區家麟

區家麟博士（1968年—）係香港資深新聞工作者，曾經喺無綫新聞擔任時事節目監製同埋《新聞透視》主持，第二屆「中大新聞獎」電子傳媒組嘅得獎者，佢曾經獲選為史丹福大學奈特學人，去咗美國進修一年。

區家麟主持2020年香港立法會選舉民主派初選論壇

新聞工作者生涯

佢喺2010年離開無綫新聞，同年9月開始喺香港中文大學修讀新聞博士課程，2016年畢業。

關注議題

佢關注香港嘅新聞自由同假新聞問題，有份參與創立事實查核實驗室，有時會就呢啲問題發表分析同意見。例如喺雨傘革命嗰陣，佢就曾經分析當時唔同嘅謠言，形容呢啲謠言嘅散播有組織有計劃，識得講故仔，有畫面感有細節，仿真度極高，渠道亦揀得好。

言論自由多次被打壓

喺內容同審議過程都具有爭議嘅《港版國安法》被通過後，區家麟嘅言論自由面對一定嘅打壓。

忽然被港台封咪

2021年6月28號，區家麟主持11年嘅《自由風自由phone》前大半個鐘，突然接獲港台通知當日為最後一日主持節目。佢回應話原因「心知肚明」，認為係有人唔鍾意佢喺電台以外撰寫文章監督政府、批評施政嘅言論，而港台管理層又較敏感，唔能夠接受佢嘅評論，認為事件係百分百政治判斷。親中派傳媒人原姿晴就話佢主持節目嗰陣扭曲《防止賄賂條例》無監管特首涉誤導港人，又偏袒違反《港區國安法》嫌犯黎智英，無遵循《香港電台約章》，因此應該被封咪。