城巴

城巴有限公司（英文：Citybus Ltd，港交所前編號：0523）係香港嘅一間專利巴士公司。城巴經營好多條香港島、香港海洋公園、沙田第一城、香港迪士尼樂園觀光線同香港國際機場嘅巴士路線，佢亦都有提供巴士租賃服務。

歷史編輯

城巴有限公司前身Passenger Transportation Services (Asia) Limited喺1977年由李日新（前中巴同埋城巴董事總經理，2006年2月底退休）創立，喺香港提供公共交通管理顧問服務。及後喺1979年，公司開始營運非專利巴士線，並冠以城市巴士（City Buses，後來改為家下嘅城巴、Citybus）稱號，包括香港船塢員工接送車服務。及後喺1981年開辦屋邨巴士線62R，來往沙田第一城同埋九龍塘地鐵站（而家嘅九龍塘港鐵站）。冇幾耐之後又同香港海洋公園合作，經營來往海洋公園嘅收費穿梭巴士服務。

Passenger Transportation Services (Asia) Limited喺1983年改名做城巴有限公司。

1980年代中，來往中港兩地嘅人流大增，城巴推出來往中國大陸同埋香港嘅直通巴士服務，呢項服務直到2001年因不敵後繼者而停辦。1985年，城巴更自英國買入新嘅利蘭奧林比安冷氣巴，行中港直通巴士線，為日後香港冷氣巴普及化打下基礎。城巴亦提供合約以及私人巴士租賃服務，其中包括為電視廣播有限公司提供員工接載服務。

1987年，城巴俾北海集團收購，其後得到北海集團注資，買咗多架利蘭奧林比安冷氣巴去取代旗下大部分二手車。隨住港島巴士公司——中巴服務水平日漸下降，城巴將業務重點集中喺港島，喺中巴大罷駛期間開辦屋邨巴士線，鞏固港島區業務嘅根基。同時城巴同港府商討進軍專利巴士市場，最後港府喺1991年批出一條已經俾中巴取消咗幾年、行走香港島中半山嘅巴士線12A畀城巴，令城巴喺短短10年間由細規模嘅巴士公司，搖身一變成為香港專利巴士公司之一。城巴投得呢條中半山巴士線之後，就立即派出新型冷氣巴行嗰條線。港府喺1993年決定將中巴26條巴士線攞出去公開競投，城巴成功投得專營權（Network 26 新里程）；1995年港府再削減14條中巴路線，直接交畀城巴營運。城巴喺幾年間大幅擴張，買好多冷氣巴，搶佔大量原中巴客源，令中巴嘅整體客量不斷萎縮。

中巴專營權喺1998年 9月1號完咗之後，港府再批出12條路線畀城巴，其餘路線嘅經營權就畀咗新世界第一巴士。

除咗港島區服務之外，城巴亦經營其他地區嘅巴士業務，好似喺1997年開始行使十幾條機場以及北大嶼山巴士路線的經營權。雖然係噉，港島區始終都係城巴嘅主要服務範圍。

1996年11月，北海集團將城巴分拆上市（港交所冧巴0523）。1999年，城巴俾英國第二大巴士公司 — Stagecoach Group收購。

2000年，城巴同九龍巴士屬下嘅路訊通合作，喺幾百架巴士上安裝液晶體電視屏幕，播放預錄節目。

2003年 6月9號，Stagecoach因為嗰年嘅沙士疫情以及香港政府以鐵路為主嘅政策而無意繼續投資香港市場，宣佈將城巴賣畀新創建集團，令新創建同時擁有新巴同埋城巴，港島區巴士激烈競爭就告一段落。兩巴及後推出路線重組、八達通轉乘優惠等等，並進行後勤人手編制、管理以及資源合併等等，以節省資源。

城巴同新巴自2005年 6月1號起，推出八達通「即日來回證」計劃，同時亦推出跨越城巴同埋新巴嘅八達通轉乘計劃，令八達通卡持有人搭城巴或者新巴路線，可以以優惠價轉對方嘅特定路線。

城巴亦係首間用全球定位系統提供自動報站嘅巴士公司，自1998年起喺城巴機場快線嘅巴士上面用。2006年起，城巴亦陸續試驗新一代全球定位系統自動報站系統，其中2006年中引入，城巴機場快線A10嘅系統，更計劃容許乘客透過手提電話向城巴發送短訊，然後城巴回一個預計到站時間嘅短訊。2007年1月，另一套系統亦開始喺11、12、511線嘅MAN單層巴度用。

2007年 7月1號深港西部通道正式啟用當日，城巴開辦兩條由屯門往來深圳灣口岸公共運輸交匯處嘅專利巴士路線，分別係來往屯門碼頭嘅B3線，以及來往屯門市中心嘅B3X線。

2020年10月，城巴同新巴業務由新創建集團賣咗畀由Templewater Bravo Holdings Limited、Ascendal Group Limited同埋漢思能源組成嘅財團^[1]，成為匯達交通嘅一部分^[2]。

2023年7月1號起，新巴嘅專營權同業務併入城巴。