喳咋即係「雜雜」，係葡萄牙語嘅音譯，翻譯過來即係雜糧嘅意思。喳咋最初係由澳門傳入香港，據講喳咋呢個名係源自葡文，係以前駐守喺澳門嘅兵房，將各種豆類煮成一煲糖水來做午餐，噉樣發明出來嘅。後來流傳到阿婆喺街邊擺賣呢種糖水，所以又叫阿婆粥，所以喳咋係正宗嘅澳門食品。
最初嘅喳咋係以各種豆類為主，好似紅豆、綠豆、眉豆、紅腰豆、三角豆等，後來重加入芋頭同西米，集合多種材料煮成。
好多人將「摩摩喳喳」同「喳咋」搞錯，摩摩喳喳係以亞答枳、西米、椰漿、冰塊同各種生果做成嘅冰品糖水，喳咋就係以各種豆類為主要材料。大概係因為噉樣，喳咋逐漸帶有南洋嘅風味，加入椰漿同花奶，令到喳咋帶有濃濃嘅椰香。
而家喳咋重會加入黑糯米，一碗喳咋嘅材料好多，好似八寶粥一樣，香甜味美同時又令人有飽肚嘅感覺，比起食其他甜品健康好多。
