蘇聯

 蘇維埃社會主義共和國聯盟（粵拼：sou1 wai4 oi1 se5 wui2 zyu2 ji6 gung6 wo4 gwok3 lyun4 mang4） （簡稱蘇聯；俄文：Союз Советских Социалистических Республик，縮寫：СССР，拉丁轉寫：Soyuz Sovetskih Sotsialisticheskih Respublik，1922年12月30號—1991年12月26號），曾經係世界上土地面積最大嘅國（22,402,200 km²），佔有東歐嘅大部份，以及幾乎成個中亞同北亞；陸地同挪威、芬蘭、波蘭、捷克斯洛伐克、匈牙利、羅馬尼亞、土耳其、伊朗、阿富汗、中國、蒙古同埋朝鮮接壤；而同瑞典、日本、美國同埋加拿大隔海相望。

國旗

二戰之後嘅領土

根據蘇聯憲法，蘇聯係聯邦制國家，由 15 個平等權利嘅蘇維埃社會主義共和國（加盟共和國）照自願聯合嘅原則組成，由蘇聯共產黨領導，首都係莫斯科。國家元首係蘇聯最高蘇維埃主席團主席同蘇聯總統。政府首腦係部長會議主席（總理），實際嘅最高領導人係蘇聯共產黨中央委員會總書記。武裝力量稱為蘇聯紅軍。國歌係蘇聯國歌。

蘇聯係第二次世界大戰主要戰勝國，故此喺解體前係聯合國安全理事會常任理事國，有權否決議案。喺蘇聯解體之前，即係冷戰時期，蘇聯同美國一樣都係超級大國，蘇聯代表社會主義，而美國就係代表資本主義。兩國喺世界上都有好大嘅影響力，而且成日有衝突，例如韓戰、越戰、古巴飛彈危機。

1991年，蘇聯解體，冷戰先正式結束。

國名來源

蘇聯嘅全名係蘇維埃社會主義共和國聯盟。蘇維埃（俄羅斯話：совет）係由俄羅斯文音譯嘅詞語，佢嘅意思係工人委員會。[1]

出面網頁

• "Union of Soviet Socialist Republics* - Countries - Office of the Historian" (英文). 美國國務院.