民族主義

民族主義（粵語：Man⁴ zuk⁶ zyu² ji⁶；英文： Nationalism），又叫做國族主義或國家主義，係包含民族、種族同國家三種認同在內嘅意識形態，主張以民族做人類群體生活嘅「基本單位」，去形塑特定文化同政治佩理念基礎。

民族主義嘅核心思想係主張一個民族－一個有住共同語言文化同血統嘅群體－應該要喺一塊屬於佢哋嘅土地上面建立一個有自主能力嘅主權國家，唔受其他政權嘅控制。所以民族主義同民主自決有好大關係。而且因為民族主義係用共通語言文化嚟維繫嘅，所以現代嘅民族國家－東方嘅日本同南韓；西方嘅歐洲列國－都會努力保護自己民族嘅語言文化傳統，嚟去建立自己民族嘅身份認同；相反，非民族國家就成日都會靠住破壞領土入面嘅「異族」語言文化遺產，嚟去撳低自己境入面可能出現嘅民族主義：例如蘇聯就曾經迫國內嘅其他族裔唔准講俄文以外嘅語言；大日本帝國亦都試過迫佔領區嘅人轉講日文。除咗呢樣，民族國家亦都會宣揚自己民族嘅成就嚟去建立民族自豪感。但係另一方面，民族主義有時會令人有排外情緒，所以呢樣嘢係有好有唔好嘅。