四巨頭，又叫四警察，係指第二次世界大戰後期同盟國差唔多打贏嗰陣，對同盟國四大國：大英帝國、美利堅合眾國、蘇維埃社會主義共和國聯盟同中華民國嘅稱呼。
嗰時美國總統羅斯福期望四國一齊維持世界和平同秩序，做「世界警察」。但二戰打完無耐，中華民國中國國民黨受國共內戰困擾，俾中國共產黨霸咗大半壁江山；大英帝國嘅殖民地又接住搞獨立而面臨瓦解，令世界得返美國、蘇聯兩個超級大國，實現唔到四巨頭嘅諗法。
