南海公司泡沫

南海公司泡沫（South Sea Bubble）係18世紀初英國嘅一場經濟泡沫。

南海公司泡沫，Edward Matthew Ward 畫

嗰陣時，南海公司(The South Sea Company)係英國一間上市企業，公司老闆係 Lord Treasurer 同 Robert Harley，佢哋聲稱同西班牙政府達成協議，可以壟斷晒南美洲嘅墨西哥、秘魯、智利呢啲地方所有礦產、煙業、香料呢啲貿易資源。而嗰陣時西班牙皇室因為繼承權而打仗，歐洲好多國家嘅皇室，都想扶植自己嘅血裔成為影響西班牙皇權嘅代理人，因為當西班牙皇權落實之後，就肯定大把著數。

而南海公司聲稱自己可以喺皇權落實之後壟斷晒西班牙嘅利益，令股價由一百鎊升到上一千鎊，後來歐洲開始放售，之後傳出南海公司高層詐騙消息，令股價馬上暴跌，股民血本無歸。

背景

1711年，英國因為戰役負債一仟萬英磅，於是南海公司就向英國政府提供貸款同協議債券重組計劃，年息6%，條件係要南美洲同北美洲之間嘅交易都由南海公司壟斷，呢啲利益包括南美洲嘅金礦、珠寶、毛料，另外亦包北美奴隸嘅交易權。因為呢啲著數太荀，南海公司於是乘機發行新股，投資者見到賺硬，就熱烈認購，南海公司見反應咁勁，立即就增加發行新股，賺多筆。

而嗰陣英國因為啱啱工業革命，好多人都有閒錢買股票，買南海股票仲變咗一個熱潮，個個有錢都走去買，南海嘅經理人真係賺到連老竇姓乜都唔知，仲走去散佈謠言，話南海公司同西班牙政府達成協議，可以壟斷晒南美洲嘅所有貿易資源，投資者查都唔查吓，個個信晒，令南海股價由一百鎊升到上一千鎊。而好多同南海有關嘅公司都乘機抽水，好多跟本無業務嘅概念公司，話自己同南海有生意關係，都上市發股票，一樣大把人買。

南海公司單單靠炒股票就賺到笑，正經生意又唔做，結果公司業務開始荒廢，公司業務賺到嘅利潤，同佢股價完全唔成比例，投資者開始瘋狂拋售，股價立即暴跌，其他抽水上市嘅公司都一齊跌，搞到啲投資者個個損手爛腳，血本無歸。著名科學家牛頓都有份買，佢最後都輸咗成二萬英磅，以當時計可以話係一筆大錢。

上圖顯示南海公司嘅股價喺 1719 年至 1720 年之間嘅上落，當中 Y 軸係個股價而 X 軸係時間（每對相鄰日期之間隔咗 5 日）。由幅圖度睇得出，南海公司啲股票嘅價喺 1720 年 2 月頭至同年 6 月尾之間升咗成差唔多 9 倍咁多，但個價喺跟住嗰三個月內急跌，跌到返落原來數值咁滯－如果有位投資者喺啲股價勁升嗰段期間買入咗啲股票，佢就損失慘重。

影響

"You see, of course, if you're not a dunce,
How it went to pieces all at once, —
All at once, and nothing first, —
Just as bubbles do when they burst."

（粵譯：「如果你唔係傻仔就睇到，佢係點樣一嘢煙消雲散，初頭乜都冇一嘢乜都冇，就好似啲泡沫爆嗰陣噉。」）

奧厘化雲島豪米士（Oliver Wendell Holmes, Jr.）

南海公司泡沫爆破之後，英國政府立法禁止再發新股，禁令一路維持到1825年，但呢個泡沫對英國經濟元氣大傷，差唔多衰咗成一百年先補得返。

打後有評論者分析成件事，就打咗個比喻，話南海公司單嘢「好似個番梘泡噉」－「本來係乜都冇，齋靠空氣膨漲，漲到咁上下就會爆，爆咗就變返乜都冇」－呢單嘢據講就係「經濟泡沫」呢隻詞彙嘅起源。

拎

• 南海泡沫