袁世凱

袁世凱（1859年9月16號—1916年6月6號），字慰亭，號容庵，河南項城人，清朝末期至中華民國初期嘅軍事同政治人物。佢喺武昌起義之後做清政府嘅內閣總理大臣，迫清朝最後一位皇帝溥儀退位，之後袁世凱做咗中華民國臨時大總統同大總統。佢喺1915年12月宣佈喺1916年元旦登基做中華帝國皇帝，改元洪憲。蔡鍔等人喺1915年12月響雲南起兵反袁，之後貴州、廣西都加入反袁行列，連本來係自己人嘅段祺瑞、馮國璋都唔支持袁世凱做皇帝，袁世凱被迫喺1916年3月宣佈撤銷帝制，之後羞憤而死。

袁世凱

生平

袁世凱喺1859年響河南省項城出世，後生嗰時曾經考過科舉，但係落第，之後佢參軍，曾經參與過壬午兵變、甲午戰爭等等嘅戰事，獲得李鴻章賞識，之後主力負責訓練軍隊。

1900年袁世凱做山東巡撫。李鴻章過身之後，袁世凱做直隸總督、北洋大臣。佢主張廢除科舉、成立新軍隊、起學校、起工廠等等，而中國第一支警察隊伍，亦係喺袁世凱督導之下成立。1908年清德宗光緒帝同慈禧太后過身，溥儀做咗皇帝，由醇親王攝政。醇親王一向同袁世凱有牙齒印，袁世凱先至返番河南個老家。

1911年辛亥革命爆發，袁世凱乘機上位，做埋內閣總理大臣。佢後來代表清朝同孫中山講和，最後又係佢喺1912年迫溥儀退位。袁世凱無耐重做埋中華民國臨時大總統。1913年發生二次革命，好快就畀袁世凱平息咗。跟住佢迫國會選佢做正式大總統。之後佢解散咗國會，修改大總統選舉法，畀佢可以無限期連任大總統。但係佢仲想做埋皇帝，於是搞帝制運動，喺1915年12月宣佈喺1916年元旦登基做中華帝國皇帝，改元洪憲。佢做咗83日皇帝後，喺1916年3月22號響各方壓力底下撤銷帝制。袁世凱仲想繼續做大總統，但係各方要求佢退位嘅壓力持續。袁世凱喺1916年6月6號病死，之後由副總統黎元洪繼任大總統。

評論

傳統上中國人都對袁世凱冇咩好感，尤其係佢自立為皇帝，就係俾中國人閙得最犀利嘅地方。之但係佢主張廢除科舉、成立新軍隊、起學校、起工廠，重組織咗中國第一支警察隊，亦都反映出袁世凱好有見識，才幹超卓。

出面網頁

• 袁世凱

晚清史（1840年—1911年）

重大事件	清皇室重要人物	重要人物	重要組織
鴉片戰爭（1840年─1842年） 英法聯軍（1856年─1860年） 辛酉政變（1861年） 太平天國（1856年─1860年） 洋務運動（1860年代─1890年代） 中法戰爭（1883年─1885年） 甲午戰爭（1894年─1895年） 戊戌變法（1898年） 義和團（1899年─1900年） 八國聯軍（1900年） 清末新政（1901年─1911年） 日俄戰爭（1904年─1905年） 黃花崗起義（1911年） 保路運動（1911年） 辛亥革命（1911年） 條約 南京條約（1842年） 天津條約（1858年） 璦琿條約（1858年） 北京條約（1860年） 中法新約（1885年） 馬關條約（1895年） 辛丑條約（1901年）	皇帝 道光（在位：1820年─1850年） 咸豐（在位：1850年─1861年） 同治（在位：1861年─1874年） 光緒（在位：1874年─1908年） 宣統（在位：1908年─1911年） 皇室 慈安太后 慈禧太后 奕訢 奕劻 溥儁 載漪 載勳 珍妃 載灃 隆裕太后	林則徐 馮桂芬 僧格林沁 曾國藩 曾紀澤 李鴻章 左宗棠 翁同龢 張之洞 袁世凱 維新派 康有爲 梁啟超 戊戌六君子 譚嗣同 太平天國 洪秀全 楊秀清 石達開 革命黨 孫文 黃興 秋瑾	軍事 綠營 湘軍 淮軍 北洋水師 新軍 捻軍 黑旗軍 政府 總理衙門 同文館 江南製造局 其他 強學會 同盟會 興中會 光復會