黎智英

黎智英（英文：Jimmy Lai Chee-ying，1947年12月8號—），人稱「肥佬黎」，祖籍廣東順德，佢生於廣州，香港企業家，泛民主派大旗手，長期支持香港民主運動，但亦因為咁，香港嘅親中陣營（包括傳統親共團體、激進親中陣營、商界建制派）人士（例如東方日報）稱佢做漢奸黎，同埋佢亦不時被差佬作出政治檢控。

黎智英 Jimmy Lai Chee-ying
喺2019年美國捍衛民主基金會
出世	(1947-12-08) 1947年12月8號  中華民國廣東省廣州市
屋企	香港
國籍	英國  中國（香港） 中華民國
別名	肥佬黎
語言	粵語、普通話、英語
職業	企業家
宗教信仰	羅馬天主教
配偶	李韻琴

事業

1960年，黎智英由中國大陸偷渡到香港後，白手興家。

1981年，創辦佐丹奴時裝連鎖店。

1990年代，創辦香港壹傳媒集團。

2020年2月28號，黎智英涉嫌捲入2017年6月4號嘅刑事恐嚇東方日報記者案件、2019年嘅人大八三一五周年示威而畀差人拉咗。

2020年4月18號，黎智英喺2019年嘅煞停警黑亂港落實五大訴求集會、沒有國慶只有國殤示威裡面，組織同埋參與未經批准嘅集結，而畀差人拉咗。

2020年8月10號，黎智英同大仔黎見恩、二仔黎耀恩因為觸犯香港國家安全法，而畀差人拉咗。

2021年4月16號，黎智英同李卓人因為參與2019年8月18號、8月31號嘅非法集結罪名成立，合共被判坐花廳14個月。

政治立場

黎智英係泛民主派大旗手、反中共主義者。佢話咁係因為親身經歷文化大革命見過好多中共嘅衰嘢。佢亦支持平反六四。

相關事件

畀香港政府凍結股份

2021年5月14號，保安局長根據《香港國家安全法第四十三條實施細則》附表3嘅相關條文發出書面通知，凍結黎智英持有嘅壹傳媒有限公司（香港交易所股份代號︰282）嘅股份，同埋佢擁有嘅3間公司喺香港銀行帳戶。

親中建制派對黎智英收外國資金嘅指控

黎智英係少數同泛民主派關係緊密嘅生意人（除咗佢之外重有袁弓夷、周小龍），亦因為咁佢經常受到親中建制派嘅攻擊。其中一個親中陣營對佢嘅指控，就係話佢收美國CIA或者其他外國勢力嘅錢，當中以《東方日報》最經常用「黑金」形容黎智英。面對呢啲指控，黎智英曾經喺2016年3月2號喺壹週刊話，佢嘅身家金錢來源，由佢後生嗰陣創辦公明織造廠，到80年創辦佐丹奴，到後來再創辦壹傳媒同旗下各國媒體，都可以從工商處、銀行戶口同埋稅務局有稽可查。如果真係懷疑，一查就攞到證據，或者問一啲睇住佢事業發展嘅人都會清楚，但啲人就係唔會去查。佢又不點名批評，《東方日報》咁講係明知故犯嘅誣衊。

被香港賽馬會終止會籍事件

2021年9月2號，黎智英因為干犯咗三單同香港修例風波有關嘅非法遊行罪，同何俊仁、李柱銘一齊畀香港賽馬會終止會籍。

睇埋

• 壹傳媒大樓畀國安處搜查事件