叔梁紇

叔梁紇（前623年—前549年），子姓孔氏，名紇，字叔梁，花名郰人紇、郰叔紇，尊號齊國公、啟聖王，係魯國大夫伯夏個仔、孔子個老豆，佢同時係魯國郰邑大夫。

叔梁紇
私人明細
配偶	施氏
配偶	顏徵在
仔女	孟皮 孔子
父	伯夏

事績

力舉城門

響前563年，晉國嘅荀罃、荀偃同埋士匄帶班諸侯聯手攻偪陽國，但係攻咗幾個月都攻唔到偪陽。呢個時候，孟孫氏嘅家臣秦堇父叫人拉咗架裝備車過嚟，於是偪陽嘅守城士兵就打開城門，而諸侯就乘機進攻。突然之間，偪陽士兵將放底個城門，搞到一啲衝咗入去嘅諸侯士兵走唔返出嚟。於是，叔梁紇用雙手舉起城門，而先前衝咗入去嘅諸侯士兵乘機走返出嚟。孟獻子聽到之後，就讚叔梁紇：「呢個就係《詩經》入面所講嘅『就好似老虎一樣咁有力嘅人』呀。」

護送臧武仲

響556年嘅秋天，齊靈公派兵攻打魯國，其中齊國大夫高厚將魯國大夫臧武仲困響防地，於是叔梁紇夾埋臧武仲個兩個兄弟臧疇、臧賈，帶三百個士兵，漏夜偷襲齊軍，帶臧武仲去旅松，之後先前護送臧武仲返防地。冇幾耐齊軍就退兵返歸。

娶顏徵在做妾

叔梁紇同原配施氏淨係生咗九個女，冇仔，之後叔梁紇娶多個妾，而呢個妾雖然生咗個仔孟皮，但係孟皮隻腳有問題，唔可以做孔家嘅繼承人，叔梁紇就好心急，所以就同魯國顏氏求妾。而顏氏有三個女，而細女叫顏徵在。顏氏將呢件事話咗畀三個女知，之後就話：「邑陬大夫叔梁紇嘅祖先雖然只係士，但佢係古代君王子羨嘅後代。而且佢好高大，武力又好好，我真係好想可以同佢聯婚。雖然，佢年紀唔細而且性格仲好躁，不過呢樣嘢唔可以猶豫。你哋三個入面有邊個可以嫁畀佢做妾？」大女同二女都冇出聲，唯獨三女顏徵在同老豆講：「你講咩我哋就做㗎啦，仲有咩嘢好問呀。」於是顏氏就話：「顏徵在，你就嫁畀佢啦。」

顏徵在同叔梁紇響三個月之後行廟見之禮，正式做叔梁紇嘅妾侍。因為顏徵在擔心叔梁紇年紀太大生唔到仔，於是私自到尼山向尼山神祈禱，祈求生仔。後嚟顏徵在生咗個仔，而佢就係孔子。

死後影響

響前549年，叔梁紇過身，葬響防地。而佢嘅墓地，叫做「梁公林」，位於曲阜市以東14公里，又叫「齊國公墓」、「啟聖林」同埋「啟聖王林」，墳前有塊石碑，上面寫住「聖考齊國公墓」，由第五十二世孫孔元措響金明昌五年（即1194年）做嘅。而響大門前就有一塊碑，上面寫住「大元追封啟聖王墓」，由第五十三世孫孔之嚴寫嘅。

追封諡號

• 大中祥符元年（1008年），追封叔梁紇做齊國公。
• 至順元年（1330年），加封佢做啟聖王。
• 嘉靖九年（1530年），改封佢做為啟聖公。
• 雍正元年（1722年），又返封佢做啟聖王。