原行星雲

原行星雲（protoplanetary nebula，PPN）係一嚿短暫嘅反射星雲，存在喺一粒恆星生命嘅漸近巨星分支時期（asymptotic giant branch phase）同行星狀星雲時期之間嗰段相對短嘅時間之內。

喺漸近巨星分支時期，粒恆星就快要變做巨星，會開始勁喪失質量，射出一大團氫氣；當呢個時期完嗰陣，佢會進入原行星雲時期；一嚿原行星雲受到創造佢嗰粒中央恆星照射，開始射紅外線同反射嗰粒恆星所發出嘅光（所以實係反射星雲），而且由粒恆星嚟嘅星風（stellar wind；指粒恆星噴出嚟嘅物質）會撞擊嚿原行星雲，好多時令到佢嘅形狀變到好似個球體噉；而喺跟住落嚟嘅幾千年之內，嚿原行星雲會隨住粒行星巨星化，變成一嚿行星狀星雲。原行星雲同行星狀星雲之間嗰條邊界係由粒恆星嘅溫度界定嘅：當粒中央恆星嘅溫度升到去開氏 30,000 度嗰陣，佢就有足夠嘅熱度令佢周圍嘅氣體離子化－嚿原行星雲就正式變成一嚿行星狀星雲。