琴棋書畫

琴棋書畫係指「琴」、「棋」、「書」、「畫」四種技巧同藝術，合稱四藝。四藝深受古代漢字儒家文化圈嘅傳統文人所推崇，佢哋認為四藝係文人墨客、騷人雅士、名門閨秀所必須掌握嘅四種技藝。四藝最初喺起源地（中原地區）係指古琴（最早係指五弦琴；之後以七弦琴為主）、圍棋、書法、繪畫（丹青）。傳播到東亞、東南亞等其他地方之後，四藝實際上所指嘅技藝，因應各地情況有啲調整。

出處

唐朝嘅張彥遠喺《法書要錄》卷三嘅「唐何延之《蘭亭記》」話：「……禪師年近百歲乃終，其遺書並付弟子辯才。辯才俗姓袁氏，梁司空昂之玄孫。辯才博學工文，琴棋書畫，皆得其妙。每臨禪師之書，逼真亂本。……」

清朝吳敬梓喺《儒林外史》第五十三回《國公府雪夜留賓，來賓樓燈花驚夢話》：「……又有那一宗老幫閒，專到這些人家來替他燒香、擦爐、安排花盆、揩抹桌椅、教琴棋書畫。……」

清朝嘅曹雪芹嘅《紅樓夢》第五十四回《史太君破陳腐舊套，王熙鳳效戲彩斑衣》：「…… 這李鄉紳膝下無兒，只有一位千金小姐。這小姐芳名叫做雛鸞，琴棋書畫，無所不通。……」

• 
  琴
• 
  棋
• 
  書
• 
  畫

琴

七弦古琴

琴係指古琴，古琴係一種古老嘅弦樂器，喺《詩經》嗰度好多時會同「瑟」一齊提起，例如《詩經‧小雅‧鹿鳴之什‧常棣》嗰度講嘅「妻子好合，如鼓瑟琴」、《詩經·國風·周南·關雎》嗰度講嘅「窈窕淑女、琴瑟友之」、《詩經‧國風‧鄭‧女曰鷄鳴》嗰度講嘅「琴瑟在御，莫不靜好」等等。琴同瑟都係先秦時期嘅主要演奏樂器，琴通常係五條弦或者後嚟嘅七條弦，聲音清脆優雅，而瑟通常有二十五條弦動聽，聲音比較低沉。 根據東漢桓譚嘅《新論·卷十六·琴道篇》「昔神農氏……削桐爲琴，絲爲絃，……五絃第一絃爲宮，其次商、角、徵、羽，文王、武王各加一絃，以爲少宮、少商，……。」可能見到最早嘅琴係用梧桐樹嘅木頭做嘅，只有五絃，分別可以彈到宮、商、角、徵、羽，總共五個音，後嚟文王、武王每人加多咗一條絃，係少宮、少商（比宮、商都高八度）。 《禮記·曲禮下》話「君無故，玉不去身；大夫無故，不徹縣；士無故，不徹琴瑟」，可以睇到樂器嘅地位有幾高，同埋琴瑟對「士」嘅重要性。從漢朝到六朝，鍾意聽古琴或者善於演奏古琴嘅文人墨客好多。除咗上面提過嘅桓譚之外，後漢嘅馬融、蔡邕，魏國嘅嵆康，東晉嘅戴逵。總而言之，就好似唐朝杜佑嘅《改定樂章論》話「古之天子諸侯卿大夫，無故不撤樂，士無故不去琴瑟，以平其心，以暢其誌，則和氣不散，邪氣不幹，此古先哲後立樂之方也。」

棋

明代圍棋棋手版畫

古代講嘅棋，最初係指圍棋。圍棋係一種兩人嘅策略性棋類遊戲，用格狀嘅棋盤同埋黑白兩種顏色嘅棋子嚟對弈。圍棋喺古代叫「弈」、「碁」、「手談」等，日本叫「碁」，英文用咗日文嘅音譯，叫做「Go」。圍棋可能係世界上最古老嘅棋類遊戲之一，相傳係堯帝喺四千幾年前發明嘅，根據張華嘅《博物志》「堯造圍棋以教丹朱」，堯帝設計咗圍棋呢種遊戲，用嚟陶冶佢個仔丹朱嘅性情，令佢唔好咁任性、暴躁同驕傲；不過《史記·五帝本紀》只提到「堯知子丹朱之不肖，不足授天下，於是乃權授舜丹朱學圍棋呢單嘢，所以好可能「堯造圍棋以教丹朱」呢件嘢只不過係傳說。

而最早關於圍棋嘅可靠記載係喺春秋時期嘅《左傳》，根據《春秋左氏傳·襄公·廿五年》話：「……詩曰．夙夜匪解．以事一人．今甯子視君．不如弈棋．其何．以免乎．弈者舉棋不定．不勝其耦．而況置君．而弗定乎．必不免矣．九世之卿族．一舉而滅之……」，而《春秋左傳註疏·襄公·廿五年》提到：「……以子圍而相殺，故謂之圍棋……」根據東漢桓譚嘅《新論·卷十四·述策篇》話：「世有圍棋之戲，或是言兵法之類也及爲之上者，張碁疏遠，置以會圍，因而伐之，成多得道之勝。」，可見當時嘅圍棋玩法同依家嘅玩法無乜唔同。而戰國時期嘅弈秋係史籍出現過嘅第一個棋手；喺《孟子·告子上》嗰度提到孟子曰：「……今夫弈之為數，小數也；不專心致志，則不得也。弈秋，通國之善弈者也。使弈秋誨二人弈：其一人專心致志，惟弈秋之為聽；一人雖聽之，一心以為有鴻鵠將至，思援弓繳而射之。雖與之俱學，弗若之矣。為是其智弗若與？曰：非然也。」意思係捉棋呢種小技藝，唔專心就學唔識，就算係弈秋呢個各國之中最叻嘅捉棋能手，如果俾兩個人佢去教捉棋，一個專心聽弈秋嘅話，另一個雖然都係有聽，不過個心就成日諗住其他嘅嘢。咁樣，即使佢哋一齊跟同一個人學，佢哋嘅成績亦都一定會好唔同，唔專心嗰個一定無咁叻。佢唔叻，係唔係因為佢嘅智慧比唔上另一個？當然唔係。

書

馮承素臨摹嘅王羲之《蘭亭集序神龍本》‬

收藏喺東京國立博物館嘅小野道風《智証大師諡号勅書》

四藝裏面講嘅「書」係指「書法」，書法係一種古代嘅傳統藝術，而漢字為基礎嘅書法，因為單字嘅數量多，所以同以字母為基礎嘅西式書法好唔同，而書寫工具亦都好唔同。漢字書法係用毛筆嚟寫字，至於字體，可以係楷書、草書，甚至係現代嘅藝術字體，亦都可以係先秦嘅大篆體、秦朝秦始皇「書同文」之下嘅小篆、兩漢期間流行嘅隸書同行書之類比較古舊嘅書體。講開書法，唔可以唔提書法家。提起書法家，一定會諗起王羲之、歐陽詢、顏真卿、柳公權等人。有書聖之稱嘅東晉書法家王羲之，可惜佢嘅真跡早已失傳，佢喺公元353年（永和九年三月三日），50歲嘅時候寫嘅《蘭亭集序》係最多人模仿嘅書法，係書法嘅經典傑作，有「行書第一」嘅稱號。除咗有324字嘅《蘭亭集序》之外，王羲之晚年寫嘅《快雪時晴帖》，呢幅只有28個字嘅書法亦都有好多人模仿，現存年代最久遠嘅摹本係收藏喺臺北國立故宮博物院嘅唐代精摹本。

而最初由仿效王羲之開始，最終成為「唐代四大書法家」之一嘅隋末唐初嘅官員歐陽詢，佢嘅歐體楷書法度嚴謹，筆力險峻，有「楷書極則」同「唐人楷書第一」嘅稱譽，佢嘅代表作係《九成宮醴泉銘》。《九成宮醴泉銘》係唐代皇帝李世民為咗紀念九成宮發現咗泉水，而命令宰相魏徵撰文，然後叫歐陽詢寫嘅銘文。同樣俾人列入「唐代四大書法家」嘅顏真卿同柳公權亦都係好多人臨摹嘅對象。顏真卿嘅顏體楷書，端莊雄偉，氣勢開張，佢嘅代表作係《多寶塔碑》；除咗楷書，顏真卿嘅行草書亦都好出名，代表作係喺國立故宮博物院嘅真跡《祭姪文稿》，元朝嘅著名書法家鮮于樞話呢篇係「天下第二行書」。而比較後期嘅柳公權流傳在世嘅作品大約有二十件，而部分嘅真偽係有爭議嘅；柳公權嘅柳體楷書就清健遒勁，結體嚴謹，筆法精妙，筆力挺拔，佢嘅代表作係《玄秘塔碑》同《神策軍碑》。

日本嘅書法（書道）受到中國唐朝書法風格嘅影響好大，平安時代（公元794至1192年）初期嘅三筆（即係三個最出名嘅書法家：空海、嵯峨天皇、橘逸勢）都係學唐朝（公元618至907年）書法，特別係學王羲之嘅筆墨工夫。日本嘅書道由最初嘅完全係用漢字楷書，到「平安時代」嘅「和樣化」，例如「仮名書道」。而講到最早推行「和樣化」嘅人，就係小野道風。小野道風同藤原佐理、藤原行成，呢三個人俾後世叫做「三跡」。之後唔同朝代嘅「三筆」，雖然有自己嘅風格，多多少少都受到平安三筆、平安三跡，同埋唐朝書法嘅影響。同中原歷朝唔同，日本嘅書法家好多都係和尚，而中國歷朝歷代嘅出名書家好多都係朝廷官員，甚至係掌握國家軍政大權嘅重臣。而書法風格方面，日本書法主要係行書同草書，楷書比較少見，篆書、隸書就更少。

畫

北宋畫家李公麟嘅《五馬圖》呢度只顯示咗圖畫部分

唐代吳道子嘅《送子天王圖》

大和繪《源氏物語繪卷（東屋）》

大和繪《「山水屛風」（神護寺）》 嘅一部分

四藝講嘅畫係指「國畫」，係一種用毛筆、墨、宣紙（或者絹）嚟畫嘅人物、山水、花鳥等。「國畫」分為工筆畫同寫意畫兩大類。

工筆畫係一種中國畫嘅畫法，講究技巧工整細緻。工筆畫起源於戰國時期嘅帛畫，喺唐代最流行，明末之後嘅工筆畫受到西洋繪畫技法嘅影響，造型更加準確。工筆畫又可以再細分成工筆白描同工筆重彩兩大分類。工筆白描一般係黑白畫，唔會上顏色，只係用毛筆同墨水嚟畫，代表作有曾經喺東京國立博物館展出嘅北宋著名畫家李公麟創作嘅《五馬圖》，同埋收藏喺日本大阪市立美術館嘅唐代吳道子根據佛經《瑞應本起經》創作嘅《送子天王圖》（又叫做《釋迦降生圖》）。工筆重彩係用重彩做顏料，重彩嘅意思係天然礦物質顏色，例如石青、石綠、硃砂、蛤白等。典型嘅工筆重彩畫有收藏咗喺湖南省博物館，1972年喺湖南省長沙市東郊嘅馬王堆漢墓陪葬品之一嘅《馬王堆一號漢墓帛畫》。從內容嚟睇，工筆畫又可分為：山水、花鳥、人物三大種類。

某程度上同工筆畫相對嘅係寫意畫。寫意畫嘅特色係單純要求神似，用簡練嘅筆法去描繪景物，唔要求畫到啲好清楚嘅細節，好多時仲會用撥墨嘅方法大刀闊斧咁去畫一啲大面積嘅地方。典型例子就係收藏咗喺台北國立故宮博物院嘅南宋畫家梁楷畫嘅《潑墨仙人》。

喺古代，特別係漢朝到明初，中原係東亞傳統藝術同文明嘅中心，對周邊國家嘅影響好大，所以古代日本繪畫亦都受到國繪畫嘅影響，特別係隋唐時期，日本叫呢啲繪畫方法做唐繪。不過，晚唐之後，中國局勢好唔穩定，日本取消咗派「遣唐使」到大唐，唐朝對日本嘅影響就慢慢咁消退咗，日本就自己發展咗「大和繪」。當局勢穩定之後，日本嘅繪畫又再受到咗中原嘅影響，不過後期亦都慢慢受到西方油畫嘅影響，開始學識焦點透視等西方技巧，所以日本繪畫可以話係集中、西、和於一身。