唐伯虎

唐寅（1470年4月6號—1524年1月7號）係大明文人兼畫家，世人傳佢有才華兼風流而名。後世更多人以字稱佢唐伯虎。佢籍江蘇蘇州吳縣，歷成化、弘治、嘉靖三朝。生喺成化六年二月初四，死喺嘉靖二年十二月初二。字號好多，字伯虎， 後改字子畏，號六如居士、桃花庵主、逃禪仙吏、魯國唐生等。家人死後，服喪哀痛，好友祝允明鼓勵之下，弘治十一年考到應天府解元，然而上京會試後，因程敏政案連累，終生不仕，搬入桃花塢，詩畫一生 。明史有提及，附喺徐禎卿之下，而生平詳記喺唐子畏墓誌並銘，佢好友祝氏寫。

唐伯虎
出生日	1470年4月6號
出生地	蘇州
本名	唐寅
死亡日	1524年1月7號  （53歲）
死亡地	蘇州
國籍	大明
識嘅語言	中文
職業	畫師、詩人
[改維基數據]

唐寅畫上題詩並處名

傳說唐寅，寅年寅月寅日寅時生，並唔真確。祝寫誌銘之中，有提「母丘氏以成化六年二月初四日生子畏、歲舍庚寅、名之曰寅」。故此，只係當年佢亞媽丘氏，以庚寅年而名。佢實情喺庚寅年，己卯月，癸丑日生。時辰無記載。

坊間有說江南四大才子，實情指蘇州，明史寫吳中四才子，吳中即蘇州城別稱。史書咁記「禎卿少與祝允明、唐寅、文徵明齊名、號吳中四才子」。

後世論畫，以佢同沈周、文徵明、仇英合稱明四家，又或吳門四家，以示大明時期，以示吳門畫派。作品以山水畫、人像畫聞名於世。佢畫春宮圖，得名聲「風流才子」。

佢出身自商人世家，但唔以此為業。有亞爸唐廣德，經營唐記酒店。有亞媽丘氏，重有一妹一弟。有妻一人，徐廷瑞次女，弘治元年成婚。不幸弘治七年死老竇又死老婆，弘治八年死老母又死亞妹，淨返細佬。後來續弦兩次。先有何氏，因案而去。後有沈九娘。九娘係佢老婆名，並非後世傳佢娶九個老婆。故此，亦無娶秋香個故仔。

正德九年，事於寧王朱宸濠，做幕賓。得知寧王要造反，詐癲求放走，得以返到蘇州。

民間佢傳說好多，至多人知有《三笑姻緣》，畀人改做大戲、電影唔知幾多次，個形象至深入民心。

出面網頁

• 唐寅畫集