四因說

四因說（英文：four causes），係由古希臘哲學家阿里士多德提出，佢將世界上事物嘅變化同運動嘅背後原因（古希臘文：αἴτιον）歸納成四大類。四因包括有：

1. 質料因（Matter - material cause）：即係構成事物嘅材料、元素或者基礎嘅質料，例如磚頭同瓦片就係屋嘅質料因；
2. 形式因（Form - formal cause）：即係決定事物「係用咩」本質嘅屬性，或者講決定呢樣嘢「係噉嘅樣」，例如建築師心目中間屋嘅樣，就係呢間屋嘅形式因；
3. 動力因（Agent - moving cause或efficient cause）：即係構成事物嘅動力。例如，建築師就係起屋嘅動力因；
4. 目的因（End或purpose - final cause）：即係事物所追求嘅目的，例如「為咗安置人同埋財產」就是一間屋嘅目的因。

阿里士多德認為，凡係感性嘅實體，包括埋自然物同人造物，佢哋都具備呢四種原因。

來源

喺阿里士多德嘅著作形而上學（Metaphysics）入面，一開始就解釋咗四因說，呢本書係探討個人經驗之上嘅事物原理（principle）同原因（cause），並認為呢啲知識先係智慧（wisdom），因為呢啲知識比感官經驗更加難得，佢哋可以解釋宇宙萬物，而唔單止係單一嘅個體。（第一冊，第三章）然後，佢說明咗原因嘅四種涵義，並根據呢樣嘢去解釋或者批評以前哲學所論述嘅原因，提到嘅先哲包括蘇格拉底、阿那克斯美尼、第歐根尼、希帕索斯、赫拉克利特、恩培多卡勒、阿那克薩哥拉、巴門尼德、克拉佐門尼嘅赫爾摩底謨、畢達哥拉斯學派、麥里梭、色諾芬尼、以及佢嘅老師柏拉圖，喺第一冊，第六章，佢根據自己嘅四因說批評柏拉圖嘅理型論，正式同佢老師嘅學說分開。

喺第八冊，第四章Wayback Machine嘅版面存檔備份中，阿里士多德提出解釋原因嘅方法：既然原因有各種唔同嘅含義，就將所有原因都應該說明，於是就有質料因、形式因、動力因、目的因。

喺《物理學》（Physics）嘅第二冊，第三章Wayback Machine嘅版面存檔備份中，阿里士多德用咗四因說嚟建立物理學嘅論述方法。最後佢強調話：

τὰ μὲν οὖν αἴτια σχεδὸν τοσαυταχῶς λέγεται.
This then perhaps exhausts the number of ways in which the term 'cause' is used.
呢啲都係 αἴτια 嘅各種說法。

「原因」、「理由」、同「解釋」

喺阿里士多德嘅著作入面，「原因」（cause）呢個詞嘅原文係古希臘文αἴτιον（希臘文：aition），另一個用到嘅近似詞係αἰτία（aitia），呢個字係有「原因」 （cause）同「理由」（reason）呢兩個意思。呢兩個詞互相出現，當搵呢樣嘢嘅原因時，就用αἴτιον，當要解釋呢樣嘢時，就用αἰτία，例如 ：

ὅταν δή τις ζητῇ τὸ αἴτιον, ἐπεὶ πλεοναχῶς τὰ αἴτια λέγεται, πάσας δεῖ λέγειν τὰς ἐνδεχομένας αἰτίας. οἷον ἀνθρώπου τίς αἰτία ὡς ὕλη; ἆρα τὰ καταμήνια; τί δ᾽ ὡς κινοῦν; ἆρα τὸ σπέρμα; τί δ᾽ ὡς τὸ εἶδος; τὸ τί ἦν εἶναι. τί δ᾽ ὡς οὗ ἕνεκα; τὸ τέλος.

So whenever we inquire what the cause is, since there are causes in several senses, we must state all the possible causes. E.g., what is the material cause of a man? The menses. What is the moving cause? The semen. What is the formal cause? The essence. What is the final cause? The end.

一般認為 αἴτιον 同 αἰτία 都係同義詞，所以都翻譯為「原因」。但係有啲學者認為，將 αἰτία（aitia）都翻譯為「原因」係一個誤導（雖然唔係好嚴重），應該將佢翻譯為「解釋」先啱 。亦即係，阿里士多德佢係探討緊事物原因嘅各種合理解釋方法，而呢種合理解釋係人類嘅理智可以達成同埋理解，呢個原則畀經院哲學嗰陣嘅湯瑪斯阿奎那繼承咗。

後續發展

中世紀歐洲經院哲學時期嘅湯瑪斯阿奎那承繼咗阿里士多德嘅知識論，而且對四因說做咗進一步嘅發展（睇吓因果關係）。

培根喺佢著作《新工具論》入面反對四因說，認為佢只不過「同人嘅本性有關，而唔係同宇宙嘅本性有關；由呢度開始，哲學就畀呢種奇怪嘅方式玷污咗 。」

儒家對四因說嘅解釋

中國哲學家牟宗三提出，《中庸》記載到「誠者，物之終始，不誠無物」 。牟宗三認為，由成物之始嘅角度嚟睇，就係亞氏嘅「動力因」；由成物之終角度嚟睇，就係亞氏嘅「目的因」。一物嘅完成，就包含咗「形式因」；而終始就緊扣喺「物」嘅上面，就係「質料因」。噉樣睇，誠體就貫穿咗終始嘅過程。牟宗三就係噉樣解釋咗阿里士多德嘅四因說。

睇埋

• 哲學