土地審裁處
土地審裁處（英文：Lands Tribunal）係香港司法機構之一，根據（香港法例第17章）《土地審裁處條例》而設立，有四位專業法官，包括由一名高等法院原訟法庭法官出任嘅土地審裁處庭長，同埋由三名區域法院法官出任嘅土地審裁處法官。審裁處重有兩位身為認可測量師嘅審裁處成員。庭長同法官可以單獨或會同審裁處成員審理案件，審裁處成員亦可以單獨審理案件。
司法管轄權
編輯土地審裁處具有司法管轄權，可以審理同判定以下幾大類案件：
收回管有權案件
編輯土地審裁處有權力裁定業主根據（香港法例第7章）《業主與租客（綜合）條例》或普通法而提出嘅收回樓宇管有權申請。呢類申請，審裁處除咗可以作出收回管有權嘅命令之外，亦有權作出繳納租金同中間收益嘅命令，處置租客遺留喺樓宇內嘅任何財物，同根據違反租賃或分租租賃嘅條件作出支付損害賠償嘅命令。
建築物管理案件
編輯土地審裁處有權力裁定建築物管理嘅爭議，包括有關（香港法例第344章）《建築物管理條例》同公契解釋同執行嘅爭議，委任或解散管理委員會，召開業主大會同委任管理人等事宜所引起嘅爭議。
補償案件
編輯當政府因為進行公共發展而根據有關條例強制收返某啲人士嘅土地，或令到佢哋嘅土地減值，審裁處有權力裁定政府需要支付嘅補償款額。
強制土地售賣案件
編輯多數份數業主根據（香港法例第545章）《土地（為重新發展而強制售賣）條例》為售賣土地作重新發展而提出申請，審裁處有權力作出裁定。
上訴案件
編輯任何人士根據（香港法例第116章）《差餉條例》、（香港法例第515章）《地租（評估及徵收）條例》同（香港法例第283章）《房屋條例》提出上訴，審裁處有權力作出裁定。
土地審裁處喺行使司法管轄權嘅時候，具有同高等法院原訟法庭相同嘅權力，可以授予衡平法或普通法嘅補救同濟助。