神經傳遞素

神經傳遞素san4 ging1 cyun4 dai6 sou3（英文：neurotransmitter）係喺神經細胞嘅突觸當中負責做傳訊工作嘅一啲分子。

概論

内文：神經細胞同神經訊號

當一粒神經細胞所傳嘅訊號行去到條軸突最尾嘅突觸嗰陣，突觸會釋放神經傳遞素嚟影響下一粒神經細胞。呢啲神經傳遞素會黐落去下一粒神經細胞嘅受容體（receptor）嗰度，而下一粒神經細胞跟住落嚟會有點嘅行為－會唔會傳新訊號－就係由「邊種受容體受到啟動」話事嘅。受容體大致上可以按佢哋對下一粒神經細胞嘅影響，分做三大種：

• 刺激性（excitatory）會令到下一粒神經細胞射資訊嘅機會率提升、
• 壓抑性（inhibitory）會令到下一粒神經細胞射資訊嘅機會率下降、同埋
• 調制性（modulatory）會有第啲長遠效果。

類型

穀氨酸嘅化學結構

當中穀氨酸（glutamate）同 γ-氨基丁酸（簡稱 GABA）係好重要嘅神經傳遞素。穀氨酸同 γ-氨基丁酸係個腦入面最常見嗰兩種神經傳遞素－腦入面超過 90% 嘅神經細胞都係靠呢兩種神經傳遞素嚟傳達資訊嘅：穀氨酸嘅作用好簡單直接－穀氨酸會對好幾種唔同嘅受容體有作用，並且對其中幾類嘅受容體有刺激性作用，又同對第啲類嘅受容體有調制性作用，例如所謂嘅「閂咗」（OFF）嘅孖極神經細胞同多數神經細胞一樣，俾穀氨酸射到會受刺激，但佢側面嗰啲「開咗」（ON）孖極神經細胞因為用第種受容體，俾穀氨酸射到反而會受壓抑；γ-氨基丁酸都會對好幾種受容體有作用，不過佢啲作用（至少喺成年動物當中）冚唪唥都係壓抑性嘅。因為 γ-氨基丁酸咁常見，神經科學家為咗貪方便，有陣時會索性就噉嗌曉釋放 γ-氨基丁酸嘅神經細胞做「壓抑性細胞」。