大戰略遊戲

大戰略遊戲（grand strategy wargame）係戰略遊戲一種，特色係強調大戰略：喺大戰略遊戲當中，玩家會扮演領主、勢力、甚至乎係國家意志，通過操縱高層面嘅經濟、政治、軍事等等唔同層面嘅戰略系統嚟謀得所扮對象喺遊戲時間空間上嘅大尺度發展，最終實現某種預想藍圖；大戰略遊戲通常都會高度抽象化－同（例如）《世紀帝國系列》唔同，大戰略遊戲玩家好少可會有得直接睇到戰場上嘅單位，啲軍民單位多數都係以一柞數據（譬如係一個表示「兵力」嘅數值）體現嘅集體，或者係用一個「人口單位」嚟代表遊戲世界當中幾萬甚至幾億個個體，而唔會俾玩家睇到軍民喺一幅遊戲地圖上面郁嚟郁去；因為噉，玩家唔使點樣做微操作，唔會直接指揮軍民。喺美學設計上，大戰略遊戲好多時都會設計成模擬緊一啲歷史上嘅戰爭。

大戰略遊戲早喺廿世紀嗰陣經已有以圖板遊戲嘅形式存在，而以電子形式存在嘅大戰略遊戲主要係喺 2000 年代前半橛興起嘅，例子有《歐陸風雲》（Europa Universalis）、《鋼鐵雄心》（Hearts of Iron）同《羣星》（Stellaris）等系列。