塑膠

塑膠係一類人造或者半人造嘅聚合產品，包括有機嘅加成聚合物或者縮成聚合物。裏面可能加啲其他嘢令到佢慳錢啲或性能好啲。有時有一啲天然嘅聚合物都叫做塑膠。塑膠可整到唔同形狀，可以變膜，又或係纖維。唔同塑膠有唔同特性，有啲就耐熱，有啲就夠硬，有啲就自動還原形狀，隻隻唔同。因為佢可塑，成份平均，夠輕，響唔同工業都用得到。塑膠亦有各種色水，有啲係透明。

屋企成日用嘅膠產品

由塑膠製成嘅一堆食物樣本

類型

塑膠簡單可以分為軟膠同硬膠，而詳細分類如下：

回收標誌	縮寫	名	用嚮邊處
	PET	聚對苯二甲酸乙二酯，亦叫做聚酯	油樽、水樽。
	HDPE	高密度聚乙烯	常見於洗劑容器、牛奶樽、超級市場膠袋。
	PVC	聚氯乙烯	水管道、戶外傢私、雨衣。
	LDPE	低密度聚乙烯	牙膏或洗面乳嘅軟管包裝。
	PP	聚丙烯	樽蓋、吸管、微波爐食物盒。
	PS	聚苯乙烯	分為未發泡或已發泡。未發泡即保麗龍，常見於部分飲品（如益力多）容器；已發泡即俗稱嘅發泡膠，常見於包裝用膠粒、一次性保溫膠杯、包裝凍肉盛器、飯盒。
	OTHER	其他可回收利用嘅塑膠製品	包括聚甲基丙烯酸甲酯（PMMA）、聚碳酸酯（PC）、聚乳酸（PLA）、尼龍（Nylon）及玻璃鋼（FRP）、雙向拉伸聚乳酸薄膜（BOPLA）等。

睇埋

• 玻璃

出面網頁

• 國立台灣大學 塑膠加工實驗室
• 香港塑膠廢物回收同循環再造