化獸師

化獸師（英文：Animagi，複數：Animagus），呢個係《哈利波特》系列入面嘅一種巫師，佢係動物animal同埋魔法師magus嘅混成詞，指一種可以唔洗用魔杖嘅情況下都可以隨心所欲變成一種動物嘅巫師。化獸師係為數唔多可以唔洗依靠魔杖嚟施展魔法嘅巫師，只有能力強大嘅巫師先至能夠做到化獸師。一個化獸師通常只可以有一種動物形態，而佢嘅動物形態就由巫師嘅性格特質而定，唔係人為嘅選擇，而好多時化獸師嘅動物形態同佢護法咒嘅形態係一樣嘅。

化獸師極難修煉，隨時都會走火入魔。呢個系列嘅作者J·K·羅琳喺《吟遊詩人皮陀故事集》裡面表明化獸師同透過變形術Transfiguration嚟成為動物，又或係變身成為狼人係三種唔同嘅嘢。小說入面明確咁強調咗化獸師同狼人之間嘅分別：化獸師可以完全控制佢哋嘅轉變，仲保留咗巫師原有嘅意識同思想、推理、記憶嘅能力；但變形術會搞到巫師淨係得返動物嘅思想，搞到佢哋喺不知不覺下唔記得自己係一個巫師而被困住咗，除非有另外嘅巫師將佢哋變番返嚟；而狼人嘅轉變就係非自願嘅，包括性格上嘅嚴重變化。變成狼人後「...佢會唔再記得自己係邊個，佢會殺死自己最好嘅朋友，狼人淨係會回應自己同類嘅呼喚。」狼人喺佢變身果陣飲用魔藥縛狼汁Wolfsbane Potion係維持佢嘅理智、智力同記憶力嘅唯一方法。

魔法部一直密切咁關注住化獸師，喺魔法部裡面有一張記載住化獸師資料嘅名單，喺上面有每個化獸師變成各種動物果時嘅特徵（例如：麥教授化身成貓果時嘅眼睛附近有類似佢副眼鏡嘅花紋）。另外，如果巫師嘅身體有改變（例如係彼得·佩迪魯嘅手指斷咗），呢種改變亦都會反映喺佢哋嘅動物形態身上。巫師喺成為化獸師之後無喺魔法部註冊會被判處去阿茲卡班監獄坐監。