南豐集團
南豐集團係香港嘅大集團之一，1954年由陳廷驊創立。初時以紡織起家，後來主力發展地產，其次有物業管理、生命科技、金融投資同航運業等。
歷史 編輯
創辦人陳廷驊係寧波人，屋企本身就已經係整布。1950年，陳氏由中國落到嚟香港，開初係做棉紗、布疋嘅貿易生意。到1954年，佢創立咗南豐紡織。到1970年，南豐紡織上市。
1970年代中期，陳氏有感紡織生意開始冇乜錢賺，開始著手將公司嘅業務轉為發展地產同投資為主，代表作有南豐初時發展嘅南豐新邨。
到1989年，南豐就畀陳廷驊私有化，同一年，陳廷驊用咗佢大部分嘅資產成立咗「陳廷驊基金會」。
1995年開始，陳廷驊開始有嚴重嘅腦退化症，一直到2008年11月，高等法院宣布佢係「精神上無行為能力人士」，2009年，細女陳慧慧成為南豐嘅董事長。但就喺同年12月，陳廷驊老婆楊福娥以老公對佢作出「不合理行為」為由申請離婚。到2011年4月19號，雙方達成共識，以「分居一年」原則離婚，並且安排好點樣分配財產，呢件事亦都為之後嘅「南豐爭產案」揭開序幕。
2012年，創辦人陳廷驊死咗。
2014年，前財政司司長梁錦松加盟南豐做行政總裁。到2021年，陳慧慧大仔張世成接任行政總裁，梁錦松就接替陳慧慧成為南豐董事長，陳慧慧就成為集團嘅榮譽主席。