容斯他達剛拿呢條村畀雅克卡地亞聽 ^[2]。卡地亞用呢個字來形容嗰時啱啱攞到手呢笪地方，唔淨止用來形容條村。1545年，歐洲啲書同地圖開始提及呢笪地方，就叫佢做 Kanada 嘞^[3]。

法屬加拿大即係話沿住條聖羅倫斯河同埋大湖嘅北岸。後尾又分開咗做兩個地方，一個係英國嘅，叫上加拿大，另外嘅叫下加拿大。1841年成立加拿大省。1867年開始，加拿大聯邦或者加拿大就俾人用來形容成個國家，1950年代之前都好興叫加拿大自治領。加拿大要求政治自治，聯邦政府開始淨係喺合法條款度叫加拿大。1982年加拿大法案指明加拿大係唯一（英文法文都係）一個合法嘅國家名。呢個法案出台嗰日就將自治領日，改咗名叫加拿大日。

政治

加拿大行君主立憲制、聯邦制同議會制。元首係查理斯三世。君主喺加拿大嘅代表叫總督，由加拿大總理大臣提名，君主任命；佢無任何政治歸屬，負責用君主名義同意法案、宣讀君主講話、簽國家文件、宣佈國會召開或解散、同埋第啲國家職務。君主（通過總督）名義上係首腦，但佢嘅實權保留喺危機時用，例如宣戰。

而家嘅總督係 Mary Simon。總理大臣就由執政黨黨魁做，目前係聯邦自由黨黨魁小杜魯多（Justin Trudeau）。立法機關係國會。

主要政黨：

加拿大自由黨（英文：Liberal Party of Canada，法文：Parti libéral du Canada，係個中─左翼，主張自由主義嘅政黨）
加拿大保守黨（英文：Conservative Party of Canada，法文：Parti conservateur du Canada，係個資本主義、保守主義嘅政黨）
加拿大新民主黨（英文：New Democratic Party，法文：Nouveau Parti démocratique，係個民主社會主義嘅政黨）
魁人政團（法文：Bloc Québécois，係個主張魁北克省脫離加拿大獨立嘅政黨）
加拿大綠黨（英文：Green Party of Canada，法文：Parti vert du Canada，係個環保主義嘅政黨）

國會架構

加拿大國會係包括君主、參議院同眾議院。君主嘅代表係總督。參議員嘅空缺由總督根據總理大臣嘅「推薦」來委任，任期係做到 75 歲為止，目前有 105 席。眾議院嘅議員由聯邦大選普選，目前有 338 席，每席代表一個選區，選區每10年按人口經獨立委員調整劃界。

「加拿大皇室」係國會同行政機構嘅一部分，但係皇室嘅代表亦都係總督。實質上，君主唔會單方面行使權力，而係會聽總理大臣嘅建議。

眾議院係加拿大國會權力嘅核心。君主嘅權力只係象徵式，參議院幾乎唔會唔畀眾議院嘅法案通過。總理大臣同內閣嘅任職需要眾議院一半以上成員嘅同意，但係唔需要參議院嘅同意。

省份

加拿大有十個省份同埋三個特區。

語言

加拿大嘅官方語言係英文同法文，但係魁北克省嘅官方語言凈係法文。

經濟

財政部長同埋工業部長都會用加拿大統計局嘅數據資料來籌備每年嘅財政計劃。
多倫多證券交易所係世界上第十大證券交易所，2024年1月為止，有3,476間公司喺多倫多交易所上市。
加拿大係世界第10大經濟體，2023年，佢嘅本地生產總值有2.118萬億美元。
而佢唔單只係經濟合作暨發展組織同埋七大工業國組織嘅成員，佢亦係全球十大貿易國之一，經濟算係高度國際化。
加拿大嘅經濟屬於混合經濟，喺美國傳統基金會公佈嘅經濟自由度指數裡面，加國嘅排名高過美國同大部份嘅西歐國家，重經歷過收入差距低於正常水平嘅時期。
2023年，加拿大嘅進口額超過7,261億美元，其中來自美國嘅貨品就價值2,390億美元，685億美元嘅貨品來自中國，270億美元嘅貨品來自墨西哥。到2023年，佢嘅貿易逆差為85億美元。
由20世紀初起，當地嘅製造業，採礦業同埋服務業增長成功咁將加拿大由一個農業國家改造成一個工業化嘅國家。
同好多發達國家一樣，加拿大嘅經濟係以服務業為主，大概四分之三嘅就業人口從事服務業。
但喺一級產業方面，佢就同其他發達國家唔同，加國嘅一級產業佔當地經濟相當大嘅比重，其中伐木同石油產業更加係加拿大兩個非常重要嘅行業。
加拿大係喺發達國家中極少數嘅能源出口國之一。喺大西洋省份（英文：Atlantic Canada）嘅離岸區域儲藏豐富嘅天然氣資源，而喺亞伯達省亦儲藏大量石油及天然氣資源，當地嘅阿薩巴斯卡油砂田（英文：Athabasca oil sands）嘅巨大儲量令加拿大擁有全球約13%嘅石油儲備，成為世界上第三大嘅石油儲備國，僅次於委內瑞拉以及沙特阿拉伯。
加拿大係世界上其中一個最大嘅農產品出口國及礦產資源大國，佢嘅大草原係世界上最重要嘅小麥、油菜以及其他穀物嘅產地之一。
除咗係鋅同鈾嘅主要出產國之外，佢重大量出口金、鎳、鋁、鋼、鐵礦石、焦炭以及鉛等嘅礦產。好多氣候惡劣嘅北部城市正係靠附近嘅礦產同木材資源嚟維持生計。
喺南部，特別係喺安大略省以及魁北克省嘅南部，製造業十分發達，汽車同飛機製造業係當地兩大重要產業。

攷

↑ Bigot, Davy; Papen, Robert A. (2013). "Sur la « norme » du français oral au Québec (et au Canada en général)". Langage et société (法文) (146): 115–132. 喺2020年11月21號搵到.
↑ Trigger, Bruce G.; Pendergast, James F. (1978). "Saint-Lawrence Iroquoians". Handbook of North American Indians Volume 15. Washington: Smithsonian Institution. pp. 357–361. OCLC 58762737.
↑ Cartier, Jacques (1545). "Relation originale de Jacques Cartier" (1863年版). Tross. 喺2007-02-23搵到.

出面網頁

〈国家概况 — 中华人民共和国外交部〉 (簡體中文)。中華人民共和國外交部。
〈加拿大 Canada - 北美地區 - 中華民國外交部 - 全球資訊網 Ministry of Foreign Affairs, Republic of China (Taiwan)〉 (繁體中文)。中華民國外交部。
"Canada - United States Department of State" (英文). 美國國務院.
加拿大喺中央情報局《世界概況》嘅資料（英文）
〈カナダ｜外務省〉 (日文)。日本外務省（日文：外務省）。
"Canada - Department of Foreign Affairs and Trade" (英文). 澳洲外交貿易部（英文：Department of Foreign Affairs and Trade (Australia)）.

[1] Bigot, Davy; Papen, Robert A. (2013). "Sur la « norme » du français oral au Québec (et au Canada en général)". Langage et société (法文) (146): 115–132. 喺2020年11月21號搵到.

[2] Trigger, Bruce G.; Pendergast, James F. (1978). "Saint-Lawrence Iroquoians". Handbook of North American Indians Volume 15. Washington: Smithsonian Institution. pp. 357–361. OCLC 58762737.

[3] Cartier, Jacques (1545). "Relation originale de Jacques Cartier" (1863年版). Tross. 喺2007-02-23搵到.

[1]

[2]

[3]