卡米拉王后

英國王后

卡米拉王后LGGCVOPC英文Camilla, Queen Consort of the United Kingdom1947年7月17號—),原名卡米拉·柏架·鮑爾斯英文Camilla Parker Bowles),本姓尚德(Shand),現任英國王后,英王查理斯三世嘅第二任老婆。

卡米拉王后
Camilla, Queen Consort of the United Kingdom
CHOGM Commonwealth Big Lunch on April 17, 2018 - 007 (cropped).jpg
2018年攝
英國王后
在位2022年9月8號ー
私人明細
配偶
仔女
全名卡米拉·柏架·鮑爾斯
皇族溫莎王朝(按婚姻)
布斯·尚德英文Bruce Shand
羅莎琳·邱比特英文Rosalind Cubitt
出世 (1947-07-17) 1947年7月17號(75歲)
英國 英國倫敦國王學院醫院
出世名卡米拉·羅斯瑪麗·尚德
Camilla Rosemary Shand
卡米拉王后嘅簽名

早年

卡米拉嘅出世名係卡米拉·羅斯瑪麗·尚德,1947年7月17號響倫敦國王學院醫院出世,老豆係前陸軍少校兼生意人布斯·尚德英文Bruce Shand,阿媽係阿什科姆男爵羅蘭‧邱比特個女羅莎琳·邱比特英文Rosalind Cubitt,卡米拉係大女,有一個細佬馬克·尚德同細妹安娜貝爾‧愛略特。卡米拉嘅曾祖母(阿婆嘅阿媽)愛麗絲·吉寶曾經係英王愛德華七世嘅情人。

卡米拉細個響東修適士郡普朗姆頓度過,受到老豆嘅影響,自細就中意睇書。佢響5歲入讀Dumbrells學校,10歲嗰陣轉校到女皇門學校,但佢響完成O-level(普通教育文憑)後就離開女皇門學校,前往瑞士特洛什納嘅精修學校就讀。之後佢到倫敦大學巴黎學院修讀法國文學。佢響大學畢業後進入倫敦社交界,又成為西區好多間公司嘅秘書,曾經成為裝修公司Sibyl Colefax & John Fowler嘅接待員,但因為一次舞會遲到後畀人炒咗。

戀情同婚姻

響1960年代後期,卡米拉經細佬馬克嘅介紹,識咗安德魯·柏架·鮑爾斯英文Andrew Parker Bowles,當時安德魯係皇家藍色騎兵團中尉。經過多年斷斷續續嘅關係(安德魯響1970年至72年曾經同安妮長公主拍拖),佢哋最終響1973年結婚,而卡米拉亦改名叫卡米拉·柏架·鮑爾斯(英文:Camilla Parker Bowles),。佢哋一共有兩個仔女,大仔湯·柏架·鮑爾斯響1974年出世,係查理斯三世嘅教子,而大女勞拉·盧比斯響1978年出世。兩個仔女都按照羅馬天主教嘅方式教育,湯響伊頓公學畢業,而勞拉就響聖瑪麗學校畢業。直至1994年12月,卡米拉以長年分居為由提出離婚訴訟,最終佢哋響1995年3月3號離婚。

卡米拉嘅現任老公係查理斯三世,佢哋最初係1971年見面,係經朋友介紹下認識,當時正值卡米拉同安德魯分手嘅時候。之後兩個人開始拍拖,直至1973年查理斯加入皇家海軍後玩完。至於點解兩個人會分開,坊間有唔同講法。有指因為英女王伊利沙伯二世唔中意卡米拉,亦有指係卡米拉唔想嫁畀查理斯,仲有人話當初查理斯加入皇家海軍其實係蒙巴頓伯爵嘅安排,目的就係要佢同卡米拉分手。

直至1979年蒙巴頓伯爵被暗殺後,查理斯好傷心,希望響卡米拉到得到安慰,兩個人死灰復燃。直到1981年查理斯宣佈同戴安娜結婚後,佢哋斷絕來往,但到1980年代末期又舊情重燃。1993年,卡米拉同查理斯嘅通話畀人踢爆咗,揭發佢哋之間嘅婚外情,一時之間兩個人成為眾矢之的。1994年,查理斯正式承認佢同卡米拉嘅關係,後嚟又表示佢哋係響1986年復合。

1995年,卡米拉同安德魯離婚。1996年,查理斯同戴安娜離婚。至此之後,卡米拉正式成為查理斯嘅情人,由2004年開始更陪查理斯出席公開活動。

2005年2月10號,英國皇室宣佈卡米拉會同威爾斯親王查理斯響同年4月8號嘅溫莎城堡搞婚禮,並有一個宗教祈禱。但係響4月2號宣佈婚禮會被延後到4月9號搞,因為查理斯要代表英女王參加教皇若望保祿二世嘅葬禮。婚禮實際上係響溫莎市政廳舉行,因為溫莎城堡冇婚禮註冊嘅執照。呢種儀式通常只有屋企人參加,但英女王同埋菲臘親王都冇出席,白金漢宮話係因為唔想婚禮失去焦點。不過英女王同菲臘親王響聖佐治教堂舉行嘅婚禮賜福儀式就有現身,之後亦按例為新婚夫婦響溫莎城堡搞婚宴。婚禮完後,佢哋入住伯克館(Birk Hall),呢度係查理斯響蘇格蘭住嘅地方,離巴摩盧城堡(Balmoral)唔遠,佢哋響呢度度蜜月同埋過結婚一周年紀念日。

皇室生活

 
查理斯同卡米拉,2019年攝

作為英國皇儲嘅老婆,卡米拉獲得戴安娜王妃所擁有嘅一切頭銜,包括威爾斯王妃。但由於「威爾斯王妃」畀人普遍認為屬於已經過身嘅戴安娜,所以卡米拉出席公眾場合嗰陣會用「康和公爵夫人」取而代之。

由於卡米拉響查理斯同戴安娜結婚前就拍過拖,雖然響婚後一度斷絕關係,但係響收尾又死灰復燃,而且當時佢仲有老公,所以卡米拉並唔受英國人歡迎。據民調顯示,市民普遍反對卡米拉成為英國王后,因為卡米拉畀市民認為係破壞戴安娜王妃婚姻嘅小三。2007年《每日電訊報》嘅民調顯示,如果查理斯登基,支持卡米拉成為王后嘅只有28%,反對嘅受訪者高達61%。就算隨住時間過去,卡米拉嘅受歡迎程度亦只係有少少上升。2014年YouGov嘅調查顯示,有32%嘅英國人覺得卡米拉只可以成為王妃,唔可以做王后。直至2022年6月,英女王伊利沙伯二世表示希望卡米拉可以響查理斯登基後成為王后,因此佢最終響2022年9月8號成為王后。

出面網頁