大澳慈善方便院
大澳慈善方便院喺香港大嶼山大澳市中心地區嘅東面山邊，係一座面積唔大嘅平房，喺1934年由葉善閑女士創立，方便院分為左右兩邊，左邊一間匾額上款寫住民國甲戌年(1934)闔澳公立，中間寫住「慈善男方便院」，下款係劉旭東書，右邊一間上面寫住「慈善女方便院」。慈善方便院曾經係幫助單身長者同垂死病人安渡晚年嘅院舍。分別服務男病人同女病人，另有隔籬相連嘅院翼提供額外嘅小童病床。到後嚟一啲老弱無依者、甚至係親生父母無能力供養嘅棄嬰都放喺呢度，由得佢自生自滅。當有人喺方便院過身，村民就會將遺體放入棺材，之後就暫時放喺原處，等待安葬。部分死者隨後就會被草草下葬喺附近嘅山邊墳地。經歷時代嘅變遷，方便院已經失去作用，而家已經荒廢咗。喺2010年5月17號被評為香港三級歷史建築。
