開主選單

北潭涌香港新界西貢半島南一撻地方。北潭涌響鯽魚湖南面,黃麖地東面,上窰北面。北潭涌原本有六條村,其中北潭涌村係18世紀起一條天主敎客家村。北潭涌響正兩條匯合之處,其中大嗰條叫龍坑,係北潭流入來,直流入海。因為呢條涌,所以呢度叫北潭涌。

北潭涌有閘口。除非有批准,否則唔畀車入西貢東郊野公園。

歷史

未通路時,去赤徑或者去西貢啲人要坐船。18世紀因為香港島要起好多樓,要好多石灰水泥,所以呢一帶唔少地方整石灰。

大清嗰時,上水姓廖有秀才,姓廖會去北潭涌收糧當。大英帝國租借咗新界,呢度啲鄉民都唔知。忽然有好多印度人走入來,村民見到即刻反抗,後尾先知有印度人來丈量,自此以後,就交稅畀香港政府。而姓廖重搏矇來收糧,以為村民乜都唔知,畀村民趕走。 [1]

1970年代,香港政府劃個半島做兩個郊野公園。而北潭涌就咁啱響西貢東郊野公園西貢西郊野公園中間。重起埋西貢郊野公園遊客中心,專講西貢鄉村習俗生態環境、風景區、萬宜水庫等等。無幾耐,保良局響呢度起渡假營。

交通

北潭涌有大網仔路西去大網仔同西貢,東去萬宜水庫,而北潭路就由北潭涌起去北潭凹海下

注腳