命令提示符

命令提示符英文command prompt 或者簡稱 prompt)或者命令提示字元prompt character)係指任何命令行直譯器用來話畀你知佢 「準備就緒,你可以打命令」 嘅字或者符號。

早期日製 PC-8801 嘅命令提示符係 「Ok」

唔同嘅操作系統有唔同嘅命令提示符或者命令提示字元。例如類Unix系統嘅標準命令提示符係一個單一嘅命令提示字元$,表示你係一個用標準介面嘅普通用家,或者%,表示你係用 C shell 嘅普通用家,或者#,表示你目前嘅身份係管理員;CP/MMS-DOScmd.exe 嘅標準命令提示符都係磁碟機名或者路徑名再加>。呢啲操作系統都有提供方法改命令提示符,可以顯示多一啲有用嘅嘢。

唔係操作系統嘅其他命令行直譯器都有唔同嘅命令提示符。例如 Python 嘅標準命令提示符係>>>

早期嘅微型電腦嘅操作系統好多時係 BASIC,好多呢啲系統嘅命令提示符都有 「Ready」 或者 「Ok」 嘅字樣。Apple II 係少數例外,用嘅係單一嘅命令提示字元;> 表示用緊整數 BASIC,] 表示用緊浮點數 BASIC,* 表示用緊監督程式機械語言)。