王羲之（303年—361年），字逸少，係一位東晉嘅書法家，精通好多種書體，俾人叫做書聖。王羲之做官做到右軍將軍，所以又有人叫佢做王右軍。佢最出名嘅書法作品係《蘭亭集序》，有「天下第一行書」嘅稱號。
| 王羲之 |
|---|
 |
| 字 | 逸少 |
|---|
| 出世 | 303年
琅邪郡臨沂縣（山東） |
|---|
| 死 | 361年（57–58歲）
會稽郡剡縣金庭（浙江） |
|---|
| 別名 | 書聖
王右軍 |
|---|
| 職業 | 書法家
右軍將軍 |
|---|
| 活躍時期 | 東晉 |
|---|
| 知名作品 | |
|---|
| 配偶 | 郗璿 |
|---|
| 仔女 | 7仔1女 |
|---|
| 父母 | |
|---|
王羲之喺西晉太安二年（公元303年）出世，鄉下係琅邪郡臨沂，家下屬於山東省。琅邪王氏係魏晉時期嘅名門望族，出過唔少達官貴人。例如王羲之阿爺王正就做過尚書郎，太爺王覽做到光祿大夫，王羲之個伯父王導後來仲做埋東晉嘅丞相。[1][2]
王羲之老竇叫王曠，阿媽係衛氏，仲有個阿哥叫王籍之。西晉末年嘅八王之亂政治内鬥嗰陣，王羲之老竇第一個提議後來嘅東晉開國皇帝司馬睿南遷。[1]於是喺王羲之十歲嗰年，佢全家就同其他士族一齊跟住司馬睿渡江走佬，搬咗去依家南京嗰頭。
王羲之喺廿一歲嗰年娶咗太尉郗鑒個女郗璿做老婆。據講當時郗鑒派人去王府睇下邊個啱做佢女婿，啲王氏子弟就個個執到姿姿整整噉等住俾佢揀中。唯獨係王羲之一個人攤咗喺東面張床度，仲突住個肚食嘢，成幅闊佬懶理噉嘅樣。郗鑒知道咗之後，好欣賞佢份人又真又豁達，就決定嫁個女俾佢。[1][3]成語「東床快婿」就係噉嚟嘅，依家用嚟比喻一位好女婿。[4]
王羲之後來同佢老婆一共生咗七個仔、一個女，其中有幾個寫書法都唔錯。[1]佢細仔王獻之都係一位好出名嘅書法家，佢哋兩父子喺書法界合稱叫「二王」。[2]
王羲之廿三歲開始做官，開初做嘅係秘書郎，負責執宮入面啲藏書。佢之後又做過江州刺史、將軍幕僚呢啲細官仔，但就係噉拒絕朝廷嘅徵召，唔肯入朝做侍中或者吏部尚書。[1]比起其他差唔多家族背景嘅人嚟講，其實王羲之嘅仕途開始得算遲。有人話噉係因為佢同佢伯父王導政見不合，而王導係東晉大官，所以王羲之入朝拖得就拖。
- ↑ 1.0 1.1 1.2 1.3 1.4 房玄齡; 等, 編 (2003) [648]. 〈列傳第五十．王羲之〉. 《晉書》.第80卷. 北京國學時代文化傳播有限公司.
- ↑ 2.0 2.1 蘇智恆 (2018年6月). 《歷代名人全傳》. 北京: 團結出版社.
- ↑ 黃智溶 (2013). 《韻高千古--王羲之研究》 (論文). 宜蘭: 佛光大學.
- ↑ 教育部國語推行委員會 (2021年11月). 〈東床快婿〉. 出自 國家教育研究院 (編). 《教育部國語辭典簡編本》 (第3版).
