南涌

南涌（英文：Nam Chung）係香港新界北區一個地方，喺鹿頸嘅西面，即係沙頭角海西南岸嘅隔離，係香港著名嘅釣魚地點，另一方面，南涌係衛奕信徑嘅終點，亦係南涌郊遊徑嘅起點。

南涌有屏南石澗同屏嘉石澗兩大石澗，當中有唔同大細但又互通嘅壺穴，最大嘅壺穴直徑達1.5米。溪澗流下匯聚到南涌河，河水挾帶住沙泥漫流，形成咗泛濫平原。

原居民鄉村

南涌有楊屋、鄭屋、羅屋、李屋同張屋，係客家五姓氏嘅原居民，祖籍全部都係嘉應五華。山上嘅老農田村曾經係羅氏所居，後來喺20世紀初全村搬咗去南涌村嘅現址。以前南涌居民多數以耕田為生，後來轉往向外搵食，農田就荒棄咗，近年改做漁塘畀遊客消閒垂釣。