場記板

場記板（英文：Clapperboard）係拍攝電影同電視節目嘅影片當中嘅一種道具，上面會寫住場次、鏡次、導演、片名、影片公司等資料，頂部可以開合，可以拍出清楚響聲，以方便剪接嘅時候聲畫可以容易對位。常見嘅材質有木板、塑料、電子顯示器等。

傳統木質場記板

電子場記板

拍攝開始嗰陣場記打板

簡介

電影或電視節目由好多個鏡頭組成，每套影片一般都有幾百個甚至幾千個鏡頭，影片中嘅場景、內容非常複雜。拍攝嘅時候係冇可能按照劇情嘅順序進行，而係按照場景拍攝，例如拍咗外景嘅戲先，之後再拍喺錄影廠嘅戲，又可能係先拍夏天嘅戲，再拍冬天嘅戲，而就算同樣係冬天嘅戲，有啲情節係可以發生喺故事前段或後面。拍攝嘅時候為咗保證質量，有啲鏡頭就算冇NG都會重拍多次，或者會同唔同角度去拍。拍咗一大堆影片之後，如果菲林或記憶卡上面冇明顯嘅標記，對後期嘅剪接工作會極為麻煩。

場記板簡要噉寫低嗰場影片嘅有關內容，喺拍攝每個鏡頭前先拍嗰塊板，作為嗰個鏡頭嘅標記。呢個步驟用電影界嘅術語叫「拍板」或「打板」。噉樣，每段影片嘅開頭都有場記板嘅鏡頭，喺後期製嘅作嘅時候，工作人員只要睇到呢啲標記，就知道呢段影片係屬於邊部戲、第幾場戲、第幾個鏡頭，容易識別。此外，服裝、化妝、道具等其他工作人員，喺拍攝有連貫性嘅戲或者補拍嘅時候，亦能夠根據呢啲記錄嚟避免出現瑕疵，例如演員件衫突然唔同咗，以避免犯錯。

後期製作，影片通常唔用攝影機錄嗰條聲，而用收音師另外錄嗰條聲，場記板拍打嗰吓聲，方便喺後期剪接嗰陣，聲軌可以容易對位，以避免出現聲音同口形唔夾嘅甩嘴情況。

基本信息

場記板基本上有以下資料：

• 影片名（Production）
• 卷號（Roll）：拍攝嗰陣用邊張記憶卡或者邊卷菲林（例如使用A攝像機嘅1號記憶卡，就寫上A1#）
• 場號（Scene）：表示第幾場戲（例如第四場第二段就係4B）
• 鏡號（Shot）：表示成套戲嘅第幾個鏡頭（例如第三場就係3）
• 次數（Take）：拍攝嘅時候係第幾次拍攝（拍攝NG次數）
• 導演（Director）
• 攝影師（Cameraman）
• 拍攝日期（Date）

睇埋

• 場記