即興劇英文improvisational theater)係一種冇劇本戲劇演出形式,每場演出從現場觀眾畀嘅一啲簡單建議為靈感,演員喺舞台上合作即興創作出嘅戲劇[1]。演員喺上台演出之前係完全唔知自己要做啲點樣嘅戲,佢哋都係接受咗觀眾嘅建議之後,然後每個喺台上演出嘅演員開始同其他演員開始互動噉做戲,自己諗出對白、情緒、動作等,其他演員要繼續諗點樣將故事接落去,慢慢一步一步噉將成套劇嘅劇情建構出嚟。

瑞典演員喺劇院演出嘅即興劇

形式

無論係任何型式嘅即興劇,都係由演員喺演出裏面即時發展對話同表演。因為具有唔可以預知嘅特質,而且總係發生令人意想不到嘅劇情,即興劇經常自然噉偏向喺喜劇風格。因此即興劇亦經常令人覺得係一種充滿活力同歡樂感嘅娛樂。事實上,即興劇亦可能有動人嘅劇情,或以實驗風格、以唔係敘事嘅方式嚟呈現演出。

短篇即興劇/即興遊戲

演員挑戰特定嘅遊戲規則同限制,創造出嘅即興劇,以大約3-5分鐘嘅短劇形式呈現。

喺香港有被教授過嘅即興短劇有加拿大Theatresports,源自加拿大戲劇大師Keith Johnstone。而喺香港有戲劇培訓團體同社福機構舉辦,例子有青皮人互動劇場,基督教香港信義會等。

喺香港同澳門,有以Theatresports作爲藍本改成嘅即興劇場比賽,叫做「勁爆劇場大比拼」,並且改爲用廣東話進行,性質相近但有些微差別。喺分別上最大係:表演前多咗音樂同跳舞帶動氣氛,每隊有預先排練過嘅開場「Opening」,即興部分需要帶出正面信息,並且由一個團體演出轉變到較爲團隊競爭性質嘅比賽。

長篇即興劇

由一幕幕直接或間接相關嘅即興場景,所組成嘅長篇即興劇。演出時間可以由30分鐘到90分鐘,甚至更長。好似一齣有劇本嘅戲劇,可能係單線或多線劇情,可能有明確嘅劇種風格(例如:莎劇、推理、音樂劇等)。無論係邊一種劇,長篇即興劇嘅演出,一樣係從觀眾嘅建議開始,演出內容冇劇本,亦未經過排練。

參考