基督教青年會
基督教青年會（Young Men's Christian Association，簡稱YMCA），係基督教非政府性質嘅國際社會服務團體，喺1844年成立。目標係發揚基督精神，團結青年人，養成完美人格，建設完美社會。根據社會人群（尤其是弱勢群體）嘅需要，從事各種各樣嘅社會服務工作。呢啲服務工作，都係以「促進大眾德、智、體、群全人成長」嘅理念作為導向。服務人群冇分性別、年齡、國籍、種族同宗教信仰。服務工作有平民教育、體育康樂、營地服務、社區服務、青少年工作、難民工作、就業服務等等，有啲青年會重會開設價格低廉嘅旅舍同賓館。「基督教青年會」唔係一個傳教組織，亦唔係一個慈善機構。主要以傳遞愛心為使命，倡導同推動承擔社會責任同促進社會和諧。
起源 編輯
基督教青年會係由一位英國青年基督徒佐治衛良（George Williams）1844年喺英國倫敦成立。佐治衛良出生於英國農村，以務農為生。喺佢16歲嗰年，隻身前往布里奇沃特市開始佢嘅學徒生涯。1841年，佐治衛良學徒期滿之後，就去咗倫敦聖保羅大教堂附近嘅一間布行工作同留宿。當時嘅英國正受到工業革命嘅影響，社會迅速變遷，趨向工業化同都市化，唔少好似佐治衛良嘅青年人從農村湧到大城市度工作，喺布行度同佐治衛良年紀差唔多嘅年輕僱員共有140名，而倫敦市內就有十五萬名類似嘅勞動人口。
喺高度工業化嘅英國，當時大部份嘅年輕勞工每日工作時數長達十三至十四個鐘，因此唔能夠得到充分嘅休息同正常嘅娛樂生活，再加上工商業競爭激烈嘅壓力同經常要加班嘅勞累，好多人都染上咗酗酒嘅壞習懷，導致生活放縱同墮落。
佐治衛良處於噉樣嘅環境之中，又受到當時著名嘅佈道家查理士芬尼（Chrales G. Finny）所主張嘅「基督徒必需信仰與生活合一，培養高尚嘅道德生活」嘅思想所影響，佐治衛良決定同幾位朋友一齊讀聖經同分享查理士芬尼嘅著作，並每日一齊祈禱，以改善全體僱員嘅道德生活。佢哋嘅熱心感動咗布行嘅老闆，唔單止令佢悔改信主，重經常資助經費同參加佢哋嘅聚會。自此之後，呢種幫助年輕勞工重建信仰同提高道德水準嘅風氣，逐漸影響到鄰近嘅工廠同商店。
1844年6月6號，佐治衛良同另外11位青年基督徒，喺倫敦正式成立基督教青年會。此後青年會喺世界各地迅速發展，並喺1855年正式成立「基督教青年會世界協會」（The World Alliance of YMCAs），並喺瑞士日內瓦定為永久會址，作為全世界YMCA嘅總樞[1]。
1844年11月8號，青年會第一次正式會議喺衛特利酒店舉行，出席人數有160人，並定下咗青年會嘅目標為「使受僱喺布業同其他貿易行業嘅年青人喺心靈上得到改善」。呢個運動嘅人數不斷增長，擴展到整個歐洲同北美，服務範圍更超越咗佐治衛良先生最初嘅期望。喺1853年，青年會運動喺法國巴黎舉行咗一次國際會議，決定分享呢個理念，普世性噉發展[2]。