地理學第一定律

Waldo R. Tobler嘅地理學第一定律（英文：Tobler's first law of geography）講嘅係「所有嘢都同第啲嘢有關係，但係近嘅嘢嘅關係大過遠嘅嘢」。呢個第一定律係空間相關性同空間自相關性呢啲基本概念嘅基础，特別係應用喺空間插值中嘅反距離加權方法，並且支撐咗克里格法嘅區域化變量理論。佢係大衛休謨鄰近法則嘅現代表述。

托布勒係1969年舉行嘅國際地理聯合會定性方法委員會會議上首次提出咗呢個開創性嘅諗法，後尾佢喺1970年將呢個諗法發表出嚟。雖然講出嚟好簡單，但是呢個諗法嘅意義深遠。如果無呢樣嘢，「原則上地球表面任何地方嘅各種狀況都能夠喺任何細區域裏便出現。通過賦予屬性畀面狀對象嚟描述佢嘅近似均質嘅區域將唔會存在。地形表面會亂晒坑咁，度度都係無窮大嘅坡度，並且啲表面嘅輪廓會無限密集兼且扭曲。空間分析，甚至乎生活本身，都係冇可能嘅。」

而地理學第二定律就冇咩人知道，呢個係對第一定律嘅補充：「興趣區域（研究關注嘅區域）出便嘅現象會影響入便發生嘅嘢」。

基礎同背景

呢個理論係基於距離摩擦嘅概念，即「距離本身阻住咗地點之間嘅相互作用。兩個地方相距越遠，障礙或成本就越大」。例如，同行路去街坊嘅士多買三文治相比，人們冇乜理由穿過成個城鎮去買一樣嘅三文治。呢個例子中，障礙或成本可以攞時間（時間量同時間值）、交通成本同埋個人肌肉能量損失嚟計，呢啲都要加埋到買三文治嘅價錢裏便，令到摩擦比較高。距離嘅摩擦同成本嘅增加共同導致咗距離衰減效應。