大環道

大環道（Tai Wan Road）係香港九龍紅磡大環一條雙線雙行馬路，由馬頭圍道開始到佛光街天橋，1922年6月2號起好，原名「大灣道」，因當地原名係「大灣」，只係當地居民將「灣」變調讀成「環」。雖然係咁，要到八十幾年後嘅2006年3月3號，「大灣道」先至正式改名做「大環道」。

大環道

大環道原本係一條由馬頭圍道連接去戴亞街嘅連貫車路，主要係方便出入鶴園發電廠嘅人士，但係隨著80年代尾新嘅佛光街天橋落成，令大環道喺民樂街夾民裕街嘅轉角位到紅磡道嘅一段車路被劃作佛光街天橋嘅一部份，而嗰一段車路同通往馬頭圍道嘅大環道則被一行人路隔開，但係紅磡道至戴亞街嘅一段路，仍然被稱之為大環道。直至2005年12月23號，政府將接近海逸豪園同和黃公園嘅一段改名做「大環道東」。