哈同

哈同（Silas Aaron Hardoon，1851年—1931年6月19號）係19到20世紀初上海嘅一位猶太裔地產大亨。

哈同
出世	1851年 奧斯曼帝國巴格達
死	1931年6月19號 中華民國上海
國籍	英國
職業	商人、上海公共租界工部局董事、上海法租界公董局董事

經歷

哈同喺1851年出世，屋企係巴格達嘅一個貧窮嘅猶太人家庭，原名סאלח חרדון（Sileh Hardoon） 。到1856年佢就跟著父母搬到咗印度孟買，仲加入咗英國籍。佢喺當地入讀咗大衛·沙遜資助嘅慈善學校。到1872年佢一個人去咗香港，第二年轉到去上海入職沙遜洋行，做收租員兼看門口。喺1886年同一位中法混血、篤信佛教嘅煙花女仔羅迦陵拉埋咗天窗。

1930年代嘅南京路

發圍

哈同喺地產界好快就展現咗佢嘅經營天分，喺1887年就成為咗上海法租界公董局董事，1898年又改任上海公共租界工部局董事。到咗1901年佢就離開咗沙遜洋行，自己開咗個哈同洋行專做地產生意。

哈同喺開發經營「上海嘅第五大道」——南京路時獲得咗巨大成功（佢持有著南京路四成四嘅地產），佢出咗60萬兩白銀，用鐵黎木鋪設咗部分嘅南京路，呢個做法唔單止提高咗佢喺上海嘅知名度，仲令佢名下南京路嘅地產大幅咁增值，成為咗上海最富有嘅富翁之一。

名下一啲物業

1904年佢喺靜安寺路買地300畝，使咗70萬兩銀元，起咗上海最大嘅私人花園愛儷園（哈同花園），係典型嘅中式園林。哈同仲好中意中華古典文化，喺花園入邊仲創辦咗倉聖明智大學。

哈同同夫人羅迦陵仲有喺杭州西湖嘅孤山平湖秋月左近，佔咗好大片地，喺1919年起咗個園林建築「羅苑」。羅苑喺1927年被國民革命軍收繳咗，以1銀元租低個地方，喺1928年成立咗國立藝術院。宜家係平湖秋月景點嘅一部分。

身後

哈同夫婦冇生過仔女，哈同係領養咗11個外籍孤兒做養仔女，而羅迦陵就領養咗9個華籍孤兒做内侄仔女。

1931年6月19號哈同喺愛儷園因病離世，留低咗高達一億七千二百萬元（$150,000,000）嘅巨額遺產，單係羅女繳納嘅遺產稅就達1,800萬元。羅女跟著喺1941年過埋身，因兩夫婦留低嘅遺囑有好大出入，引發咗曠日持久嘅哈同遺產案。1954年，中共政府徵用咗愛儷園，重新起過變成中蘇友好大廈（宜家嘅上海展覽中心）。