大學鞋店

大學鞋店（粵拼：daai6 hok6 haai4 dim3），又名大學鞋業公司，係喺廣東省廣州市嘅一間老牌鞋類商家，創始人係李鉅觀，佢原本係高第街華強鞋店學徒，1934年始創鞋店，初名亞履鞋店，鋪面設喺萬福路，因料優質，適足耐用，明碼實價，其出品俾顧客譽為鐵價鞋。1941年後改名做大學鞋店，鋪面搬到去惠愛東路333號、335號（共和國後中山四路351~353號），「大學之作，實斧實鑿；大學之價，實銀實碼」係嗰陣時大學鞋業公司誠實經營宗旨嘅顯示。遷鋪後李鉅觀精心設計咗獨具風格嘅學生鞋同教官鞋兩款皮鞋，深受軍政學界喜愛，聲名大噪，李鉅觀喺40~60年代亦畀人稱為廣州嘅「鞋博士」。

1956年，大學鞋店畀人公私合營。1986年9月，鞋店全面裝修，時上屬國企東山區百貨公司將其變成咗大學鞋業公司。90年代尾面臨地鐵一號線拆遷，喺2002年8月13號被逼遷出，暫時安置去北京南路，鞋店舊址被完全清拆。據報而家喺西湖路75號附近繼續經營，名為新大學鞋業。