城巴創富道車廠

城巴創富道車廠（CTB Chong Fu Road Depot，代號為CFD），原名新巴創富道車廠（NWFB Chong Fu Road Depot），又稱「新巴柴灣車廠」，俗稱「創富廠」，係舊時香港新世界第一巴士嘅主要維修車廠，而家由城巴用。車廠位於柴灣創富道8號，鄰近杏花邨、城巴柴灣車廠同港鐵柴灣車廠。

喺柴灣創富道嘅新巴、城巴總部同車廠

呢個車廠係多層式建築，佔地13,000平方米，並附設有寫字樓（代號為CFO），新創建集團嘅交通服務總部設係該車廠度。由於新巴同城巴嘅總部設喺呢個車廠，因此新巴同城巴勞資雙方經常喺呢個車廠就薪酬待遇等問題進行談判。

歷史

1998年，新巴獲政府批准承接營運中巴88條港島區巴士線嘅專營權。由於新巴係新成立嘅巴士公司，為確保港島區嘅巴士服務能夠順利交接，喺政府協調下，新巴除咗買入中巴原有嘅大部分巴士外，重租用中巴嘅柴灣車廠作為車輛嘅維修中心，新巴同時又向政府申請土地建設自己嘅車廠。香港政府喺2000年批出位於柴灣創富道嘅土地畀新巴建立新車廠，新巴創富道車廠喺2001年建好，2002年2月2號正式啟用，以取代由新巴向中巴租用嘅柴灣車廠功能。

創富道車廠啟用之後，新巴嘅總辦事處亦由柴灣東部嘅八號商業中心搬入車廠內，並一直沿用到依家。新巴母公司新創建集團收購城巴之後，城巴嘅總辦事處亦由上環京光商業中心13搬遷入嚟。新創建交通服務入股冠忠巴士集團之後，冠忠巴士嘅總辦事處亦設喺呢個車廠嘅3樓同4樓。

設施

• 提供多元化工程服務，包括主要零件（如引擎、波箱及空調系統）嘅翻修、多項嚴謹嘅維修工作，同新巴士裝嵌工程。
• 採用防滲漏嘅雙層外殼地底油缸，以免污染環境。
• 每條維修車坑都設有一條十二米長、可接駁巴士死氣喉嘅抽風管，減少工人喺巴士啟動引擎後進行維修嗰陣吸入廢氣。
• 車廠已裝設好滅聲裝置，確保廠內噪音唔會影響附近民居。