北洋政府,正式名叫中華民國政府,係指中華民國建國初期以京兆地方作為首都嘅中央政府。因為政權絕大部分嘅時間都係由北洋軍出身嘅軍閥所把持,所以後世就用佢嚟命名。

北洋政府時期中華民國旗
北洋政府時期中華民國徽
中華民國分省地圖(1922-1926年)

北洋政府係1911年辛亥革命爆發之後,第一個被國際所承認繼承中國法統嘅政權。1913年10月6號,袁世凱被選做首任中華民國大總統,象徵住北洋政府正式成立,中華民國臨時政府結束。由1912年3月去到1928年6月,北洋政府嘅體制多次喺內閣制同埋總統制兩者之間徘徊。

北洋政府用五色旗作為中華民國嘅國旗,用《卿雲歌》作為中華民國嘅國歌。喺北洋政府主導下,1917年,北洋政府對德意志帝國奧匈帝國宣戰,加入協約國陣營去參與第一次世界大戰,並喺1919年以戰勝國嘅身份出席巴黎和會,但係因為五四運動抗議山東問題而未喺《凡爾賽條約》度簽字。

雖然北洋政府係國際認可嘅唯一合法中國政府,但係即使喺最強勢嘅袁世凱時期都未曾一統南方革命黨嘅勢力,喺袁世凱死後更加係連北洋軍自身內部都統一唔到,分裂做大小派系嘅軍閥混戰。1926年,割據廣州嘅國民政府向北洋政府發動北伐,北洋政府戰敗之後想退去東北,但係北洋政府最後一任領袖張作霖途中畀日本人炸死,佢個仔張學良喺繼承政權之後,喺1928年12月29號宣布易幟同埋服從國民政府嘅統治,北洋政府正式宣告滅亡。