南戲
南戲係中國戲曲史上最早成熟嘅文藝戲劇，北宋末年至明朝初年（12世紀～14世紀）喺中國東南沿海流行，為區別同時代嘅「北曲雜劇」，後人稱之為「南曲戲文」、「南戲」或「戲文」。南戲嘅存在，令中國嘅古代戲曲同古希臘戲劇同古印度戲劇並列為世界三大古代戲劇體系。
歷史
編輯南戲喺南北宋交接年間嘅浙江溫州（當時名永嘉）誕生，所以稱為「溫州雜劇」或「永嘉戲曲」。元朝末年南戲發展到顛峰，取得當時劇壇嘅統治地位。明初時期逐漸被新興嘅昆山腔所取代，並且演化為明清嘅主要戲劇——「傳奇」。
根據明代祝允明嘅《蝟談》記載：「南戲出在宣和之後，南渡之際，謂之溫州雜劇」。而徐渭同喺嘉靖三十八年（公元1559年）完成嘅《南詞敘錄》一書中記載：「南戲始於宋光宗朝，永嘉人所作《趙貞女》、《王魁》兩種實首之……其盛則自南渡，號曰『永嘉雜劇』，又曰『鶻伶聲嗽』。」
北宋時嘅溫州係繁榮嘅港口城市，南宋遷都臨安（今杭州）之後商品經濟更加活躍。原本喺農村流行嘅民間歌舞小戲同埋里巷歌謠進入城市，業餘戲班都成為職業劇團。喺吸取咗市民中流行嘅民歌小調或諸宮調、雜劇嘅長處後，形成咗一種新嘅戲曲形式。
早期南戲嘅創作者多數係溫州民間嘅「書會才人」，文字比較俚俗，保留咗唔不少溫州坊巷舊名同埋方言土語。南戲劇本出現以後，中國古代嘅戲曲藝術體系正式形成。但喺宋代，南戲長期流行喺民間，唔受士大夫所重視，甚至遭到禁止。《漳州府志》就有記載，理學家朱熹任漳州知府時，都曾經禁止當地戲曲演出。故此宋代南戲劇目留存極少，現存嘅南戲劇本大多已經過明代文人嘅修改。
元代，南戲已走出溫州等東部地區，流行喺中國各地。南曲北上同埋北劇南下，南北交流嘅機會大大增加。北方作家參與咗南戲聲腔嘅改造同埋劇本嘅編寫，雜劇演員重加入南戲嘅演出，南北戲文嘅交流，為南戲同埋雜劇注入新嘅活力。南戲喺呢個時期得到高度發展，現存二百多幾南戲劇目，絕大部分係元代嘅作品。
自元末《琵琶記》後，南戲開始由民間嘅傳唱文學改為文人嘅「傳奇」創作。但之後，昆曲嘅興盛令戲曲嘅中心由溫州漸漸轉移到蘇州。自此，南曲戲文延綿兩百幾年嘅創作亦宣告終結。直至明代，東南地域文化取得優勢，由南戲發展而來嘅「傳奇」重新取代日漸式微嘅北方雜劇。
1920年代，當時喺西歐遊學嘅中國學者葉恭綽喺倫敦古玩店發現1900年八國聯軍侵華時散失國外嘅《永樂大典戲文三種》，呢個係目前保存嘅最早、最為完整嘅南戲劇本。
20世紀末，南戲重新進入中國戲劇界嘅視野。1997年，溫州越劇團首先將南戲《荊釵記》搬上舞臺。2000年，永嘉昆劇團喺蘇州用南戲最古老嘅樣式上演《張協狀元》。
體制
編輯「南曲戲文」同宋金「北曲雜劇」有好大分別，佢喺表演體制同結構上都要比雜劇來得自由，可以根據劇情需要作不同選擇，已完全具備戲劇嘅特徵。
南戲嘅民間氣息較為強烈，而文人嘅氣息較淡，大多數係反映家庭倫理問題嘅劇本。戲文嘅語言通俗，口語化，對出場人物嘅介紹方式有濃厚嘅話本小說痕跡。
論劇本結構，南戲無固定模式，時間同空間都靠唱做念打來表達，以人物嘅上下場為界，稱之為「出」，可長可短，一個劇目可以係十幾「出」，亦可以多達四、五十「出」，接連演上幾日。
論曲調配合，南戲無嚴密嘅宮調組織，可以由主角主唱，亦可以由配角演唱，再結合幫唱、接唱、對唱同合唱等形式同賓白、科介等方法，將矛盾衝突貫串整個劇情中心。
南戲嘅舞臺上，出現咗「生」、「旦」、「淨」、「末」、「醜」、「外」、「貼」等角色分制。全劇圍繞「生」、「旦」正劇嘅表演展開故事情節，輔以「淨」、「末」、「醜」嘅插科打諢，呢個係中國戲曲史上最早而且完備嘅行當分配製度。
劇目
編輯自宋元以來，有名目留存嘅南戲共238本，有殘文佚曲流傳嘅約130幾本，但現有完整劇本流傳嘅只有19本。
《永樂大典戲文三種》包括三本戲文：《張協狀元》、《小孫屠》同《宦門子弟錯立身》。其中《張協狀元》係現存最完整嘅早期南戲劇本，創於八百年前南宋時期嘅溫州「九山書會」，開場嘅《滿庭芳》詞中寫著：「這番書會，要奪魁名。占斷東甌盛事，諸宮調唱出來因」。
元末明初流行嘅《荊釵記》、《劉知遠白兔記》、《拜月亭記》同《殺狗記》合稱「四大南戲」，係南戲喺元末明初嘅代表作品。
《琵琶記》係南戲嘅佼佼者，由溫州瑞安人高則誠於元朝至正年間，依南宋流傳嘅《趙貞女蔡二郎》戲文編撰而成。《琵琶記》係中國戲劇史上，稱為「詞曲之祖」，係南戲時代同傳奇時代間嘅橋樑，對明代戲曲創作嘅影響非常深遠。
其餘有完整留本嘅南戲：《東窗記》、《破窯記》、《劉希必金釵記》。