愛丁堡公爵菲臘親王

愛丁堡公爵菲臘親王
	愛丁堡公爵菲臘親王（2008年）
愛丁堡公爵
在位	1947年11月20號－2021年4月9號
前任	亞弗列親王（第二次授勳）
繼任	查理斯三世
英國君主配偶
在位	1952年2月6號－2021年4月9號
前任	伊利沙伯·鮑斯-萊昂
私人明細
配偶	伊利沙伯二世
仔女	查理斯三世; 安妮長公主; 約克公爵安德魯王子; 愛丁堡公爵愛德華王子
全名	菲臘·蒙巴頓
父	希臘同丹麥王子安德烈亞斯
母	愛麗絲公主 (巴騰堡)
出世	1921年6月10號; 希臘克基拉島蒙里普斯
過世	2021年4月9號（99歲）; 英國英倫伯克郡溫莎堡
安葬	2021年4月17號; 英國聖佐治教堂

愛丁堡公爵菲臘親王（英文：Prince Philip, Duke of Edinburgh，1921年 6月10號—2021年 4月9號^[1]）係前英國王室成員，英女王伊利沙伯二世個老公。

愛丁堡公爵菲臘親王，原本叫希臘同丹麥王子菲臘（希臘文：Φίλιππος，羅馬化：Fílippos），1921年6月20號響希臘伊奧尼亞群島克基拉州克基拉島嘅蒙里普斯皇家別墅出世（據講佢係喺一張枱上面出世），係希臘王子安德烈亞斯同佢老婆巴騰堡愛麗絲公主嘅第五個細路（同時係獨仔）。因為阿爺係希臘國王佐治一世，太爺係丹麥國王基斯頓九世，所以佢叫「希臘同丹麥王子」，喺呢兩個國家都有王位繼承權。佢上有四個家姐，分別係瑪格麗塔、狄奧多拉、塞西莉同蘇菲亞。佢出世後響科孚古堡聖佐治教堂按照東正教儀式去受洗。

響菲臘親王出世冇耐，佢阿公路易斯蒙巴頓響倫敦走咗。而路易斯蒙巴頓本身係德意志帝國嘅王族，阿爺係黑森及萊茵河大公路德維希二世。路易斯後嚟歸化咗做英國公民，但係當時咁啱英國同德國打緊仗，英國國民唔鍾意德國人，所以路易斯將自己個姓由原先嘅「巴騰堡」英化做「蒙巴頓」，仲放棄埋德國大公嘅身份，繼而做咗英國貴族，封做米福德黑文侯爵。響阿媽愛麗絲公主帶住菲臘親王出席佢嘅葬禮之後，老豆安德烈亞斯隨即就參加咗希土戰爭，做咗陸軍師長。

但係希臘響呢次戰爭入面處於劣勢，而土耳其一方就大勝。菲臘嘅大伯、希臘時任國王康斯坦丁一世被人話係今次打輸仗嘅主要原因，所以被迫響1922年9月27號落台。而新政府隨即就拉咗好多人，當中包括安德烈亞斯。軍方殺咗包括前首相喬治奧斯·古納里斯在內嘅六位政治人，而安德烈亞斯自己條命仔不保，愛麗絲公主亦受到監視。同年12月，政府將安德烈亞斯一家驅逐出境。